[فلسطينية الشتات]

والله وائل الموضوع مش اشي خرافي أو خارج عن المألوف

لأنه الفكرة اللي بتطرحها بالموضوع، أنا بعرف ناس بجد ضحوا بكل شي حتى الدين مقابل الشخص اللي بحبوه.

وبجوز تنصدموا لو تعرفوا انه قناعتك بالانسان اللي بتحبه ومدى حبك اله، اكيد بتخلق عندك نوع من البحث بقناعاته وانتماءاته، وشوي شوي اكيد بتصير تتقرب من هاي القناعات حتى تقدر تفهم الطرف الآخر بشكل صحيح.

وانا فعلا بحكي عن ناس قمة في الفكر والوعي، الشخص اللي بحكي عنه كان مسيحي وعلماني كمان، واهله كلهم مثله، تعرف على بنت مسلمة وحبها، المهم بعد فترة تخيلو الوضع، صار يقرأ في الدين الإسلامي ويفهمه صح، حتى وصل مرحلة أعلن فيها اسلامه هو وعائلته، وهذا الشخص اللي بحكي عنه شخصية محترمة جدا واله وزنه السياسي في المنطقة، يعني مش واحد بيتبع أهوائه فقط لا غير.

بالتالي إذا حبيت بصدق، اكيد كل شي بصير سهل حتى الدين والاعتقادات والأفكار،

أما انه البنت صعب تغير دينها، فكمان بحكيلكم قصة عن معلمة كانت تدرسني أيام المدرسة، كانت قمة في الأخلاق والأدب والرقي، كانت مسيحية، لكنها كانت باستمرار كانت تقرأ كتب في الدين الاسلامي وبتحاول تعرف كل يوم اشي جديد من الدين، ولما كانوا المدرسات يحكولها ليه ما تسلمي؟؟ كان جوابها، مش سهل أعلن اسلامي خصوصا انه عائلتها كانت من العائلات المتشددة جدا، عائلتها هي وعائلة زوجها كمان، بالتالي ما قدرت تعلن اسلامها وتتحدى الجميع.

وهيك بكون واضح انه البنت رغم كل شيء بتضل مقيدة بشيء اسمه العائلة وانتمائها للعائلة، بينما الشاب بيتمرد على أي وضع وبيطلع منه، وما حد بيقدر يوقف بوجهه، لأنه هو صانع القرار وعنده القدرة يتكيف مع قراراته .