[امرأة من ورق]

كاتب النص الأصلي : hanny dagher

هلأ اول ما انطلق الموضوع انطلق انو يصير الموت الرحيم بدون اخد راي صاحب العلاقة اللي هوي المريض طبعا بعد فترة كل اللي كانو مع الموت الرحيم انو اتجهو انو لاء لازم ناخد راي صاحب العلاقة يعني ما نجي نحنا نقرر منا لحالنا لاء هوي لازم يكون موافق كمان
بالمثال اللي طرحو doh84 كان المريض بحالة سبات يعني ما كان قادر ياخد اي قرار وبالتالي اللي قرر هوي العيلة (طبعا بغض النظر ان كان السبب هوي انو شوفة هالشب عم تسبب الم للعائلة او لاء او انو عم تكلفن مصاري عالفاضي من وجهة نظرن ) طبعا بهالمثل هادا تناقضت الفكرة الاولانية اللي قالو عنها الموافقين على فكرة الموت الرحيم واللي هوي موافقة المريض مع انو معظم الردود كانت داعمة لهالمثال

اهلين هاني
هلأ ظاهريا يمكن تشوف تناقض بين فكرة موافقة المريض وبين المثل اللي عطاه doh84 بس انتبه منيح انو بهاد المثل الشخص كان ميت وماكانو الاهل ناطرين انو يلتقى علاج او اي شي بس ببساطة كانو تاركينو جثة عم تتنفس بس فعليا هوي جثة غير قابلة للتحسن يعني مستحيل يكون في اي مجال للتحسن وكمان مافي اي شي من ظواهر الحياة بس تنفس واعضاء عم تشتغل عالاجهزة

هلأ بغض النظر عن كلمة انسانية الحياة الانسانية اللي انا ما فهمت شو معناتها كمان

رح ناقش فكرة الثقة بين المريض والطبيب
اولا لو ما في ثقة بين المريض والطبيب وخاصة بحالة الامراض المستعصية ما كان بيضل عم يتعالج على ايدي
ثانيا لما المريض بدو يوثق بالطبيب بدو يعرف انو كل شي عم يعملو هالطبيب لصالحو والطبيب مستحيل يعمل شي مو لصالح المريض لانو متل ما قال اسير انو بتصير عندو هاي متل معركة مو مستعد يخسرا
ثالثا انا مع الصراحة بين المريض والطبيب من ناحية تقدم المرض من ناحية الدواء وتاثيراتو والخ الخ
لانو هالصراحة بتزيد من الثقة (مع بعض الاستثناءات رح احكي عليها برابعا)
رابعا واهم الشي لما المريض بدو يقول للطبيب انو يموت موت رحيم والطبيب رح يستجيب لطلبو فهون بيستحق الواحد يوقف انا ضد هالشغلة يعني انا مع انو الطبيب ما يستسلم للياس متل المريض بالعكس الطبيب لازم يكون عندو دائما امل بشفاء المريض ولازم يحاول بكل الوسائل الممكنة انو يزرع الامل بهالمريض هون بتجي الاستثناءات لما الطبيب بيحس انو المريض بلش يفقد الامل وبلش يفكر بالموت الرحيم انا ضد انو يصارحو بكل شي بقى

منشان فكرة انسانية الحياة الانسانية سبق وشرحتها برد من ردودي على محمد متل ماانا فهمتها بس مابعرف عالاكيد اذا هاد المعنى اللي قاصدو اسير او لأ

ومنشان الثقة بين المريض والطبيب...... هلأ بغض النظر عن انو الطبيب صارح مريض بالوضع الاكيد او لأ المريض قادر يحس انو عم يتحسن وضعو الصحي او ثابت عند حد معين او عم يسوء يعني المصارحة او عدمها ممكن تزيد يأسو او تخففو شي بسيط كتير بس مارح تمنع يأسو عالاخير

بالاضافة انو برأيي الطبيب اكتر شخص ممكن يحس باليأس من حالة مريض لانو يفترض يكون مطلع تماما عالوضع وفاهمو وكمان لازم يكون مطلع على التطور بالعلاج وبالتالي اكتر شخص رح يعرف انو شو ممكن يكون مستقبل هالمريض بالاضافة لانو الطبيب على عكسنا بيكون المريض عندو اقرب مايكون لحالة منو لشخص يعني رأيو فيه درجة عقلانية اكتر من المريض نفسو او اهلو.......بس بظن انو مو سهل انو يضل عندو امل وماييأس متل ماانتو عم تفترضو انو الطبيب بيفوت بصراع مع المرض وبس....... وبعد هاد ممكن يصارح المريض باليأس اللي عندو او لأ

نقطة تانية انو المريض يطلب الموت لانو شايف انو عيلتو عم تصرف مصاري مع انو ما حيلتها الفتيلة بعتقد حكيت بهالنقطة قبل ورح ارجع احكيها

ما في عيلة بتتمنى تخسر واحد من افرادها وما في عيلة ما مستعدة تضحي باي شي مشان تحافظ على حياة الشخص المريض اللي موجود حتى لو مضطرة تبيع كل شي حتى لو مضطرة تدين حتى لو شو ما كان انا باكدلكن انو مستعدة تعمل اي شي بس ينشفى المريض اللي عندا

كمثال على ذلك من حياتي انا

عمو لبيي انصاب بسرطان الرئة (بسبب التدخين مشان اللي بيدخنو ) ابنو عم يشتغل شغل بسيط يعني عندو سيارة بيوزع فيها بيض على المحلات بالضيعة وباللي حواليها ويا دوب معيش عيلتو لما بيمرض بيو بيضطر ياخدو على الشام كل فترة مشان يعطي ابر بتكلف الابرة 3000 ليرة
اضافة لاسطوانات الاكسجين اللي كان يجيبها واللي بتكلف الشيء الفلاني
كان البي (الوالد يعني ) على طول يدعي انو الله يموتو مشان يرتاح ومشان يريح هالعالم معو
انا لهلأ بتزكر انو ابنو كان على طول يهدي ويقلو انو الله يخليلنا ياك ويطوللنا بعمرك وانو مستعد ساوي كل شي ومستعد ضحي بكل شي بس انتي تضل بيناتنا ومن هالحكي انو كان يعطي امل بحالو انو هوي اسا موجود وانو هني بدن يا موجود وبتحسو بعد هالحكي يرتاح شوي وينسى موضوع الموت وهيك وضل على هالحالة لحتى مات موت طبيعي
يعني بالنتيجة وبعد كل هالحكي اللي فوق ما في عيلة بتبخل على بعضا بشي واكيد بس واحد يحتاج شغلة بيكونو مستعدين يقدمولو ياها
يعني منلغي عامل العملة من هالناحية هاي

كمان مرة مافهمتو عليي شو قصدي
انا ماقلت انو ممكن اي عيلة تتخلى عن شخص بالعيلة كرمال المصاري
انا قلت انو العامل المادي رح يسبب ضغط اضافي عالمريض نفسو ويخليه يحس باليأس اكتر ويصر اكتر عالموت الرحيم وركزولي انو بكل الكلام اللي عم قولو عالمصاري عم استعمل كلمةاكتر لانو المادة لحالها مستحيل تكون عامل بس هيي عامل اضافي بيجي بعد العوامل التانية كلها...... يعني لما بيكون الشخص مقرر الموت الرحيم المادة بتعطيه دافع اضافي لهلشي بس المادة بحد ذاتها مانها عامل يعني مافينا نحكي عن المادة والموت الرحيم لحالون بس كمان مافينا نلغيها عالاخير

بجي هلأ لعامل الانسانية من بين الردود لامراة من ورق وباكتر من رد جابت سيرة انو انا بس امرض بخسر انسانيتي ومو مقصود بانسانتي نظرة المجتمع الي بل نظرتي لنفسي انو انا كنت اعمل شي يفيد المجتمع وبعدين بس امرض بصير عالة على المجتمع واللي اعتمدت عليها اكتر شي لتقنع بفكرة الموت الرحيم

طيب انا هون بدي اسال امراة من ورق سؤال خلينا نقول انو انتي الله يطول بعمرك وصلتي لعمر التمانين سنة وبهالعمر هادا تقلت حركتك ومعد تقدري تتحركي يعني مثلا تلقحتي صار بدك حدا يقومك حدا يلبسك الجرابات لانو معد تقدري توطي بدك حدا يروح يجبلك كاسة مية لانو صعبة عليكي المشي للمطبخ مثلا بالاضافة انو ما عم تشتغلي شي تفيدي المجتمع بالاضافة انو ما في امراض مستعصية ما في الام ما في شي ابدا يعني حالة شيخوخة طبيعية

السؤال هون انتي فقدتي انسانيتك او لاء ؟ اذا كانت متعلقة شغلة الانسانية بهالشغلات اللي ذكرتين واللي بينفقدو بحالة المرض هاي كمان بحالة الشيخوخة بينفقدو

هل هادا معناتا انو انتي بحالة الشيخوخة كمان بتستحقي الموت الرحيم هل هادا معناتو انو كل ختيار ما عندو قدرة يتحرك لانو ختيار بيستحق الموت الرحيم

الشيخوخة موضوع مختلف تماما..... ليش؟؟
لانو بس كون وصلت للشيخوخة بكون عارفة اني عشت بالقليلة 30 سنة على رأس عمل وقدمت فيها الشئ اللي مانو قليل للمجتمع طبعا طالما كنت عم اشتغل بارادة وحاسة بواجبي خلال فترة العمل...... وكمان يفترض كون انجبت اطفال وربيتهن وهي كمان انتاج مانو قليل...... يعني اني بحس اني قدمت شي مهم نوعا ما خلال حياتي ووصلت لمرحلة صار بيحقلي فيها كون مرتاحة من الواجبات شوي
وكمان انو الشيخوخة شغلة طبيعيا ومتوقعة لكل شخص وبتجي بشكل كتير تدريجي يعني من لما الشخص بيصير عمرو اربعين خمسين سنة بيبلش يحس فيها شوي شوي وبيتحضر الها نفسيا
بينما المرض بيجي غالبا كحالة مفاجأة شوي يعني ممكن كتير خلال اشهر او سنة تحس انك فقدت كل قوتك وكل عطاءك .......ورح يمنعك بالاغلب من ممارسة الانتاج وانت بعمر كتير ممكن تكون فيه باوج العطاء لولا المرض ويمكن يحرمك من اي انتاج اذا اجى بعمر مبكر شوي..... يعني وقتها بتحس بالعجز مو بس انو فترة اجتك ولازم ترتاح فيها من العطاء اللي اعطيتو
طبعا كل هالحكي عن الشيخوخة اذا سببت العجز ومو بالضرورة تسبب العجز يعني في ناس وجدي واحد منون عاشو للمية سنة وماتو بدون مايعيشو عجز وكان جدو لقبل وفاتو باسبوع يطلع عالحقلة ويشتغل

هادا كان ملخص للموضوع من وجهة نظري بتمنى ما كون طولت عليكن (قال ما طولت قال )

هوي للي طولت طولت بس فيه فائدة

كلمة اخيرة لابو طريق وامراة من ورق مشان موضوع الطبيعة والانسان انا مهتم كتير بهالموضوع وبحب اسمع الاراء اللي رح تنطرح نسقو بينكن ونزلو الموضوع وانشالله ما حدا من هالشعب اللي ما بيفهم يشارك واذا شارك التيتة مجود موجودة وهيي بتيك كير اوف هيم

وحياكون

طيب انت تيك كير اوف ايت ونزل الموضوع لنبلش النقاش

ومية هلا

 
ما حدا يسالني ليش غير لون الخط معي ما بعرف هيك طلع لحالو :???: 

حشش الموقع :pos: 

وينك يا نيرفانا :cry:

هلأ الاخوية بتحشش احيانا
بس كمان هاني مابيقصر

وعن جد وينها نيرفانا