يلعما طلعو عيوني بالعرض وانا عم اقرا الردود 55 دقيقة مبحلق بالكمبيوتر عم اقرا
انو ليش بتطولو الردود تبعيتكن
اي بداية يحضرني قول الشاعر العربي الكبير
خلص بلا بياخة
بدي اشكر الكل على النقاش المنطقي وكتنويه مبدئي انا مستعد شارك بالحوار اللي رح يصير بالصوتي بس اعلموني بالوقت لشوف اذا بقدر كون اون لاين
هلأ رح اعمل هيك تلخيص سريع للموضوع بعد ما قريت كل الردود ورح حاول وضح ريحة التناقضات اللي قريتا ببعض الردود (ما رح اقدر اقتبس الردود بس اكيد كل واحد بيعرف حالو شو رادد )
انطرح الموضوع على اساس انسان يعاني من مرض مستعصي وما امكانية تطبيق الموت الرحيم علي
هل كان من الاسباب المطروحة انو الالم اللي بيعاني في المريض واللي ممكن يصير غير محمول لدرجة انو الواحد يصير يتمنى الموت بالاضافة كعامل ثانوي هوي العملة او انو المريض ممكن يشوف
اهلو عم يدفعو مصاري كتير ممكن يتمنى الموت مشان يريح عيلتو من اعباء مالية وفي سبب تالت انطرح رح خلي رح احكي في باخر الحديث
هلأ اول ما انطلق الموضوع انطلق انو يصير الموت الرحيم بدون اخد راي صاحب العلاقة اللي هوي المريض طبعا بعد فترة كل اللي كانو مع الموت الرحيم انو اتجهو انو لاء لازم ناخد راي صاحب العلاقة يعني ما نجي نحنا نقرر منا لحالنا لاء هوي لازم يكون موافق كمان
بالمثال اللي طرحو doh84 كان المريض بحالة سبات يعني ما كان قادر ياخد اي قرار وبالتالي اللي قرر هوي العيلة (طبعا بغض النظر ان كان السبب هوي انو شوفة هالشب عم تسبب الم للعائلة او لاء او انو عم تكلفن مصاري عالفاضي من وجهة نظرن ) طبعا بهالمثل هادا تناقضت الفكرة الاولانية اللي قالو عنها الموافقين على فكرة الموت الرحيم واللي هوي موافقة المريض مع انو معظم الردود كانت داعمة لهالمثال
من نقطة تانية بالنسبة لحكي اسير التشرد (تعي لاقي بقى
)
هلأ المريض بدو يموت ليرتاح من الآلم والمعاناة اللي عليه وع أهلو ... وطبعاً الحالة ميؤسة منو بمئة بالمئة بنرجع على خيار المريض ... المريض هو مالك الخيار وهو حر باختيارو ...
لانو اراد الموت والطبيب رفض ... هون رح تهتز ثقة المريض بالطبيب وبدل ما يكون الطبيب معالج ومزيل لآلمو بصير جلاد متوحش عم يزيد من معاناة بوسائل داعمة للبقاء ...
برأيي انو لازم تكون الثقة موجودة بين المريض والطبيب وتكون قوية وانو المريض يكون بصورة علاجو والوسائل المستخدمة ببقائو ...وانو يكون هالمريض ع ثقة من انو ماحدا رح يصادر قرارو ...
الحياة مقدسة بمعنها الاسمى لما بتكون ممزوجة بالكرامة والحرية ولما بدنا نحترم الحياة طبياً ما بنروح بنعمل معارك خلبية ونركز على المرض وننسى المريض ولما بنحكي عن احترام الحياة الانسانية أول شي لازم نعملوا هو احترام انسانيتها ... ومعروف عندكم شو يعني انسانيتها...
هلأ رح تتعجبو منو كيف انا عم احكي هيك وانا ماني مع فكرة الموت الرحيم !!
هلأ بغض النظر عن كلمة انسانية الحياة الانسانية اللي انا ما فهمت شو معناتها كمان
رح ناقش فكرة الثقة بين المريض والطبيب
اولا لو ما في ثقة بين المريض والطبيب وخاصة بحالة الامراض المستعصية ما كان بيضل عم يتعالج على ايدي
ثانيا لما المريض بدو يوثق بالطبيب بدو يعرف انو كل شي عم يعملو هالطبيب لصالحو والطبيب مستحيل يعمل شي مو لصالح المريض لانو متل ما قال اسير انو بتصير عندو هاي متل معركة مو مستعد يخسرا
ثالثا انا مع الصراحة بين المريض والطبيب من ناحية تقدم المرض من ناحية الدواء وتاثيراتو والخ الخ
لانو هالصراحة بتزيد من الثقة (مع بعض الاستثناءات رح احكي عليها برابعا)
رابعا واهم الشي لما المريض بدو يقول للطبيب انو يموت موت رحيم والطبيب رح يستجيب لطلبو فهون بيستحق الواحد يوقف انا ضد هالشغلة يعني انا مع انو الطبيب ما يستسلم للياس متل المريض بالعكس الطبيب لازم يكون عندو دائما امل بشفاء المريض ولازم يحاول بكل الوسائل الممكنة انو يزرع الامل بهالمريض هون بتجي الاستثناءات لما الطبيب بيحس انو المريض بلش يفقد الامل وبلش يفكر بالموت الرحيم انا ضد انو يصارحو بكل شي بقى
بالنسبة للانسانية منجيلا بعدين
نقطة تانية انو المريض يطلب الموت لانو شايف انو عيلتو عم تصرف مصاري مع انو ما حيلتها الفتيلة بعتقد حكيت بهالنقطة قبل ورح ارجع احكيها
ما في عيلة بتتمنى تخسر واحد من افرادها وما في عيلة ما مستعدة تضحي باي شي مشان تحافظ على حياة الشخص المريض اللي موجود حتى لو مضطرة تبيع كل شي حتى لو مضطرة تدين حتى لو شو ما كان انا باكدلكن انو مستعدة تعمل اي شي بس ينشفى المريض اللي عندا
كمثال على ذلك من حياتي انا
عمو لبيي انصاب بسرطان الرئة (بسبب التدخين مشان اللي بيدخنو ) ابنو عم يشتغل شغل بسيط يعني عندو سيارة بيوزع فيها بيض على المحلات بالضيعة وباللي حواليها ويا دوب معيش عيلتو لما بيمرض بيو بيضطر ياخدو على الشام كل فترة مشان يعطي ابر بتكلف الابرة 3000 ليرة
اضافة لاسطوانات الاكسجين اللي كان يجيبها واللي بتكلف الشيء الفلاني
كان البي (الوالد يعني ) على طول يدعي انو الله يموتو مشان يرتاح ومشان يريح هالعالم معو
انا لهلأ بتزكر انو ابنو كان على طول يهدي ويقلو انو الله يخليلنا ياك ويطوللنا بعمرك وانو مستعد ساوي كل شي ومستعد ضحي بكل شي بس انتي تضل بيناتنا ومن هالحكي انو كان يعطي امل بحالو انو هوي اسا موجود وانو هني بدن يا موجود وبتحسو بعد هالحكي يرتاح شوي وينسى موضوع الموت وهيك وضل على هالحالة لحتى مات موت طبيعي
يعني بالنتيجة وبعد كل هالحكي اللي فوق ما في عيلة بتبخل على بعضا بشي واكيد بس واحد يحتاج شغلة بيكونو مستعدين يقدمولو ياها
يعني منلغي عامل العملة من هالناحية هاي
بجي هلأ لعامل الانسانية من بين الردود لامراة من ورق وباكتر من رد جابت سيرة انو انا بس امرض بخسر انسانيتي ومو مقصود بانسانتي نظرة المجتمع الي بل نظرتي لنفسي انو انا كنت اعمل شي يفيد المجتمع وبعدين بس امرض بصير عالة على المجتمع واللي اعتمدت عليها اكتر شي لتقنع بفكرة الموت الرحيم
طيب انا هون بدي اسال امراة من ورق سؤال خلينا نقول انو انتي الله يطول بعمرك وصلتي لعمر التمانين سنة وبهالعمر هادا تقلت حركتك ومعد تقدري تتحركي يعني مثلا تلقحتي صار بدك حدا يقومك حدا يلبسك الجرابات لانو معد تقدري توطي بدك حدا يروح يجبلك كاسة مية لانو صعبة عليكي المشي للمطبخ مثلا بالاضافة انو ما عم تشتغلي شي تفيدي المجتمع بالاضافة انو ما في امراض مستعصية ما في الام ما في شي ابدا يعني حالة شيخوخة طبيعية
السؤال هون انتي فقدتي انسانيتك او لاء ؟ اذا كانت متعلقة شغلة الانسانية بهالشغلات اللي ذكرتين واللي بينفقدو بحالة المرض هاي كمان بحالة الشيخوخة بينفقدو
هل هادا معناتا انو انتي بحالة الشيخوخة كمان بتستحقي الموت الرحيم هل هادا معناتو انو كل ختيار ما عندو قدرة يتحرك لانو ختيار بيستحق الموت الرحيم
هادا كان ملخص للموضوع من وجهة نظري بتمنى ما كون طولت عليكن (قال ما طولت قال
)
كلمة اخيرة لابو طريق وامراة من ورق مشان موضوع الطبيعة والانسان انا مهتم كتير بهالموضوع وبحب اسمع الاراء اللي رح تنطرح نسقو بينكن ونزلو الموضوع وانشالله ما حدا من هالشعب اللي ما بيفهم يشارك واذا شارك التيتة مجود موجودة وهيي بتيك كير اوف هيم
وحياكون
