والله هادا اليوم بالشغل الساعة شي تمانة ونص الصبح وانا فارط يعني عيني مفتحة عين مغمضة اي شو متوقعين يعني فالح كل النهار ونايم الساعة تنتين ونص وفايق سبعة ونص ورايح على الشغل اكيد بدي كون نعسان المهم من بين جفوني النص مطبقة شفت واحد فات على الستور
والله قرب مني قال عطيني باكيت مارلبورو حمرا عطيتو باكية مدري هيك كيف انتبهت مكتوب على كنزتو " لن نصمت " بالعربي انو سالتو هيك بصوت نص نايم من وين انتي قال من لندن قلتلو لكن شو هاي الجملة اللي على صدرك قال قدرت تقراها قلتلو اي انا بقرا عربي قال اي نحنا مجموعة كبيرة عاملين حملة ضد الحرب على الدول العربية وطلع هون انا صحصحت يعني كيف واحد نص نايم وكبيت علي سطل مية باردة بتلاقي صحصح بس اجتو الجمدة ومخو بيحملش لشي عشر دقايق ربع ساعة
انو وسرحت يا لطييييييييييييييييييف من لندن وعم يعترض على الحرب ضد الدول العربية ونحنا عنا بالدول العربية ما عم يحكو شي عن الحرب على الدول العربية
الشعب الغربي صار يشفق علينا ويدافع عنا ونحنا ما كنا نعرف نوعى لحالنا وندافع عن حالنا
انو يا لطيف كيف صرنا كيف صرنا منقادين ورا حكامنا اللي ما همن غير يجمعو مصاري ويكبرو حساباتن كيف صرنا منشوف المناظر بهالاخبار كانو عم نحضر مسلسل ومننطر الحلقة التانية منو تاني نهار ومنكون قاعدين عم نقصقص بزر ونشرب كاسة شاي ومو فارق معانا
والشعب الغربي اللي منضل نهاجمو ومنضل نحكي علي سادة نفسو من ورا هالمناظر اللي شايفها بدولنا العربية وعم يوقف مع العالم اللي عم تنضرب
سمحولي اقتبس قول همام حوت باحدى المسرحيات وعلى لسان احد الممثلين : نحنا امة اي الله لا يرحم هيك امة
وبعد ما صحصحت من هول المفاجأة والصدمة من حكي هالزلمي سحبتلكن سيكارة حشيشة وقعدت حشش ولا كانو شي صاير (اي ما هيك متعودين من نحنا وهنيك )
بس انا وعم اكتب هالتحشيشة خطرتلي شغلة تانية انو انا كان اسمي بالمطار انو ممنوع فوت على سوريا لاني متخلف عن خدمة العلم هلأ عم حس انو اسمي صار بالمطار انو ممنوع فوت على سوريا مشان شي تاني
مو مشكلة
خدلك سيكارة لك بالله خدلك سيكارة يعني سيكارة وحدة ما رح تكسرني خلص خود وشعل واسحب وانسى ما كلو رايح
وينك يا نيرفانا وينك يا ابو حشيشة
