[Syrian__Angel]

" حشش عليها تنجلي " ...
لك اي والله .. انجلت منيح وصارت عم تلمع لمع كمان !

انّو كيف ما كانت خاطرة ع بالي قبل مااا ... تنجلي
لك مع انو الموضوع قديم .. بس شو بدنا نعمل هلأ لحتى اجى دورو ، حاكم حضرتنا نظاميين كتير واللي بيجي قبل بيسبق وبيحجز محل ...

- اي شو القصة !؟؟!
- بيني وبينك ... سمعت انو الانترنت صار متراقب ! ..
- اي ومن طول عمرو متراقب .. وين الخبر الجديد بالموضوع ؟؟
- لك لااااء ... قصدي ( متراااااااااقب ) ..
- ايييه ؟ ومين يعني عم يراقبو ؟؟!
- " الشباب الطيبة "
- يا لطيييييييف الطف.. .!! وليش شو بيهمها الشباب الطيبة شو عم نلعي عالنت !؟ الله وكيلك كل علاكنا مصدي و مالو فكاهة ... على كيفك وشو اخبارك ووين كنت ووين رحت ووين جيت وليش تأخرت واذكرلي بالتفصيل شو اكلت بالفطور والغدا والعشا وشو مشاريعك لبكرا .. وبعدين بيت بيت كل واحد بينضب ببيتو .. بئا لشو لاحقينّا لهون ؟!؟
- هههههاي ، لك تضرب الهي .. ليش برأيك هنن عندهم وقت يضيعوه على مراقبة هيك تفاهات ؟!شو مفكّر قلة مشاغل عندهم ولا شو ؟؟ اي بذمتي بذمتي - وذمتي واسعة - انّو مصطلح حمير شغل ما طلع الا من وراهم ..لك روح شوف الفرع عندهم شو معبّى ، اتطلّع اديش مليان شباب - انترنيتية - هنيك .!! ..
- يا حراااام !! ليش شو عملو هدول ؟؟؟ يعني شو الحكي اللي قالوه بالضبط لحتى اكلوها ؟!
- شو مفكرني مجنون لحتى عيد اللي قالوه ! بس اللي بعرفو انّو كان في كم موضوع كاتبينو عن المعلّم وجماعتو .. قام ما عجبهم الحكي !!
- ولييييييي !! يعني حتى هون ما فينا نعبّر عن آراءنا عن الـ...... ؟!؟!
- لاء طبعاً ..
- ولا حتى عالخفيف ... تلميح مثلا ً ؟؟؟
- هئ .. ابداً ..
- وكيف بدنا ننفّس عن حالنا ؟! والله اللي فينا بيكفينا .. يعني لا بالشارع بيحقلنا نحكي، ولا بالشغل بنقدر نحكي، ولا بالبيت بنسترجي نحكي ، يعني ما بقيلنا غير هالفسحة الصغيرة لنتنفس منّا ونشم ريحة ربنا....يعني هلأ تقطعوها عنا ليييييش؟؟ اي والله بعدين بنموت طقييييق !!
- اي يا سييييييدي .. بتموت انت بيجي غيرك ، ويمكن يكون احسن منك كمان.. ليش مفكّر كتير سائلين عنّك ؟!
- هه !! لاء ... اصلاً دخيلك بلالنا هالسئلة .. لك ريتو يسأل عني عزرائيل ولا يقربو صوبي !!
- اي وهاد حكينا ... انا اللي عليي عملتو ، انت بئا شو بدك تحكي من هلأ وطالع بتبقى مسؤوليتك لحالك ..يعني بالعربي تسطفل

ووو توتة توتة ... العوض بسلامتكن

هلأ العبرة من الحكاية .. انّو المواضيع التالية بدّك تكنسلها ( تعمللها cancel ) من قائمة المواضيع المطروحة للنقاش ( حتى بينك وبين حالك ) ..
كل شي امور سياسية ، اقتصادية ، اجتماعية ، فلسفية - تخص نظرتك الخاصة للوضع الراهن عالساحة المحلّية تحديداً -، ووووو علميّة كمان.. لانو لو قالولك اللبن اسود بتسترجي تجادل ؟؟.. التمساح بيطير ؟؟ اي ولو يا زلمة ما بدها 2 يحكو فيها ...

وهكذا ... هاد بئا اللي صار ...


P.S : الاصح تكون صاير بما انو الفعل مازال موجود .. بس تحسبّا وحفظا لحضرتنا مما لا يحمد عقباه .. ارتأينا انّو نخلّي الفعل بالماضي


صحي .. عالهامش

ملاحظة هاي اخر تحشيشة الي بهالموضوع بما انو انتقل للسقيفة وصار بمتناول معظم الاعضاء

بلا آخر بلا بطيخ ... مفكّر "الاقلاع عن التحشيش " بيصير بالساهل يا بابا !!