غريبة هالحالة ! ليش بس يصير وقت النوم بيجيني كل الحكي والتساؤلات - من سؤال مو سئالة -.. واذا مافي حدا معي بالاوضة لحتى احكي معو بقوم بصير بسأل وبجاوب حالي على امل اني لاقي جواب مقنع ..لك يا سيدي حتى لو ما كان مقنع .."بنأقنع" حالنا فيها ، وشو هالقصة يعني !
هلأ شو الشغلة اللي كانت مدايقتني امبارح ؟!؟!؟ الانتماء ... اي نعم
ما بعرف كيف بدي اشرح كل الافكار اللي اجتني بس رح زتهم كلهم بفرد مرة وبدون ترتيب على امل توصل للشعب ...
اول ما فكّرت خطرلي شغلة انو ليش الانسان مهما بعّد عن بلدو بيضل بيحنّلو ؟؟ طيب فهمنا انو اذا كنت عايش حياتك هنيك وبعدين سافرت براّ، رح تحن شي اكيد لانو ال noraml كان انك تكون مع اهلك ورفقاتك بهالجو المعيّن .. بهالمحيط المعيّن .. بهالروتين المعيّن .. ووقت اللي تركت كل هالشي حسّيت بفراغ كبير ما عم تقدر تملّيه حتى لو كان كل وقتك مشغول ومو فاضي تحك راسك ...
اي بس القصة وين ؟؟؟ القصة انو لو كان الوضع العادي انك برّا والمو عادي انك ترجع ولو انشالله لزيارة .. شو اللي بيخلّيك تحن وتتمنى ترجع ؟! ما هوّ بكل الاحوال انت جوّك ومحيطك صار بالدولة التانية !!
يعني هلأ لو جبنا كل اهلك ونقلناهم للبلد التاني ما عاد تسأل ؟ بتبطّل تحنّ ؟!
ولا الشغلة بهالشعور الغريب اكبر من مجرّد اهلك وناسك ليشمل الوطن كـ ارض وشعب؟
شغلة تاتية خطرت ع بالي ... هيي جملة " انا سوري آه يا نيالي " ...
اي اوكي ... نيّـالي بالجنسية ما اختلفنا .. بس شو مشان ميزات الجنسية ؟؟؟
شو عاطيتك هالجنسية ؟؟؟ شو فاتحتلك ابواب ؟؟! كيف بينظرلك العالم بناءً عليها !؟؟
هلأ بعرف رح تقولو الجنسية مو مقياس .. وانا معكم ، بس ايام الواحد من الجنسية بيحدد " الصفة او السمة " الخاصة بهالشعب ... متل وقت يقولو السودانيين = الكسل والتنبلة مثلا .. بس شكلي بهالمثال بعّدت عن النقطة اللي بدي اشرحها ...
المهم ... نرجع لشغلة سوري يا نيّالي ... على شو !؟؟!
نيّالي على حرية التعبير اللي عنا بالبلد !؟ اي نحنا " العرب عامّة والسوريين خاصة " مالنا متل دول العالم المتقدمة .. المعادلة صايرة : بتفتح تمّك بينقص لسانك .. بهالسرعة بتصير الشغلة ..
طيّّب نيّالي مثلا على الخدمات المتوفرة الي بالدولة بصفتي مواطن فيها متلي متل غيري وكلنا سواسية ؟!؟
هون السؤال ... ليش انت متلك متل غيرك ؟! اي ريتك تتشبّه لـ.... جاية عم تقارن حالك مع هالبشر ولاه بطيخ ؟!!
اووووكي ....نيّالي عالحقوق اللي عاطيني ياها مقابل ما انا عم قدّم الها - للدولة يعني -؟!؟
اي ما بنشوف الا عم ياخدو ياخدو ياخدو من هالشعب المعتّر وما في شي عم يقدموه بالمقابل !! لك وين عم يروحو مصاري الشعب .. تعب الشعب .. صحتو و شقااااه ؟؟
( وما بدها جواب لانو معروف .. بس ليش مافي مين يحاسب هالجماعة متل ما بيصير بدول تانية ) !؟ لك هنيك لو سرق الرئيس نفسو بيعملولو فضيحة وبيشحطوه ... انا مالي عم اتطلّع لفوق كتير بالسلسلة .. عم فكّر على مستوى ابن اخ معاون وزير رئيس البلدية مثلا !
هلأ ليش رغم كل هالشي ، ومع انّك بتعرف كل هالعيوب اللي صايرة ببلدك ومو مصدق ايمتى تطلع منها - هي اذا ما كنت طالع من زمااان - بس اذا اجى حدا "برّاني" - يعني مو سوري - وحكي عنها كلمة " ولو حتى عن مزح " .. مو بس بتسكتو .. لااااء وكمان بتطالع العيوب الشرعية وغير الشرعية فيه ووببلدو ... لحتى تخلّيه يندم عالساعة اللي فتح فيها تمّو ..
طبعاً وهون بتجي كتير جمل للتسكيت حافظينها عن ظهر قلب واباً عن جد وما بنصدق ايمتى واحد يغلط قدّامنا لحتى ندّجلو ياها دج بخلقتو ، لحتى تاني مرة يفكّر مليون مرة قبل ما يتشاطر و يتفزلك ع سمانا وسما بلدنا بالتعليقات اللي - بلا طعمة - متل ( حبيبي لمّا تقول سوري / سوريا بتحط ايدك ع راسك .. ايواااا ) ... ( لك اصلا لو صحّلك تكون سوري كنت ركضت ركيض بس @#$# ما بتتعاتب ) .. ( اي كون سوري مو احسن ما كون $#%# ؟؟ )
ملاحظة رجاءً لا يقراها غير السوريين مشان ما بدي مشاكل ... مكان هال#$## = اي جنسية تانية وطبعاً عربية ... لانّو ببساطة مافي حدا غربي بيركض لـ "يتعرّب " او " يتسورن "
لكككككك بهاللحظة - مو يعني اللحظة اللحظة بس يعني هي شغلة ما كانت خاطرة ع بالي -كانت دايقة خلاقي ، قام قلت لحالي خلّيني اسمعلي شي غنية روّق فيها شوي ... وبما انّو الكمبيوتر عم فضّيه مشان اعملو فورمات قام حاطّة كل ملفات ال mp3 سوا بدون تنظيم ...
هلأ بلا طول سيرة .. اللي بدي قولو انّو لقيت ملف غريب قلت خليني اسمعو لاعرف شو هو ، ولا بتطلعلي ( بالدور يا بقر .. بالدور يا جحيش ... شعارنا الابتسامة يا اوباااااااااااااااش )
- هي مقطع من مسرحية سبق ونزل باخوية عن معاملة المضيفين بالطيران السوري للركّاب -
العمى هي بدها صفنة لحالها ... وتحشيشة لحالها
بس خلص كفاها الله لليوم ، مع انّو لك ايييييييييه والله جاية ع بالي اكتب كمان ... هو صح تعبت بس لسّه ما خلصت حكي !
والله يا حكيم لازملك تضيف voice clip مع هالاختصارات ... لانو اللي بيغر كتير وعندو قصة طويلة متل حكايتنا رح يهلك بالكتابة وما حدا الو مروّة يكتب بكل الاحوال ...
ما علينا .. المهم انّو اجت الحشيشة عالقد
.. مع انّي حاسة حالي نسيانة شي بهالمووضوع او لسّه في شي بدو ينقال بس ما عاد يطلع معي ... خلص سكّرنا
~*¤ô§ô¤*~ No Pain ... No Gain ~*¤ô§ô¤*~
المقاومة مخاطبة الحكّام العرب : لعن الله أناس مثلكم ، فقد أردت لكم الحياة فأردتم لي الموت ...
نسيَ الطينُ ساعةً أنــّه طينُُ ُ حقيــرُ ُ ... فـصالَ تيهاً وعربـــَد ...