اقتباس:
كاتب النص الأصلي : Nirvana
كل ما أفكر بحال الدول العربية (بغض النظر عن مين بدو يتضايق من كلمة العربية .. يخترعلي كلمة تانية بستخدمها أحسن ما يحس بالإهانة) بحس انو مستحيل نطلع من الحفرة أو الهاوية الفكرية والثقافية والسياسية والاقتصادية والانسانية اللي نحنا فيها .
لك حتى العالم صاير كلو فقر وحقد وفساد وعنف وحروب وتهديدات ..
وبفكر بحالي .. أنو انا شو رح أقدر أعمل؟ .. بفكر كيف معلقة حالي بحبال الماضي .. وقفت عند السبعينات من القرن الماضي.. مو قادرة أطلع برا هالتاريخ .. مع انو انا نفسي ما نولدت غير بال 79 ..
لك حتى بالموسيقى بحب الموسيقى القديمة سواء عربي أو غربي ..
هلأ .. قعدت أفكر شو السبب ؟
ليش بحب نمط الحياة السائد بهداك الوقت ..
ليش بحب رموز هداك الوقت ..
ليشبحب فكر هداك الوقت ..
ليش بحب الاحساس الشعبي اللي كان بهداك الوقت ..
ليش بحب جبران .. جيفارا ..درويش .. عبد الحليم .. بوب ديلان .. برسلي ... وبقدس الحرية ..
يمكن لانو كان في طعم خاص للحرية .. لانو كان في فكر (كان موجود شو ما كان نوعو وشو ما كانت الاختلافات) .. موسيقى هداك الزمان بتعبي الراس .. كانت الامور أبسط .. والحياة غير مرتبطة بالمال فقط .. ولانو كان في براءة زمن .. كان في شعب يرفض ويتمرد مو بس في منطقتنا بس كمان في الغرب..
يعني حركات التحرر والثورة على الذات ..
مو عارفة كيف بدي فسر هالشي .. بتقدرو انتو تفسرو .. ؟
مع العلم اني لساتني بعز شبابي .. يعني ما تفكروني ختيارة ..
بس يمكن ما طلع شي أحسن من هداك التاريخ لليوم .. لحتى اقدر ارتبط فيو ..
لانو هلا عم نعيش بفراغ .. بفراغ بس؟؟؟
|
هلئ اول شي نحنا عنا دائما خوف من المستقبل , وعنا حنين للماضي بشكل غريب حتى لو كان الماضي مؤلم
كلشي كان ايام زمان غير هلئ يعني كان في بساطة مافي تكليف بالحياة اي هلئ صار الخ عم يقتل اخوه مشان شوية مصاري او متر أرض
ومنرجع للتاريخ
يعني يوم كان في ثورة فلسطينة (منظمة التحرير ) حقيقية مو متل هلئ شفنا عملية ميونخ وشفنا أحداث الأردن (ايلول الأسود ) وبعدين خروج المنظمة للبنان وبعدها اجتياح 78 وبعدو 82 واتفاق 17 ايار وحرب 85 ..........الخ
حتى الجبهة الشعبية بكافة اطيافها (الشعبية والديمقراطية والقيادة العامة ) معد في شي متل ايام زمان
لك حتى فرقة العاشقين فرطت وكل شخص منن صار بديرة وكأنو عم يقولو انو الثورة معد تطعمي خبز
هلئ انا معك ببداية التاريخ بس انا بظن التارخ وقف عند حرب الخليج التانية (حرب الكويت ) وعند انهيار الاتحاد السوفيتي وطبعا با1993 اتفاق اوسلو ووداي عربا
بعد هالتواريخ معد صار اي شي ابدا
سقط المعسكر الاشتراكي وبلشت اوربة الشرقية وحدة ورا التانية تفرط كمان وتروح بالاتجاه الأخر
يعني ماكان في شي غير موضوع الحصار على العراق وضربة العراق بسنة 1998
سوريا أمورها بلبنان بعد ماخسر ميشيل عون الحرب
الاردن كمان امورو منيحة صارت تجيه مساعدات كتيرة بعد اتفاق وادي عربا واصبح الأردن ذو اهمية اقليمية وا، يكن محدودة
فلسطين وأبو عمار كمان الوضع تمام بالنسبة الن
الخليج فاتح ارضو للامريكان وكأنو بيتن وأعز
ضلت هيك الأمو لسنة 2001 او قبلها بسنة
شو يلي صار ؟
خروج اسرائيل من جنوب لبنان
صارت 11 ايلول وتوابعها
حرب العراق
خروج سوريا من لبنان
والحرب الأخيرة
هلئ كل هي الاحداث مرتبطة ببعضها
بس مع هيك بتضل هديك الأيام أحلى وأجمل بمرها وحلاها