مرحبا ابو شريك
شو تعريف الشيء الطبيعي؟ الشيء الطبيعي هو الشيء يلي بيحدث بدون أي تعديل خارجي او تدخل مسبق من العقل البشري. يعني بدون تخطيط و تجهيز مسبق. ضمن هل سياق, يلي هوي فعلا التعريف الدارج و الوحيد لكلمة طبيعي, الانجذاب الجنسي يلي عم يصير بين المثليين جنسيا, ان كانوا بشر او حيوانات, هوي شيء ناتج عن طبيعتهم.. هوي شيء طبيعي بالنسبة لهم. يعني انجذابهم للطرف الاخر متل ما الانسان السوي بينجذب لشخص تاني.. بطريقة طبيعية
هلأ هون قصة المتعة بالجنس عند الحيوان, هي الفكرة الكبيرة الجديدة يلي رح تقلب الأمور. اكتشاف وجود جنس عند الحيوان "فقط للمتعة", يعني ان الجنس عند الحيوان ايضا له اهداف غير التكاثر فقط.. و هادا بيزيد من طبيعية المثلية الجنسية او بالأحرى طبيعية العملية الجنسية كلها ع بعضها... يعني هي ليست مجرد الية مبرمجة بتحصل عند الحيوان في وقت معين من السنة... بل ممكن تحصل بأي وقت. و هادا يلي عم يتم ملاحظته. في حيوانات عم تمارس الجنس خارج مواسم التكاثر... و لما الانسان يدرك انو الجنس "بالطبيعة" ليس هدفه فقط التكاثر... معناها صارت الممارسة الجنسية بهدف المتعة فقط (المثلية الجنسية مشمولة هنا), هي شيء طبيعي
و أيضا, لما يكون في عندك نسب معينة, فهل بيضل الأمر شذوذ؟ يعني المثلية الجنسية إلها نسب معينة بكل مجتمع و عند كل فصيلة حيوانية.. مثلا نسبة النساء 1.4 % بأميركا و نسبة الرجال 2.8% باميركا كمان
يعني مثلا شو تعريف الشذوذ. فقط هوي كون الإنسان مختلف عن الأغلبية؟ يعني مثلا اللادينيين العرب هني شواذ؟ و كونهم شواذ عن القاعدة العربية... هل هادا بيعني انهم غلط او في شي ما طبيعي بطريقة تفكيرهم؟
لازم نعرف شو معنى المفردات يلي عم نستخدمها و شو المقصود منها بالضبط
و الفكرة الثانية يلي حضرتك طرحتها هي فكرة الأسرة
انا ما بوافق معك انو هدف الأسرة هوي تشكيل خلية المجتمع. صحيح الأسرة هي خلية المجتمع. بس أنت لما تفكر بتشكيل أسرة, بتكون عم تفكر بالمجتمع شي؟ لكن ليش قلت انو الأسرة المثلية الجنسية ما رح تحقق أهداف الزواج؟ يعني ليش برأيك ما رح تكون "أسرة" ؟ مو عايشين مع بعض و عم يتشاركوا بالمصاريف و الأكل و مشاكل الحياة؟
انا ع فكرة اول شي كنت معارض على كلمة "زواج".. انو يا عمي يختاروا غير كلمة... بس بعدين بتفكر انو شو اصلا ما في كلمة تانية... و بالنهاية الإنسان مين هوي حتى يتحكم بحياة الناس بهل المستوى الخصوصي... و شو الضرر يلي رح يوصلني اذا المثليين حصلوا على حقوق الزواج عند الدولة... شو بخسر انا كفرد؟
تحياتي
ذكرى مرور عام على وفاة الأديب العالمي سيبيري ماسكوليه 1932 - 2008
|