86
يا وردة قلبي معاكي في الريح لعب
لا تعبتي م الريح و لا قلبي تعـب
احنا كده : نرتاح في صخب الجنون
و في السكون بنخاف قوي و نترعب
عجبي !!!
87
مركب ورق من نفخة تتطـوح
ركبتها و الكل بيـلوح
سوحت فيها اتنين و خمسين سنـه
للآن . و لا بتغرق و لا تـروح
عجبي!!
88
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـد
قد اللي ماشي.. وتحت باطه كتاب
عجبي !!
89
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـل
وازاي تكفيني لباب القــبر؟
عجبي !!
90
قاعدة قناني الخمر ساكتة و ساهية
مع ابن آدم في الشبه متناهيـــة
مفيش كده روقان في لحظة تشوفهم
و بعدها بلحظه يودوا في داهيــه
عجبي !!!
91
حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيت
إن الطبيعة كمان لا أخلاقيــة
عجبي !!!!
92
بلياتشو قال إيه بس فايدة فنونـي ؟
و تلات وقق مساحيق بيلونونـي
و الطبل و المزامير و كتر الجعـير
إذا كان جنون زبوني زاد عن جنوني
عجبي !!!
93
نقطة مرارة كمان علي مشروبــي
دوبها يا ساقي حسب مطلوبـــي
طعب الحياة .. مش برضه فيها و فيها ؟
ليالي وردي و نهارات خروبـــي ؟
عجبي!!
94
وسط الحطام اتفرجوا يا أنــام
تمثال ملك . و مبوله م الرخـام
لتنين نحتهم نفس أسطي الحجـر
و كانوا ذات يوم كتلتين لسه خام
عجبي !
95
عيد و العيال اتنططوا ع القبـور
لعبوا استغمايه .. و لعبوا بابـور
و باللونات و نايلونات شفتشـي
و الحزن ح يروح فين جنب السرور
عجبي !!
96
أنا قلبي كورة و الفراودة أكـم
ياما اتنطح و انشاط و ياما اتعكم
و اقول له كله ح ينتهي في المعاد
يقول بساعتك ؟ و الا بساعة الحكم ؟
عجبي !!!
97
الضحك قال يا سمع التكشيـر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيـر
عجبي !!!!
98
أهوي الهوي و همس الهوي في العيون
وبسمة المغرم ودمعه الحنــــون
و زلزلات الحب نهد الصبــــا
أكون انا المحبوب أو لا أكـــون
عجبي !!!
99
يا ملونين البيض في شم النسيـم
لون الحنين و الشوق و خمر النديم
ما تعرفوش سايق عليكو النبـي
تلونوا الأيام بلون النعيــم ؟
عجبي!!
100
الدنيا صندوق دنيا. دور بعـد دور
الدكة هي .. و هي كل الديكـور
يمشي اللي شاف ويسيب لغيره مكان
كان عربجي أو كان امبراطــور
عجبي !