16
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!
17
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!
18
يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!
19
قلبي عليل يا ناس و في الكاس دواه
مديت له إيدي شربت م اللي حـواه
جنبي الشمال خف .. اليمين اتـوجع
و إيه يداوي الكبد م اللي كــواه
عجبي!!
20
.. دي مزكرات و كتبتها من ســنين
في نوتة زرقا لون بحور الحنيـــن
عترت فيها .. رميتها في المهمــلات
وقلت صحيح أما صحيح كلام مخبولين
عجبي !!
21
دخل الشتا وقفل البيبان ع البـيوت
وجعل شعاع الشمس خيط عنكبوت
وحاجات كتير بتموت في ليل الشـتا
لكن حاجات أكتر بترفض تمـوت
عجبي !!
22
الدنيا من غير الربيع مـــيته
ورقة شجر ضعفـانه و مـفــتـته
لا يا جدع غلطان تأمل وشوف
زهر الشتا طالع فـي عز الش ــتا
عجبي !!!
23
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـبار
و ما لكش غير منقار و قادر تعيش
عجبي !!!!
24
سمعت نقطة ميه جوه المحيــط
بتقول لنقطه ما تنزليش في الغويط
أخاف عليكي م الغرق .. قلـت أنا
ده اللي يخاف م الوعد يبقي عبيط
عجبي !!!
25
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!
26
فارس وحيد جوه ا لدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي !!
27
كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!
28
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!
29
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!!
30
كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني.. ليه
خجلان تقول انك سعيد يا ولد
عجبي !!!