[oliver68]

عزيزي دانيتو، أول شي اشتقنالك يا زلمي، وين هالغيبة؟؟؟؟؟
بعدين يا أبو شريك اسمحلي و للمرة الأولى خالفك بالرأي، أنا وضحت رأيي قبل هالمرة، بس هلأ بظن في حوار جاد و عقلاني، أنا برد و بكرر حزب الله هو أداة في يد اسرائيل، وهوي خط الدفاع الأول لإلها، يعني بتحركو إيمتا ما بدها و كيف ما بدها، كلنا منعرف اسرائيل كان بدها حجة لتضرب لبنان و حزب الله عطاها هالفرصة على طبق من ألماس.
بعدين عزيزي دانيتو، حزب الله ما بمثل الشعب اللبناني، ما عندو حق يتحكم بمصير هالشعب اللي عمرو ما رتاح، يعني ما كان عرفان إنو لما يعمل عملتوا رح ترد اسرائيل؟؟؟ كان متوقع إنو تحط رجل عرجل و تتكتف و تروح تشكيه لمجلس الأمن؟؟؟؟؟مانو عرفان إنو اسرائيل ما بتسأل على مجلس الأمن و حاططوا بصرمايتها؟؟؟؟؟ ماتوقع كل هالمجازر تصير؟؟؟؟؟؟لما كان متوقع اسرائيل تستسلم و تعقد اتفاقية تبادل أسرى؟؟؟؟؟؟؟
من كل هالشي بظن إنو في حلقة مفقودة، في شي غلط، يعني إذا بدنا نسلم إنو حزب الله و نصر الله بهمون الشعب اللبناني، المفروض يكون أذكى من هيك، مو بهالغباء المستشري، يعني ولد صغير ما بيعملها، كل هاللي عمبصير بلبنان بيتحمل مسؤليتو اسرائيل بالدرجة الأولى و حزب الله بالدرجة التانية، و بعدين حزب الله مو دولة عندا طيارت و صواريخ و مارينز و جيش طويل عريض، لأ هوي عبارة عن ميليشيا، عصابة يعني، هالميليشيا عمتتحدى جيش اسرائيل اللي كل أسلحتو من أميركا و ببلاش كمان، لأ و أكتر الأسلحة تطورا و أكثرها فتكا، يعني ماكان حاسب هالحساب؟؟؟؟؟؟ و اسرائيل لو بدها تستعمل قدرات جيشها الكاملة بتروح الوطن العربي كلو، بكفي إنها قوة نووية، بعدين اسرائيل بالأقمار الصناعية اللي زارعتها بالفضاء فيها تحدد مواقع العدو اللي بدها ياه، و تقصفو بقنبلة صغيرة، مرة تانية مابدي ينفهم إني عمعظم باسرائيل، بس هي وقائع و حقائق، و اسرائيل لاتستهينو بحجمها الصغير، وراها أميركا و أوروبا، بكفي إنو أسلحتها و جيشها ببلاش، يادوب بتدفع بس مصاريف العساكر من أكل و شرب و منامة، و الأسلحة و غيرها بتجيها عبارد المستريح من أميركا. اسرائيل بدها دولة تحاربها، مو ميليشيا!!!!!!!!

و يا ريت وقفت عاسرائيل، كلنا سمعنا خطاب الظواهري على الجزيرة، يعني فتح الباب للإرهابيين كمان يفوتوا علبنان، بكرا تنظيم القاعدة بيدخل(بأمر من أميركا و اسرائيل) و بيطلع عميل الموساد الأكبر أسامة بن لادن و بصير يطالعلك فتواي و أشرطة فيديو و تسجيلات صوتية، بصير يحض على الجهاد ضد الشيعة أو متل ما بسموهن"الروافض" و بتعلق بين السنة و الشيعة و لحق إذا بتلحق، و كلو على حساب هالأطفال و المدنيين، هنن بس اللي بيدفعوا التمن.

كل هالمجازر اللي صارت بلبنان بسبب هالكام اسير سواء كان اسرائيلي أو لبناني او فلسطيني، أو شو ماكان، و شو ما كان عددن، بيستاهلوا نضحي بهالعدد الكبير من الأطفال منشانن؟؟؟؟؟؟ يعني صار الاطفال اللي انقتلوا بهالحرب شي 200 طفل، وين العدل؟؟؟ و ين التكافؤ؟؟؟؟؟ مع إنو الطفل بكرا بيكبر و بكون عيلة، يعني باختصار انقتل جيل كامل لما انقتلوا الأطفال.
أنا برأيي نعيد حساباتنا شوي و نفكر لبعيد، و ما نحصر تفكيرنا بهالكام متر اللي قدامنا، عالمدى القريب ببين إنو حزب الله و طني و بحب لبنان و خايف عمصلحتو، بس فكر فيها شوي عالمدى البعيد بتلاقي إنو كلشي عمبساوي بحقق مصالح الدولة اليهودية بالدرجة الأوى، يعني ليش هنن بفكروا بمستقبل أطفالن و نحنا لأ؟؟؟؟؟؟؟؟؟؟