أنا بحلب من (6) سنين..
يعني حلب ما كلها إيجابيات بس ما شفتها بهالسلبية الشنيعة يلي عم يحكي عليها MIKELEROI !!!
يعني حلب كمدينة أكبر من حمص بكتير وفيها تنوع غريب لا بل وهائل!!! ونتيجة هذا التنوع الكبير لا بد من وجود بعض التناقضات بين انحائها المختلفة..
يعني الواحد وقت يمشي بسوق المدينة، أو يقعد ع القلعة بيحس حالو بغير دنيا عن وقت ينزل ع العزيزية أو الموغامبو... (الأصالة مقابل الحداثة!!!!)
الجامعة في حلب هي من أقدم جامعات القطر.. بعض الكليات قديمة ومهرهرة شوي بس بشكل عام كمنطقة وحدائق وشجر الحرم الجامعي في حلب كتير حلو...
ومن أوائل الامور التي تلفت النظر في حلب هي كثرة محلات الاكل!!! يعني ما بتمشي 10 أمتار إلا وبتلاقي محل اكل...
أمر آخر هو كثرة الجوامع الفخمة في حلب... يعني جامع الرحمن لحالو شغلي كبيرة يا جماعة.. صحيح لسا ما خلص الباء فيه بس حلو...
وكمان الكنائس يحلب أكبر من كنائس حمص.. وأحلى كنبيسة بحلب هي كنيسة اللاتين........... حلوة كتير كتير..
ومشان ساحة الحطب، في مشروع ان تتحول ساحة الحطب إلى ساحة للرسامين (يعني متل المدن الأوروبية الراقية)!!!! عن جد فكرة رائعة... المشروع ان ينتشر الرسامون فيها خلال النهار مع اجواء هادئة.. وفي الليل تصبح ساحة عامة للحفلات العامة..من غني إلى عزف.. وما شابه.. (بس أنا خايف أنو شعبنا ما يقدر يتعامل باسلوب حضاري مع الموضوع)...
الشعب الحلبي.... ها... هون أصعب سؤال عن حلب... يعني كيف هوي الشعب الحلبي!!!!
الجواب في غاية الصعوبة!! يعني شو بدي احكي عن الشعب الحلبي.. الشعب السوري في حلب كما ذكرت في الاعلى مليء بالتناقضات... يعني بتلاقي هون من أغنى الأغنياء إلى الفقر المخيف.. عن جد شي بيخوف.. أحيانا بتشوف مظاهر ثراء بتنزل الدمع العين، ومناظر من الفقر المرعب يلي بتخليك ما تقدر تنام شي ليلتين تلاتي..
وكمان الشعب منقسم إلى حارات وطوائف.. يعني المسيحيين إلهون حاراتهون الخاصة، والمسلمون في حارات اخرى.. وغالباً لا يعرف كل شخص سوى الحارات المتاخمة لحارته، وبالتالي الاحتكاك بين الاديان شبه معدوم...
بس المشكلة ان هذا التنوع الكبير ما بين الاديان، المعتقدات، القوميات (عرب.. ارمن.. أكراد.. ) كل هذا التنوع من المفروض أن يتم استثماره لخدمة البلد، فهذا يميز حلب عن باقي المناطق.. بس المشكلة انو التنوع عم ينقلب إلى خلاف وصدام بدل من أن يكمل...
حياة الشبيبة في حلب فيها مجالات متنوعة... صحيح الجانب الثقافي أو الفكري غير منتشر كثيرا بالنشاطات الشبيبية ولكن هناك تحرك نحو الأفضل بهذا الاتجاه...
هادا باختصار يلي خطر على بالي عن حلب...
