[oliver68]

عنجد يا جماعة ما بعرف أنا ليش دائما بفوت على هالمواضيع الحساسة متأخر، بجوز لأني لسا جديد، المهم أنا ما بعرف مين هالكاتب المتخلف(مو إنتي وايت روز، قصدي الكاتب الأصلي) اللي كتب هيك عن نزار؟؟؟ و الله نزار بحب الله أكتر منو بمليون مرة، بس عنا التخلف مالو حدود، و كل شي نقال عن نزار هو عبارة عن مجرد اتهامات باطلة، أنا بتحدى تحدي و أنا مسؤول عن كلامي، إنو حدا يجبلي بيت شعر لنزار سب(شتم) فيه الله سبحانه و تعالى، و كل شي كتبو نزار هوي تصوير للحالة المعفنة اللي وصلها العرب، تعبير عن مدى سوء العرب، عمبورجي إنو الحكام العرب فكروا حالن آلهة الشعوب العربية فتطاولوا على الله سبحانه، و صاروا يحكموا بأمرو، و لما يقول الله مات أو خاف أو هيك شي، هوي ما بيقصدها حرفيا، هوي بيقصد إنو الشعب اللي مات و الشعب اللي خاف، و كل هالشي باسم الله، بينما الله بري منن، و أنا بنصح اللي بيتهم نزار يقرأ قصيدة أصهار الله، بركي شي يوم بنزلكن ياها، نزار حكا هيك لما شاف العالم عم تطرف بالدين، عمتستخدم الدين متل الأفيون، مع إنو الدين هوي رحمة و تنظيم لحياة الشعوب، عمبورجينا كيف الحكام عم تظلمنا و تعمل دكتاتوريات باسم الدين، و باسم الله، عمبورجينا كيف المشايخ عيغسلوا دماغنا و دماغ أطفالنا باسم الله و الدين، نزار ما كفر، نزار مش كافر، بس البلد كافر و الذل كافر على قولت زياد الرحباني، دافع نزار عن الله و عن الحق البشري لما شاف الذل لبني آدم باسم الله و الدين، حاجتنا تخلف، حاجتنا تكفير، و الله عيب نحكي بهيك مواضيع، الله مو متل ما مفكرينو، الله لو ما بدو يانا هيك ما خلقلنا العقل بالأصل، ما سمحلنا نتطور و نتقدم، ما كان فضلنا على كل مخلوقاتو و خلقنا مشان نعمر الأرض.

ما بدي طول أكتر من هيك، و للمرة الألف يا ريت ما حدا يفهم هالموضوع على إنو تهجم شخصي عليه، بس أنا عمحط وجهة نظري بالموضوع، و أكيد هادا من حقي، و بعدين حسيت إنو واجب علي دافع عن نزار اللي دائما حبيتو و حبيت أشعارو، عن نزار اللي دافع عن المرأة و عطاها حقوقها بالتفكير و العيش، عن نزار اللي صور الحب بأروع أشكالو، نزار اللي عانا من الظلم و الدكتاتورية، من يوم ما نولد و مرورا بالتعذيب على إيدين البعث و النظام السوري-رغم التكريم المزيف اللي عطوه ياه- لوقت ما مات ابنو مرورا بوفاة حبيبة و سيدة قلبو بلقيس، و انتهاءا بموتو بلندن.
الله يرحمك يا نزار، و يحسن إليك، و لا تخاف، نحنا رح نضل ندافع عنك طول مافي بدمنا نقطة دم، و طول ما قلبنا بينبض حرية و إيمان و حب.
الحرية لنزار و سوريا.