[oliver68]

أخي دانيتو سمحلي سجل إعجابي فيك للمرة المليون، و ارفعلك قبعتي احتراما، كل يوم عم تثبتلي إنك إنسان عقلاني و متفهم، أنا معك 100% بكل شي قلتو، و مع تشيفادي لما حكا عن تأليه الفرد، أو تأليه فئة معينة، يعني معقول بلد بحالو النظام فيه جمهوري يتسمى "سوريا الأسد" ما آل الأسد مواطنين متلن متل كل السوريين، بعدين بحب علق على الصفات التلاتة اللي حكا عنها حسونة، هادا مو حل، هاي ممكن تكون حلول تنفيسية، يعني بجوز عالمدى القصير بتحل أزمة، بس لا تنسى إنها على المدى البعيد رح تخرب البلد، شو نسيان شو صار فينا، نسيان كيف حزب البعث بلش، بلش متل ما اقترحت نساوي هلأ، نسيان كيف وصل عالسلطة بانقلاب؟؟؟؟؟ و شفنا شو إجانا منن، بس الحل متل آل دانيتو، الحل إنو ندفش الخطوط الحمرا، و نضغط علين، صحي رح يكون في ناس بتضحي، و رح يدفعوا ناس ثمن محاولتن الحوار و دفش الخطوط، بس يا أخي الحرية لا تقدر بثمن، أما السرية و الطعن من الظهر، هادا مو أسلوب، و أنا مستحيل أيد هيك فكرة، لأن رح ترجعنا لمطرح ما كنا، بس بإيد دكتاتور تاني، يعني من تحت الدلف لتحت المزراب، الحل هوي بالنقاش و الحوار و الضغط و عدم اليأس و الاستسلام.
بعدين ما بدنا لا يمين و لا يسار و لا وسط و لا شرق و لا غرب و لا حزب و لا جبهةو لا إسلامي ولا مسيحي و لا ملحد و لا شيوعي ولا رأسمالي و لا شي، يا أخي ما بدنا اتجاهات، بدنا الحرية و بس، بدنا كل واحد يعيش بحريتو ضمن نظام بيضمن حقوق الكل، و بيسمح بالنقد و التطوير و إبداء الرأي.
سلام لكل الأحرار.