[marioma alghzayala]

هاي شباب كيفكن ..والله ما عرفت وين بدي اشلف كلمات هاي الهوارة ...
هيي سياسية .. بس قلت بحطا بقسم الاغاني والكلمات .. والمشرف بالاخير بشوف وين مكانا الصح . .. وسوري اذا المحل غلط

عالهوارة الهوارة *** الدنيا خفة وشطارة
احجزلي عا عاصمة النور *** كرسي بأول طيارة

الداعي مْواطن تحت الخط ** باكل فضلات زبالة

ولساني عشيتو لقَط *** ولبسي كلو من البالة

ولا عندي مينا ولا شط *** ولا في يختين قبالي

وراضي إبقى عا هالخط *** وبتشرفني هالحالة

ولا خون بلادي وينحط *** اسمي رمز الندالة

ويطلع خوان ومنحط *** الكان بوِجْه السحارة



بدي سافر عا باريس *** حتى إكذب عاكيفي

وتا بلش بيض وتفقيس *** وإكشف للعالم زيفي

وتا أعمل فارس عتريس *** وحارب طاحونة بسيفي

بعد اللي عبيت الكيس *** من مواسم شتوي وصيفي

عندي عتبة أوناسيس *** بتسوى بلادي وجوارا



عالهوارة اعطيني الشام *** عندي نغمة دولية

صرلي سبع تمان تيام *** عايش أزمة نفسية

مش قادر اصحى ولا نام *** كرهت تيابي اللي عليي

ما فاد حبوب وبرشام *** ومخزون الفرمشية

ولا خفف عني الآلام *** الحفلات الترفيهية

ولما تفاجأت بخدام *** عم يحكي عالعبرية

جتني الضحكة وما بنلام *** وراح الهم اللي فيي

مضحّكجي وعادل إمام *** ما بيسوى قبالو بارة


ولمن فتنا عا بيروت *** خبرني إنت وينك

نحنا نظلم إنت تفوت *** وتخبي الناس بعينك

نحنا كنا نهد بيوت *** الناس وإنت يا حينك

تطعمهم راحة وبسكوت *** من عنجر للمنارة



سورية دخلت لبنان *** وأنهت حربو الأهلية

وخسرنا أحلى الشبان *** ومنهم بالجملة خيي

وخدام ولادو الشجعان *** جبلن تاني جنسية

وشغلهن في هالدكان *** بالأسواق الدولية

شي بياع وشي دفان *** نفايات تسم المية

وتلوث جو الأوطان *** باشعاعات الذرية

وما بيهم السرطان *** ياكل شب وختيارة



يا خاين فتح عينيك *** عم تنطح صخرة صوان

واللي قالك تحكي هيك *** متلك جحش ومش فهمان

يعني بكذباتك يا بيك *** بترجع ريس للأوطان

وحق الرب كتير عليك *** شرطي بجنب الإشارة



وآخر دربك واضح صار *** بدك تفطس بالغربة

وما بتقدر ترجع عالدار *** إلا وراسك عالحربي

وبتضلك خادم غدار *** ترضي مولاك الغربي

وأذناب الغرب وشوكتار*** متل الهم العا قلبي

سايرهن وارقص عالزار*** اقلبلك كل ساعة قلبة

عيب الشوم وخزي وعار ***ومتبري منك شعبي

وحطك بنفس البسطار **** مع حاخام المختارة