[امرأة من ورق]

في تصرفات بيعملوها شوية ناس وهي مرفوضة اجتماعية واخلاقيا ودينيا يعني مرفوضة بكل المقاييس وقبيحة.... وبس نسمع فيها بنحس بقرف..... بس ياترى كل مين قام بتصرف من هالنوع هوي انسان قبيح

يعني الرشوة مثلا قبيحة كتير...... في ناس بتاخد الرشوة لانو طماعة وبدها تكسب مصاري وتعمر قصور وتخزن بالبنوك..... هدول بدون شك ناس قبيحين..... بس في ناس عندها ولاد بدها تاكل وبدها تدرس والراتب يمكن مابيكفي مصاريف الحياة لاكتر من اسبوعين وبعدين بيقعدو اسبوعين بالشهر بلا ولا شي..... هلأ حتى بهالحالة الرشوة لسه قبيحة بس فينا نسمي الشخص اللي اخدها بهيك حالة انسان قبيح؟؟؟؟

القتل قبيح وجريمة يمكن من اكبر الجرائم...... بس اذا حدا قتل دفاعا عن النفس يعني كان بموقف ياقاتل يامقتول وقتل كمان بيكون قبيح شي؟؟ او اللي بيكون بحالة حرب وبيقتل عدو لبلدو هاد قاتل بس بطل

برأيي انو دايما في تصرفات بنسمعها وبنحكم على اللي عملها بقسوة بدون مانحاول نفهم شو ورا نفسية هالانسان..... يمكن لو نحاول نفهمو رح نحس انو نحنا مو احسن منو ابدا...... بس يمكن ظروفنا احسن من ظروفو..... وماحدا بيعرف لو كنا بمحلو شو كنا عملنا