أخوية - عرض مشاركة واحدة

**krimbow** · 30/05/2006

اقتباس:

كاتب النص الأصلي : Danito

100 مرحبا again & again
هلق الزواج المدني ما بيلغي الطائفية بحد ذاته بس وجوده مهم لتأكيد الحرية و هو أسفين بيندق بجدران الفصل العنصري
يعني بشوية تفكير منعرف أنو بالسماح بالزواج المدني ما رح انلاقي تاني يوم آلاف المسيحيين عم يتزوجوا آلاف المسلمين و لا غير هيك و الدليل أنو المشكلة موجودة عند أبناء الدين الواحد لا و الأنكا أنو ممكن الأهل يتقبلوا فكرة الزواج من ابن/ابنة ديانة تانية على أن يكونوا من نفس الدين بس من طائفة مختلفة..
هلق في كثير ناس كسرت هادا الحاجز بس الزواج غالبا بيعاني من الضغط الاجتماعي أو عدم نضوج وعي الزوجين (كلاهما أو أحدهما) و اللي غالبا بيحاول واحد منهم يسيطر و يفرض على الثاني أو على الأولاد بيئته أو ديانته.. و هون مشكلة ثانية

الملخص الزواج المدني مهم لأنه بيتيح للي حابين يتجاوزوا الحواجز أنو يتجاوزوها و هادا الشي بيعطي التمازج و التآلف بعد أعمق و أهم في طريق الحد من الطائفية و آثارها السلبية

على راسي...
بس ما بينفع
توطئة:
1-
الزواج المدني اساسا بيقوم على فكرة المساواة بين الرجل و المرأة، و ليس على اساس إلغاء الطائفية...
هلأ بطريقو بيلغي الطائفية بين المتزوجين مدنيا كتحصيل حاصل يعني
المشكلة وين ؟؟؟
المشكلة انو ببلادنا في شرع مطبق على الاغلبية العظمى انو بيحقلهم يتجوزوا اربعة.. و الزواج المدني ما بيحقق هالمعادلة
هلأ تعا الغي هالامتياز بمجمتمع متفوق ذكوريا و مسحوق انثويا متل مجتمعاتنا ... بتقوم ثورة

2-
الطائفية الموجودة ببلادنا حولت مجتمعاتنا إلى كانتونات منغلقة، كل وحدة منها الها ثقافتها الخاصة و بيئتها الخاصة
حتى هدول "المختلطين طائفيا" تحولوا لكانتون خاص مستقل بذاتو الو ثقافتو و بيئتو الخاصين
و أي تعامل بين هالكانتونات ... بيتطلب نوع من التمثيل .. او فلنقل... بيتطلب انو يتم ضمن اطر و بروتوكولات ديبلوماسية .. تشبه تلك السائدة بالعلاقات الدولية

اساسا...
المشكلة يللي عم ندور على حلها هيي الطائفية، كيف ما بدنا نحل هالمشكلة، بدنا نصطدم بتشريعات الهية مقدسة مستندة عليها الطوائف

بناءا على ما سبق
كل مطالبتي هيي انو نلاقي موطئ قدم... تتفق عليه جميع الطوائف ببلادنا، بحيث ما نمس "مبدئيا" بالتشريعات الالهية، او على الاقل ... نمس هالتشريعات بالحد الادنى و المقبول بحكم اختلاف التفاسير او ما شابه

برجع و بكرر ... يللي عم طالب فيه هوي "اضعف الايمان" ... من باب انو لسا في امل

ملحوظة:
لكل قاعدة استثناء، لكنه (اي الاستثناء) لا يلغي القاعدة
فلا حدا يجي يقللي امي كيت و ابي كيت
او هي عندك بسام كوسا مسلم و معمد ولادو...