[krimbow]

مرحبا

ما بعرف ليش البعض عصب زيادة عن اللزوم ... من ايمت كننا نتناقش بهالطريقة ؟؟؟

يظهر انو ما كان كتير واضح الرد تبعي

اولا
لا و لم و لما اشير في ردي او في غيرو انو الحجي ميشيل كيلو هوي سبب النعرات الطائفية بالبلد، بالعكس تماما وضحت بردي انو انا مع نظرتو و ما انكرت الطائفية الموجودة

بس هاد الشي ما بيعني على الاطلاق انو الحجي ميشيل كيلو ما كان عم يمسح جوخ للسنة على حساب العلوية

و هاد الشي مزعج حقا
ازا ميشيل كيلو، الواعي و المثقف و المحترم و صاحب السجل النضالي الكبير ... عم يحكي بهالطريقة و عم يفرق بهالاسلوب المتجني و الاستفزازي بين السوريين ... فعلا محير بمين ممكن نوثق من هلأ و طالع

تانيا:
ممكن حدا يفهمني من وين اخترعتولي قصة تاريخ التعايش السلمي ؟؟؟؟
انو شو بتريدوا كب التاريخ (او ما وصلنا منو بدون تحريف) و اضحك على حالي ؟؟؟
نسيتوا مجازر السريان و الاشوريين و الارمن ؟؟؟
نسيتوا مجازر جبل لبنان ؟؟؟
نسيتوا كيف "استولوا" ع المسجد الاموي ؟؟؟؟
لما تجي ع الشام انزيل ع ضيع القلمون و هنيك بيخبروك عن التمن الباهظ يللي دفعوه من دمهم و مالهم لحتى يبقوا على دينهم ايام العثمنلي
و بعدها يا ريت تزور جبال "العلويين" لحتى يخبروك لأي درجة من الانعزال اضطروا انو يتقوقعوا فيها لحتى يهربوا من البطش و القتل باسم الدين الحنيف

سألت حالك شي مرة ليش 90% من المهاجرين بالاميركيتين قبل سنة 1920 من المسيحيين و الدروز و العلويين ؟؟؟ هربا من البطش و القتل باسم الدين الحنيف

بقا كرمال الله ... ايا تعايش سلمي و ايا لحمة وطنية ؟؟؟؟

ما عم دافع عن النظام ... فهوي سيئ متلو متل غيرو بموضوع التعايش السلمي، لكن هاد ما بيعني انو غيرو كان احسن منو

بيجوز .. بايام الانتداب الفرنسي و ما اعقبها من سنوات تعد على اصابع اليد الواحدة ... صار شوية تعايش سلمي، بس لا قبلها و لا بعدها كان في هيك شي

بتعرف شو السبب ؟؟؟ السبب انو ايام الانتداب و ما تلاها من سنوات ... كان الحكم علماني، لا سني و لا علوي و لا شيعي و لا بلوطي
كان الحاكم عم يدور فعلا على مصلحة سوريا
اما اليوم .. و ما قبل هديك الايام، صار الحاكم آخر همو مصلحة سوريا
صار همو مصر، او همو العروبة، او الاسلام، او عيلتو، او طايفتو او دينو .. المهم انو مو سوريا هيي همو

روق ياس
هاد هوي واقعنا و لهالسبب رح تبقى اسرائيل و غيرها لالا