مرحبا syrian prince
كيفك نشالله تمام
هلق عادة في طريقتين من طرح الاسئلة بهيك مواضيع حسب نقاشاتي السابقة الكتيرة مع بعض الاخوة المسلمين
نوع هو عبارة عن أخذ المعرفة و فضول و اسئلة حول ماهية الايمان المسيحي
و نوع اخر هو اكثر منه استجواب و لف و دوران و تعليقات جانبية... هادا اكيد ما بيعطي نتيجة
الكلام يلي رح قولو هو بس رد على سؤالك و ليس اي محاولة لاقناعك باي افكار جديدة... و انا ع فكرة يعني ابعد ما يكون عن العلوم اللاهوتية هههه يعني بس عم جاوبك من معلومات شخصية و اكيد رح يجي من بعدي ناس تضيف كلام
بقى يا سيدي نحنا بالدين المسيحي منؤمن بشيء اسمو محبة الله المطلقة للبشر
الله عطاه الجنة لادم.. بس ادم متل ما منعرف بالكتب السماوية... ارتكب الخطيئة البشرية الكبيرة و عصى اوامر الله... و من هيك الله طردو من الجنة
و من بعدها كل ابناء ادم ورثوا عنه هاي الخطيئة الاصلية... و الانسان انغمس بالخطيئة بعد ما كان عايش بالجنة بسلام
بعدي الله نزّل شريعة موسى على البشر... بس شريعة موسى غير كافية ابدا للخلاص... لانها ببساطة مستحيلة التطبيق
بتقلك شريعة موسى لا تسرق لا تكذب لا تشهد شهادة زور , ما تطلع على جارتك و بقرة جارك و حمار جارك... الخ
يعني هل الكلام مافي انسان بيقدر يحافظ عليه بدون ما يغلط
يعني كانت شريعة موسى متل لتورجي الناس اديش هني خطأة.. و أديش هني بعاد عن الله يلي هوي الكمال
رح إسألك كم سؤال
انت شي مرة كذبت بحياتك؟
شي مرة سرقت بحياتك؟ (و لو سرقت بيضة!)
شي مرة حلفت باسم الله كذب او غشيت.. الخ ؟
انا بعتقد انك رح تجاوب بالايجاب على كل هل اسئلة
انا شخصيا جوابي نعم على الجميع
يعني انا واحد كذاب و حرامي و بيحلف باسم الله بالكذب و غشاش و الله اعلم شو كمان
طيب انا بأي وجه بكرا بدي قابل الله فوق بالسما؟؟؟
معناتا لازم يكون في شفيع... ليحمل كل هل خطايا البشرية
شفيع يحمل ذنب البشرية و اخطاء البشرية من يوم ادم و حوا
من هون كانت فكرة الفداء بالسميحية لغفران الخطايا.. و بما انو الحمل تقيل كتير... اتطلب هي شيء فادي عظيم
هل فادي نحنا منؤمن انو كان كلمة الله المتجسدة... يلي هوي يسوع المسيح
نحنا بالانجيل بتمر علينا كلمات متل كلمة الله و روح الله... كلمة الله المتجسدة هو يسوع المسيح الذي كان مع الله منذ الازل حسب مطلع انجيل يوحنا
في البدء كان الكلمة و الكلمة كان عند الله
و كان الكلمة الله
هو في البدء كان عند الله
...
..
...
و الكلمة صار جسدا و عاش بيننا و رأينا مجده
و المسيح ايضا يعلن عن نفسه في الانجيل و يقول: انا و الاب واحد
كلمة الله هي جزء من الله.. و روح الله هي ايضا جزء لا يتجزأ من الله. فالله عندنا واحد و لا يقبل التجزيئ
منرجع على موضوع يسوع المسيح المتجسد
نحنا منؤمن بالسيد المسيح الها كاملا و بشرا كاملا...
بس ليش المسيح بالذات هوي يلي تم اختياره من أجل الفداء؟
انا متل ما قلتلك الفداء كان بيتطلب شي اكبر من الملائكة... لانو الملائكة مانون بشر و ما بيحسوا بألم البشر... و كمان يكونوا اكبر من البشر... مشان يكونوا شفيع حقيقي قدام الله...
و نتيجة حب الله للبشر... رأى الله ان يتجسد الكلمة.. لتعلن عن نفسها للبشر... بصورة بشر
يعني اعلن الله عن نفسه للبشر من خلال التجسد الالهي.. يعني البشر رأوا الله من خلال كلمته المتجسدة التي هي يسوع المسيح
و كلمة الله و روح الله و الله هي كيان واحد لا يتجزأ مجددا
فتأتي البشارة المسيحية الاساسية عن حب الله لنا.. و تضحيته بابنه الوحيد لغسل خطايا البشرية... فاقتضى منا اذا ان نؤمن بالكلمة المتجسدة.. و نفتح لهل قلوبنا و نطبق وصاياها. و تأتي في الانجيل المقدس كالتالي
لأنه هكذا أحب الله العالم حتى بذل ابنه الوحيد لكي لا يهلك كل من يؤمن به بل تكون له الحياة الأبدية
تلك البشارة التي إن أتى القديس يوحنا على ذكرها يقول" الذي كان من البدء، الذي سمعناه الذي رأيناه بأعيننا، الذي شهدناه، ولمسته أيدينا... فان الحياة أظهرت وقد رأينا ونشهد ونخبركم بالحياة الأبدية التي كانت عند الآب وأظهرت لنا. والذي رأيناه وسمعناه نخبركم به.....وقد أبصرنا مجده."
ارجو ان يكون شرحي قد اعطاك فكرة مبدأية عن بعض جوانب الايمان المسيحي.. و انا لست بمختص في هكذا قضايا و أطلب من الاخوة في الموقع تصحيح اي خطا ورد في كلامي في حين لم انتبه
تحياتي
جو
ذكرى مرور عام على وفاة الأديب العالمي سيبيري ماسكوليه 1932 - 2008
|