كيف الشباب
الموضوع ضخم شوي بجوز ياخد وقت بالقراي بجوز لاء بجوز تلاقو مفشكل بس عادي عم اكتبو وحدة بالليل وبدون تحضير مسبق يعني في براسي افكار ورح حاول صيغا بطريقة مفهومة
الموضوع بكل بساطة هوي مقارنة بين سوريا وامريكا من ناحية المعيشة طبعا بما اني انا شفت التنتين
رجاء حار من الكل عدم الخروج عن الموضوع اي خروج او نقاشات داخل الموضوع رح اطلب من المشرف انو يحزفا ويزيد تنبيه بس على القليلة احتراما اني تعبت بكتابتا اتفقنا ؟ يا الله
تبدأ الطائرة بالهبوط تشعر بشعور رائع لا يوصف مع رعشة تنتاب جسدك كله وتبدأ بالتساؤل من سيكون في استقبالي في المطار ؟ هل سيعجبني الوضع ؟ هل سأتأقلم معه ؟ واسئلة غيرها وغيرها تدور براسك دون اجابة محددة
بتنزل من الطيارة يا معلم عم تجوح كلك سوا اي شو عشر ساعات قاعد بمقعد صغير وخصوصي اذا اجريك طوال (متل اجريي ) بتكمل معك وكمان اذا بتكون شنطة الايد معك تقيلة احليين
المهم بتنزل من الطيارة على المدرج بتفوت على المطار بتلاقي في كزا بوليس مان قاعدين وعم يشوفو جواز السفر لكل واحد
طيب هون وانتي بهالمرحلة هاي بيبلش يفرق عليك الوضع لما بتشوف العالم واقفة بانتظام وكل واحد بدورو ولما بيقرب لعند الشرطي بيعاملو الشرطي بكل احترام مع ابتسامة وضحكة ومزحة
حتى لو ما كنت بتفهم انكليزي بس المهم لما بتشوفو عم يضحك بينشرح قلبك وبتتذكر ايام الفحص الطبي للعسكرية بتتذكر كم بكس وكم رفسة وكم كف اكلت من هالعالم اللي جاي تعمل الفحص واللي بتطحش على الباب متل الدواب بتتذكر كم زنار وكم عصاي اكلت من الضابط اللي واقف على الباب وكم مزحة مزح معك وقلك رجاع يا حمار او يا دب وكم مرة تقل معك بالحكي
وبتقول وين كنا ووين صرنا ؟
بتخلص من الشرطة وبتقطع هون اذا كنت جاي هجرة (متل حكايتي ) بيستقبلك واحد وبياخدك على غرفة تانية بتقعد فيا بياخدو منك وراق الهجرة وانتي بتقعد بيصيحولك تعى وقع بتوقع وبترجع بتقعد وبعد شوي بيقلولك الله معك مشي الحال طبعا هون انتي بتتذكر وقت اللي طالعت جواز السفر ووراق السفر قديش ركضت بين الدوائر وبين المكاتب وقديش دفعت براني مشان تمشي امورك وبتقول وين كنا ووين صرنا ؟
طبعا بتخلص كل امورك وبتطلع من ساحة الانتظار بتلاقي هالعالم عم تستناك وبيبلش الحضن والبوس والحمد الله على السلامة بتصير بتكرها من كتر ما بتسمعا بتطلع من باب المطار وبتخش امريكا يا عيني طبعا اذا كان حظك حلو متل حظي انتي وطالع من باب المطار بتلاقي سيارة ليموزين احدث موديل طبعا انتي بحكم العادة عنا بسورية يللا بتمشي بدك تقطع الشارع بتلاقي حدا عم يصيح فيك لا تقطع بتخاف انو ليش لاء بيقلولك ليك وين هالاشارة كل شي وما صارت خضرا ما فيك تقطع بتلاقي كل هالعالم وقفت وقطعت وقت اللي صارت الاشارة خضرا
بتفوت على الباركينغ لوت parking lot وهنيك بتلاقي سيارة من احدث موديل لعمك او لبيك ناطرتك بتقول اوف كل هاي وبتطلع هاي سيارة عادية وما حدا بيلتكش فيا لانو وقت بتتوسع بشوارع اميركا بتشوف سيارات اشكال الوان يعني اروع سيارة بسورية واللي بتسطل العالم في الهوندا والميتزوبيشي وشو في اسا ما بعرف هدول اسخف سيارات هون طبعا بتتذكر انتي وبهالحالة ايام السرافيس وايام الشنططة من محل لمحل ليطلعلك مقعد بسرفيس يوصلك لنص طريقك وبتتذكر قديش بدك بسورية لتشتري سيارة بتقول وين كنا ووين صرنا ؟
طبعا يا معلم انتي طلعت بهالسيارة الحديثة وانفشت ومعرم هيك وشايف حالك بتطلع من الباركينغ لوت بتتفاجأ من سلاسة الطرقات انو كل شي مكتوب على الطريق وواضح والاعجب من هيك بتلاقي السيارات كلا ملتزمة بقواعد السير (ما عدا بعض الطنابر ) طبعا بتسال انو كيف كل هالعالم ملتزمة بيقولولك البوليس الو رهبة يعني اي مخالفة ولقطك البوليس اذا بتطير للسما بدك تاكل تكت من التلاتين دولار وبطلوع والتلاتين دولار مو متل التلاتين ليرة ما حدا مدور عليا التلاتين دولار كلمة الا وزنها طبعا هون انتي بتتذكر حالة الطرق عنا بسورية وبتتذكر الشوفيرية واكتر شي بتتذكرو الشرطة والخمس وعشرين اللي بتكون مجهزا قبل ما يصفرلك الشرطي وبتقول وين كنا ووين صرنا ؟
طبعا بتوصل على البيت وبترتحلك كم يوم وبتقضين استقبل وودع وهون بتبلش تحس بالسخن يا معلم
وقت بتحس كل العالم حواليك مهتمة بتجميع المصاري وبس وقت بتشوف انو ما في حياة اجتماعية الواحد المكانين الوحيدين اللي بيشوفن هني الشغل وبيتو وبيتو للنوم مو ليقعد مع اهلو وشغلو بيكون عم يفلح كل النهار مشان اخر الاسبوع ياخد تلاتمية دولار وباخر الشهر يصيرو الف وميتين ما بيقدو اجار بيت لحتى يقدو اكل وشرب وقتا بتتذكر بسورية كيف كان شغلك كلو 8 ساعات وترجع على بيتك معك كل النهار بتعمل اللي بدك يا عايش ملك زمانك حتى بدون سيارة وبدون شي بتقعد مع اهلك مع عيلتك بتسولفو بتتناقشو بتطلع مشوار مع رفقاتك بتركز كاسة متة وبتسلطن وقت بتحس انو كل كان صايرلك راح من ايدك وقتا بتقول وين كنا ووين صرنا ؟
طبعا هلأ السؤال الذي يطرح نفسو
هل انتي مستعد تعيش بس لتجمع مصاري مع حياة اجتماعية بسيطة ويمكن معدومة مع توفر جميع وسائل الرفاهية وجميع القوانين والانظمة اللي بتحميك وبتساعدك
ام مستعد تعيش حياة معتدلة نوعا ما مع الاستغناء عن حياة الرفاهية المتمثلة بالسيارة والانترنت
وتعيش مع مصاعب من شرطي المرور لركبة السرافيس والشنططة لكتير شغلات انتي ما بتحس انها مزبوطة بس المهم عايش مكيف بين اهلك ورفقاتك
شو بتقول هاي او هاي
سوري على التطويل
برجع باكد
رجاء حار من الكل عدم الخروج عن الموضوع اي خروج او نقاشات داخل الموضوع رح اطلب من المشرف انو يحزفا ويزيد تنبيه بس على القليلة احتراما اني تعبت بكتابتا اتفقنا ؟
سلامات
--------------------------------------------------------------------------------
|