[me2]

قصيده للدكتور اياد بديع قحوش

كل الدروب مسكره قدامنا
لا الدهر عم يرحم
ولا حكامنا
عيبي علينا
وعحضاره عمرها الوف السنين
و عأرض مهبط للسما و المرسلين
نكون احرار و بشر متساوين
بكل الدني الأّ بارض آمالنا وآلامنا
كل الدّروب مسكره قدامنا
لا الدّهر عم يرحم
ولا حكّامنا


************

حبّ الوطن متل الصلا منعلمو لولادنا
ومش حكر عأسيادنا
" ان كان عندن حب ل هالوطن"
حبّ الوطن قرباننا من دمنا و اجسادنا
وفينا نفرجي حبنا لبلادنا بكل الدني
و منقول عراس السنه كاس الوطن
و ما مننحني
لكن ما فينا نقول كاس بلادنا ببلادنا
منخاف يتشردق خمر احلامنا
كل الدّروب مسكره قدامنا
لا الدّهر عم يرحم
ولا حكّامنا


***********

مين الوطن..؟
انت و انا ..
و فلأح بالارض اعتنى
مين الوطن..؟
عامل بنى..
بيتي و بيتك و القصور
و مدرسه ابنك و ابني و الجسور
مين الوطن؟؟
ضهر انحنى
تاتستقيم دروبنا و قلوبنا
و بيدر جنى
وليش فينا نمتلك ...بأيّا حمى ..ارض و سما
و منعيش فيها مكرّمين
و منحس انّو بارضنا ما منمتلك
شويّه كرامه منحلما
ولا مننحمى من دياب اكلو حقوقنا شمال و يمين
و حتّى البيوت الطيّبه اللي منسكنا
منحسّّ انها مش لنا ...و مسودني اوقاتنا و أيامنا
كل الدّروب مسكره قدامنا
لا الدّهر عم يرحم
ولا حكّامنا


**********

خمر العروبه بينشرب بكاس المجد بالقصر
ولك زلغطي يا ام....تا يهل بليالي الطرب قوس النصر
قدّيش قدّم شعبنا من الدّم؟؟ صبح و عصر
غرقت الشام بدمنا و طافت مصر
لا القدس رجعو اهلها ...ولا النصر موعد واقترب
دمّ العرب شو رخيص بعيون العرب
و بتغصّ لو اكتبنا الحقيقه اقلامنا
كل الدّروب مسكره قدّامنا
لا الدّهر عم يرحم
ولا حكّامنا