[كهربجي]

كاتب النص الأصلي : krimbow

مرحبا

صار لازم نحكي عن شوية امور ما كان المفروض ينحكا فيها

اول شي:
علي العلي، ما دخلو بكل الموضوع، ما كان مع الشباب، كل ما هنالك انو مرة واحدة راح مع حسام و التقى بالشباب، و مالو علاقة لا من قريب و لا من بعيد بالتجمع او الاتصالات يللي صارت او اي نشاط قاموا فيه الشباب

تاني شي
حسام، علي، دياب، و حتى طارق
هدول خريجي المنبر الحر باخوية
مشبعين حرية و ديمقراطية صح..
بس كمان مشبعين بالحل السلمي، و نبذ الحل العسكري بكل اشكالو
ضد سياسات البعث، بس كمان ضد سياسات بوش و اميركا و اسرائيل، و بالمطلق

رأيهم كان دايما بحزب الاصلاح و التغيير تبع الغادري انو حزب خاين ما بيخدم مصلحة سوريا

يللي صار
انو ماهر هوي يللي اتصل بجماعة الغادري، و ماهر اطلع طارق على بيانات و اهداف حزب الاصلاح و التغيير (بغض النظر عن تبع مين و تمويلو من وين) و ازا بتقروا بيانات هالحزب على موقعو ع النت رح تلاحظوا انو بيكتبوا انو هنن مع التغيير السلمي و اللا عسكري
و بيكتبوا ببياناتهم انو هنن مع الحرية و الديمقراطية ... و ما بيذكروا الدبابة الاميركية، ...

لما تم عرض موضوع الغادري ع الشباب، رفضوه تماما
و ماهر و طارق الوحيدين يللي اتصلوا بالغادري و جماعتو

لما صار مؤتمر المعارضة ببروكسل، كان الاتفاق انو يطلع ماهر و طارق ع المؤتمر لحتى يمثلوا الشباب يللي سموا حالهم "شمس" (شباب من سوريا)
الشباب و بسبب شكهم بنوايا ماهر، رفضوا هالشي و قرروا انو يا بيطلعوا سوا، يا اما يللي بيطلع بيمثل حالو فقط

و اتفقوا انو بيطلع الكل، و الكل حضر بسبوراتو مشان الطلعة
قبل الطلعة بيوم ... طارق لغا كل شي و قرر انو ما يطلع مؤتمر المعارضة، و قطع علاقاتو مع الشباب و اكدلهم انو هوي منسحب و ما عاد الو علاقة بالشباب اكتر من علاقة صداقة

و هيك فرط كل شي و انتهى مشروع شمس نهائيا

الشباب اتصلوا بالغادري ع النت، تم هالشي
بس مو معقول يتحاسبوا على هالاساس، يعني الشباب ما اذنبوا، الشباب ما نفذوا اي شي

سيادة الرئيس السوري بحفل تأبين بابا الفاتيكان يوحنا بولس الثاني سلم على رئيس اسرائيل، هل هذا يعني انو تم عقد سلام ؟؟؟؟؟
هل هذا يعني انو خان الثوابت الوطنية ؟؟؟؟
بالتأكيد لأ

و كذلك الشباب
اتصلوا بالغادري، لكن ذلك ما بيعني اي نوع من انواع الخيانة
اولا المشروع فشل بارضو و بدون ما يتم اصدار حتى بيان تأسيسي
و حتى ما صار بأي اجتماع اكتمال للنصاب
و دايما كان في ضيوف او دخلاء (متل علي) على اجتماعاتهم
و انعقدت كل اجتماعاتهم بقهاوي عامة متل قهوة الروضة

عمليا الشباب ما عملوا شي
انتقلوا من حالة الحوار عبر الانترنت لحالة الحوار بالقهاوي

اما عن موضوع تلقي مساعدات و ما بعرف شو (المبلغ يللي انذكر هوي 150 الف دولار اميركي)

يعني عفوا بس الشباب منتوفين يا دوب يأمنوا حق باكيت الحمرا
انو لو قبضوا عشر (1/10) المبلغ المذكور ... كان بان هالشي عليهم

ما بدي اعمل محامي عن الشباب
بس تجمعهم كان ولدنة بولدنة
اهتموا بالسخافات و القشور (شعار، لقب، لوغو... الخ من الشكليات) و ما اهتموا بالاساسيات، يعني ما عملوا بيان تأسيسي، و ازا سألتوا كل واحد شو غاياتكم، كل واحد رح يعطيكم جواب شكل، ... ضوجة شباب هي هيي كل القصة

حاولوا انو يعملوا شي لهالوطن
شافوا انو التنظيم منطلق اساسي لأي نشاط بيفيد الوطن
فعملوا تجمعهم الزغير يللي مات قبل ما يولد

برأيي الشخصي، الشباب ما ممكن يكونوا خونة، كيف اصلا بيسمح اي شخص لنفسو انو يخونهم؟؟؟؟

ازا هدول الشباب خونة، شو منقول عن الشباب يللي عم يضيع عمرو بالسهر و الكابارهيات و الحشيش،
شو منقول عن الشباب يللي كل همو آخر موبايل و آخر قصة شعر و آخر كليب نزلتو نانسي و ازا حد رد على كليب "واوا" و اللا لسا ما حدا رد ؟؟؟؟؟

ازا هدول الشباب خونة، انا أولكم و انتوا كلكم ورايي، خونة لدرجة لسا اللغة العربية بكل غزارتها ما لقتلنا صفة قبيحة ننوصف فيها

معناها فكرتي وصلت... ما كان بدّي احكي بالأسماء
شكراً
كتييير