[Hus]

ونذكركم بقول الشيطان لخليل بمسرحية رحلة شيطانية ولكن هذا لمن يفهم ماوراء الكلام فقط
ماحدا بيراهن على الحصان الخسران حتى لو كان اصيل بس الكل براهن على الحصان الربحان حتى لو كان ........
مع تحيات فاوست

عفوا انا ما حضران هاي المسرحية ، وما بعرف شو بديل النقاط ، وما فهمت او خليني كون صريح ما بحب افهم انو الحصان الخسران هوي فلان من الناس او الطائفة كذا !
بعدين مين هذا فاوست ؟؟

وارجو للمرة الأخيرة أن نقول يكفي مسخرة بنيتم بالبداية المنتدى على انه مسيحي فليس من ذنب الأعضاء المسيحيين فيه أن تلغوا صفة المسيحية عنه وتستبدلوها بهذه التصرفات بالوهابية

ما صح هال الحكي ، ما صح هال الحكي ، ما صح هال الحكي ..
بدي استأذنك تجبلي مرة واحدة فقط قلت فيها انا _او اي اداري_ ان المنتدى مسيحي!

(.. بسنة اولى اول ما رحت القاهرة ، كان السؤوال اليومي الي بنسئلو _وعلى اعتبار في تباين طائفي كبير هونيك _هوي : انت مسيحي او مسلم ، وكان دائما جوابي : انا سوري!!)

يا عزيز ، رجاء تتفهم انو في اختلاف _وليس خلاف_ بيناتنا ، انا بفهم الدين بطريقة غير الي انت بتفهما ، معلش انا بحترم فهمك للدين وفهم فلان من الناس وفهم غيرو ، فرجاء قدر اني انا بفهم الدين بغير طريقة ،
فرجائا تعتقني من موضيع توصيف أخوية كمنتدى مسيحي ، اخوية منتدى سوري . (نقطةعلى السطر) وانا نفسي ماني مسيحي!! _ولا مسلم ولا ملحد ولا غيرو_ ، انا سوري سوري سوري
و من باب اني برفض ينلزق عليي ماركة متل البسكوت !!
(البسكوتي بتتعلب وقبل ما تطلع من المعمل بينطج عليها ماركة بتصير ماركتها ، وبرفض كون بني قادم طلع من بطن امو قام انطج عليي ماركة انو هذا مسلم او هذا مسيحي او هذا بطيخ )

بس ما بخفيك ولا بخفي أي كان ، ان بفضل _جدا_ نمو المنتدى وزيادة الأعضاء بيه من المسيحيين (والملحدين والادينيين و ..)، وبميل لهذا مش من باب طائفي اطلاقا وانما من باب ان المسيحيين ولا الادينيين ولا الملحدين بشكل عام عندهم قدرة على تقبل الآخر اكثر من غيرهم .. وعندهم قدرة مكتسبة و موروثة ، في فصل الدين عن الدولة في فصل الدين عن العلم في فصل الدين عن نقاش العقل في فصل الدين عن ما ليس ديني وهيك .. لهيك بشكل عام برتاح لمن يزداد عدد هال النوع من الأعضاء بالمنتدى ، وبقلق لمن بيزداد عدد المتشددين (مسيحيين او مسلمين او شو ماكانو)

تصوري لأخوية كإنعكاس ايجابي بنّاء للواقع .. يعني صورة محسنة من الواقع او صورة مستقبلة للواقع ، ومجتمعنا السوري الفسيفسائي فيه من كل الأطياف والألوان ، وهذا عامل اثراء مهم جدا ، وبفضل حافظ عليه -التنوع- بأخوية ، و من مصلحة الجميع التعايش مع الواقع بواقعية ، يعني مافينا نهمل ونتجاهل المسلمين بالنت او بمنتدى بالنت لانو هني بالشارع وبحياتنا وبمجتمعنا وبكل تفاصيل حايتنا موجودين ، ومافينا نتجاهل المسيحي (موجهة للمجتمع المسلم) بالنت بمنتدى ما او موقع معين لانو المسيحية موجودين على الأرض و بكل تفاصيل الحياة وهيك ..

بالتالي بالتالي ، ليكون منتدى بنائه سليم ، صحّي ، لا بد من وجود جميع الأطياف والتيارات بيه ، ليعيشو باللنت بطريقة متقاربة والواقع ،
فشو الفائدة اذا كان منتدى كل الي فيه اخوان مسلمين ، ولمن ينزلو على الشارع يلاقو الشيعي والعلوي والمسيحي والملحد ...... شو الفائدة اذا شو ما حكيت اتلاقي كل الناس عم بتصفق وعم بتعيد وتعلك نفس الأفكار ونفس الكلام ، التنوع شيئ اساسي للإغناء ..