[WHITESNAKE]

لما بتمشي بالشارع وبتلاقي بني آدم (مع وقف التنفيذ) عم ينطوز نطوزة من فوق الاسوار مع انو الجسر او النفق يا دوب عشر متار قدامو، بتعرف انك بالشام.

لما بتلاقي شرطي المرور ماشي على الموتور بعكس اتجاه السير مشان ما يعذب حالو ويلف من الشارع التاني (مع انو المازوت مو هو اللي دافع حقو)، بتعرف اننا عم نحكي عن شرطة الشام.

لما بتركب بباص النقل الداخلي وبتلاقيه بيوسع (او بيجبروا إنو يوسع) لحد الـ 400 زلمة جلوساً ووقوفاً وتفعيساً (حتى أحيانا بيخطرلك تدق لموسوعة جينيس تسجلو أو لجمعية حفظ حقوق الباصات لانو لو هالباص كان الو روح كانت انتقلت إلى رحمته تعالى من زمان)، بتعرف انك بالشام.

لما بتلاقي المحارم والكياس وعلب الكولا وغيرو عم بينلحش لحش من قلب السيارات على الشارع مع انو الشارع يا دوب الحكومة منضفتو، بتعرف انك بالشام.

لما بتكون ماشي مروق الصبح والعصافير عم تزقزق من حواليك وفجأة بتلاقي واحد قدامك بالشارع عم يتنخع بنص الطريق (خع تفوووووووو)، بتعرف انك بالشام.

لما الحكومة (وما رح بالغ إذا قلت) موظفة زبالين بعدد نجوك السما (فينا نقول زبال لكل مواطن) شغالين على مدى 24 ساعة ومع هيك بتلاقي الشوارع وسخة والعالم عم ترمي كياس الزبالة شي من عالاسطحة وشي من الشبابيك وشي ما بتعرف من وين جاية، بتعرف انك بالشام.

لما بتلاقي زحمة عالسرافيس ولما يا دوب يعني يا دوب بتدحش حالك انت وكم زلمة بشي سرفيس وبعد شي حارة ولا حارتين واحد طلع معك من دقيقتين بقلو للسرفيس "عمهلك نزلنا هون" مع انو كان اسرعلوا يمشي من هالوقفة وهالخناق بس الافندي مو جاية على مزاجو يمشيلو شي شويتين مشان هيك اخد سرفيس (وبكون وقتها طبعا اخد مطرح شي واحد متاخر على وظيفتو ولا شي طالب على جامعتو) ، بتعرف انك واقف بمواقف الشام.

لما سواق السرفيس بيوقف وين ما بدو وايمتى ما بدو مع انو في مواقف رسمية بكل شارع، ، بتعرف انك بالشام.

لما بتطلع الصبح وبأمان الله يعني عم تحاول تبلش نهارك بنفس مفتوحة بتلاقي اللي قاعد جمبك ريحة تمو بتخنق من الدخان ومع هيك عم بحدث ويضحك "ملء فيه" أو بكون اكلو شي صحن فول من عالصبح ومو نسيان يفقس براسو شي راس بصل ، بتعرف انك راكب بباصات بالشام.

لما بتكون عم تعيّش عيلة طويلة عريضة وفينا نقول عنك موظف عادي (ما رح نقول مثالي) بشي شركة خاصة، وفجأة بتلاقي حالك بالشارع لان مديرك سمع حكي عنك ما عجبو كتير، بتعرف انك بالشام.

لما دكتور الجامعة بياخد راتب قد راتب الخريج العادي، وخريج الجامعة بياخد قد راتب اللي معو باكالوريا، واللي معو بكالوريا مو ملاقي شغل، واللي معو تاسع أبوه فاتحلو شركة خاصة، بتعرف انك بالشام.

لما بتكون معك شهادة معهد ومع هيك عندك خبرة الف مهندس ومديرك بيعرف هالشي ومع هيك راتبك يا دوب عم بكفيك اللقمة لانو متل ما عم بقلك المعلك (عفواً المعلم) البلد هيك وشهادة المعهد مو قد المقام، بتعرف انك خريج الشام.

لما بتكون رايح الصبح على الوظيفة (مو عامل شي) ومع هيك حاطط ايدك على قلبك وماسك وردة عم تنتف وراقها وعم تقول: يا اليوم بتقلع يا أما ما بتقلع - يا اليوم بتقلع يا أما ما بتقلع ، بتعرف انك متوظف بالشام.

لما بيقطعولك خط التلفون لانك نسيت تدفع الفاتورة وما إجاك إنذار متل باقي البلدان تبع العالم والناس (مو تبعنا يعني) وبتروح و وشك أصفر على مركز البريد لتدفعها وانت عم تقول لحالك: "ولي على قامتي أكيد طلعت كتير عالية لحتى قطعولي ياه للخط) بتقوم بتلاقي فاتورتك (80 ل.س) يعني قيمة الاشتراك لا غير، بتعرف انك بالشام.

لما الكهربا بتقطع وبتتصل على شركة الكهربا وبقولو ما في مشكلة وشوي بترجع ومع هيك بتضلك يومين تلاتة بدون لا كهربا ولا غيرو وعلى أثرها بتبظلها مدامتك (يعني مرتك) شي ولد عاشر لانو ما كان فيكن تتسلوا بالفرجة على التلفزيون، بتعرف انك عايش بالشام.

لما بتروح عالجامع لتصلي وقلبك كلو نور وإيمان وبيغمى عليك بالركعة التانية لانو اللي قدامك مو غاسل جراباتو من شي شهرين تلاتة، بتعرف انك عم بتصلي مع أحد مصليين الشام.

لك لما بتشغل التلفزيون وبتسمع أخبار صايرة عندك بالبلد ولما بتقلب المحطة على قناتك الفضائية (على اساس بدك تتابع الاخبار من قلب الحدث) وبتلاقي انو القناة ولا كإنو عندها خبر بالموضوع، ، بتعرف إنو عم نحكي عن قناة سورية الفضائية بالشام.

لما بيجبروك تصف سيارتك بمرآب خصوصي مع إنو الشارع طويل عريض برة وما عليه عجقة ولاممنوع الصف فيه ولا حتى محطوط لافتة ممنوع الوقوف، بس لإنو صاحب الكراج عاطي الشرطي قرشين وقايلو يشحط كل سيارة رح ترفض تصف عندو، وبتقول لحالك ماشي الحال الله بعيننا رح نروح للمرآب وبتلاقي انو اللي رح تدفعوا هنيك ببساوي راتب شي 6 موظفين بالشهر وبقولولك عادي هيك الأسعار، بتعرف انك بالشام.