[أبو أسامة]

مرحبا صبايا مرحبا شباب

بهالأيام كثر الحكي عن نزول مستوى المنتدى و أنو ما عاد بالمستوى اللي كان عليه و أنو المواضيع اللي هلأ كلها مكررة أو بايخة و لهالشي أسباب
فبعد بحث و دراسة لقيت سبب من هالأسباب بظنو سبب مهم بهالمشكلة ألا و هو غياب النقد البنّاء يعني :
اذا كان الموضوع بايخ بس فيه كم واحد عجبهن الموضوع بيكتبو رائع و شكرا و مدري ايش من المدح بس اللي ما عجبهن الموضوع و لقوه بايخ بيدخلو بيقروا الموضوع ما بيعجبهن بيطلعو دون أي تعليق مع أنو كان المفروض عليهن يقدمو نقدهم لكاتب الموضوع طبعا بشكل غير جارح لحتى يعرف الكاتب وين الثغرات اللي عندو و يتلافها و هيك ما بيعود يمكن بيكتب مواضيع بايخة أما لو كانت الردود هي فقط ردود المدح و الثناء فهيك رح يتشجع الكاتب لكتابة موضوعين و تلاتة ومية بنفس الطريقة.
بظن أنو الفكرة وصلت و ملخصها أنو النقد البنّاء بيرفع من مستوى المنتدى و لازم ماحدا عندو نقد أنو يتوانى عن طرحه أبدا ليردع الكتابات البايخة و يشجع الكتابات اللي بتستحق

آسف لأني طولت عليكن بس فكرة أخيرة هي أنو اللي بدو يحط موضوع فقط لجمع الردود لا أكثر بتمنى أنو يعرف أنو هالموضوع ما رح يزيد من احترام القراء لإلو بس رح يزيد عدد المشاركات عالفاضي

و شكرا كتير و آسف عالإطالة