[krimbow]

مرحبا شبيبة

معلش خلونا نرتب افكارنا شوي لحتى نقدر نستفيد و نفيد و مشان ما تصير الشغلة شوربا

جملة الموضوع بيتلخص بالنقط التالية...

• تحيز الادارة لمصلحة المسيحيين
• تحيز الادارة ضد الاسلام بصورة عامة و الاعضاء المسلمين بصورة خاصة
• تحيز الادارة ضد الخليجيين بشكل عام و السعوديين بشكل خاص
• الادارة المسيحية للمنتدى
• سياسة الخيار و الفقوس بفرض العقوبات على الاعضاء

بس قبل ما ناقش هالنقط بدي حط تزكير ببعض سياسات الاخوية

مع انو طلع ع لساني شعر انا و عم احكي هالنقطة بس رح عيدها
اخوية موقع سوري سوري سوري و بامتيازات
باعتبار انو نحنا مش شوفينيين او فاشيين فمنقبل اعضاء غير سوريين
لما يكونوا على خلق و قادرين على التواصل الايجابي مع باقي الاعضاء (متل السنيورة مونيا) بيوصلوا لدرجة الاشراف بقلب اخوية
و لما يكون طبعهم نزق و داخلين لافتعال المشاكل و المشاغبات مع باقي الاعضاء بيوصلوا لدرجة ايقاف العضوية و يمكن الطرد النهائي.

اخوية منتدى بدون توجه ديني
ما بقصد بهالكلام انو اخوية لادينية فحسب، بل اقصد انو ما عننا اي استعداد ضمن سياسة المنتدى انو نلتزم باحترام اي عقيدة دينية
مو لأنو نحنا معاديين للاديان ... لا اطلاقا ... بس لأنو نحنا ما عننا اي استعداد انو نقوم بدراسة هالعقائد ... و بالتالي ما عنا اي معرفة بمقدسات اي عقيدة دينية، و اي معرفة بهالمقدسات منعتبرها اجتهاد شخصي غير ملزم لادارة الموقع و بالتالي لسياستو

و شغلة تالتة اشار الها ياس ... و هيي انو غالبية الاعضاء مسيحيين ... بس هاد ما بيتداخل مع سياسة ادارة الموقع

رابع شي: منبر اخوية الحر بيسمح باكتر الافكار و الآراء تطرفا انها تكون موجودة بين طياتو

تحيز الادارة لمصلحة المسيحيين
هاد الاتهام مرفوض جملة و تفصيلا، متل ما في نكات لا دينية عن المسلمين و الاسلام في نكات لا دينية عن المسيحيين و المسيحية
متل ما بيتم معاملة سابا و جورج و طنوس و ماريا عم يتم معاملة محمد و علي و حسين و خديجة
حسون عدادو رح ينفجر ع شوي و ساكت ... بينما وايت سنيك قام القيامة مشان خمسة بالمية

و لما منتعامل مع نظام العقوبات باخوية منتعامل معو من دون معرفة سابقة بدين العضو
يعني نحنا ما منضرب بالمندل لنعرف شو دين الزلمة يللي بدنا نعاقبو
ازا هوي ما صرح بهالشي بشكل مباشر او غير مباشر ... نحنا كادارة و اشراف ما منقدر نعرف دين العضو

مع انو ياس عمرو بالمنتدى من عمر المنتدى ... بس انا لليوم ما بعرف شو هوي دينو ... و صدقا ما بيهمني اعرف
مع انو قامت بيني و بين مينيمي جولات من الحروب و المشاكل ... لليوم ما بعرف شو هوي دينو
مع انو متحاور مع حسون باكتر من الف موضوع و قابلتو شخصي بحمص... لليوم ما بعرف شو هوي دينو
لو ما كان ابو النسيم و طارق و سيزار من اعز اصدقائي ... ما كنت عرفت شو هوي دينهم (يللي ع البسبور و الحقيقي)

و صدقا ما بيهمني اعرف لا انا و لا ادارة الموقع كلها
و حتى لو عرفنا ... هالشي ما بيأثر على اي قرار منتخذو

تحيز الادارة ضد الاسلام و المسلمين
يللي بدو يعمللو ابريق متة او كاسة شاي و ناطر ليخلص قراية يقوم يساويهم لأنو رح اشرح وجهة نظر الادارة من هالنقطة باستفاضة

المسيحيين قدروا على مر العصور من انهم يتخلصوا من سلطة الكنيسة الزمنية بكل اشكالها، بدءا بالتكفير و الغفران مع قيام ثورة مارتن لوثر البروتستانتية، و انتهاءا بسحب منهم سيطرتهم على الحياة الزوجية من خلال تنظيم الموضوع بالقانون المدني باغلب المجتمعات المسيحية، مرورا بكف يدهم عن شؤون الصحة و الطب... و هالشي كلو لغى من المسيحية تأثيراتها الدنيوية و تحولت لديانة روحية بحتة

بينما المسلمين عقيدتهم بتمس الشؤون الدنيوية بشكل مباشر، بدءا بعظائم الامور متل انظمة الحكم و اساليب التعامل بين الدول، و انتهاءا بصغائر الامور متل نمط الاكل المسموح و الممنوع، و كيفية تناول الطعام او النوم او الدخول على الحمام المقبولين، مرورا بانماط الحياة اليومية متل الحجاب و الصيام و العلاقات التجارية المسموحة و المرفوضة، و ايضا بانماط الحياة المصيرية متل الزواج و الميراث ...

هلأ...
بالوقت يللي عم يتوجه فيه المسيحيين لالغاء بقايا السلطة الزمنية للكنيسة و رجال دينهم، عم يتمسك المسلمين بتدخل الدين و رجالو بكل شؤون حياتهم و عم يدافعوا عن هالشي بشراسة

و متل ما اشرت اعلاه سياسة المنبر الحر بتقبل اكتر الافكار و الاراء تطرفا هي واحد ... و تنين ... سياسة الادارة ما عندها استعداد للدفاع عن اي نوع من انواع المقدسات الدينية، من باب جهلها بالشيء، و الانكى انو ادارة اخوية غير مستعدة لمعرفة هي المقدسات ... و ان تم هالشي فهو اجتهاد شخصي ما بيمت للادارة بأي صلة

شو تطبيق هالحكي على ارض الواقع بقلب المنبر ؟؟؟؟
باعتبار انو الاتهام الموجه كانت ادلتو هوي موضوعي الحجاب السياسي و تأجيل الحج
خلينا نشوف المشاركات و قبل خلينا نتصور التالي و رح نحكي كمثال عن موضوع تأجيل الحج
هلأ ازا اجا مينيمي بدو يطرح فكرة تأجيل الحج بشكل علني باحد المنتديات
ازا المنتدى اسلامي رح ينحذف الموضوع و صاحبو كلو من الداتابيز
ازا المنتدى مسيحي رح يتثبت الموضوع و يطبلولوه و يزمرولو و يحذفوا المناهضين لهيك فكرة
بينما بالمنبر تم طرح الموضوع متلو متل اي موضوع تاني و تم مناقشتو و اسمعنا كل الأراء، و انا من الناس يللي كونت فكرة بعد قراءتي لكل الآراء بعدم جدوى تأجيل الحج مشان توفير المصاريف
ممكن حدا يفهمني شلون طلع معكم انو نحنا متحيزين ؟؟؟؟

تحيز الادارة ضد الخليجيين
قلت و برجع بعيد انو ادارة اخوية بترحب بكل البشر ... بس بتميز السوري بشكل كبير و واضح عن غيرو ضمن الموقع، و بتعطيه حقوق و امتيازات خاصة فيه و بتتحيز الو ضد غيرو
هي سياسة الموقع
هيك صاحب الموقع يللي دافع عليه دم قلبو و عرق جبينو بيريد
الزلمة عندو منتديات تانية اجنبية و عربية الها سياسات تانية بس هوي هيك رايد تكون سياسة اخوية و ما حدا اخو مراقو، و بهي الشغلة بالذات خص نص ما عندو ديمقراطية و بيعتبرها خط احمر بيسد عين الشمس
و نحنا كإداريين و مشرفين منربط الحمار مطرح ما بيقول صاحبو
و انتوا كأعضاء مرحب فيهم من حقكم تقبلوا هالسياسة و تبقوا اعضاء محترمين ... او تتركوا الموقع و الشقى على من بقا
يعني ما حدا ضارب حدا ع ايدو يقبل او ما يقبل
كوجهة نظر شخصية ... انا شايف انو الزلمة معو حق
يعني بكل تاريخ الاخوية ما مرق خليجي واحد (باستثناء امير المحبين) شجعنا على انو نعيد النظر بهالخط الاحمر

و مع ذلك ... نحنا ما حجبنا الموقع عن السعودية و الخليج اجمالا .. عل و عسى (عشم ابليس بالجنة) انو يتكاتروا الخليجيين الكويسين باخوية

مسيحية الادارة
يا عمي حاج ماسكين هالشغلة و ماشيين فيها
شو عيب تكون الادارة مسيحية يعني ؟؟؟
و اللا حرام و اللا شرعا ما بيجوز ؟؟؟؟
حدا سألكم انتوا و فايتين شو هيي ديانتكم ؟؟؟ او مين بتعبدوا ؟؟؟ او بتعبدوا اساسا و اللا مو فارقة معكم ؟؟؟

اصلا اصلا نحنا كإدارة منرفض رفض قاطع انو حدا يتهمنا انو نحنا مسيحيين
و انا شخصيا بعتبر هالشي فخر لالي، فخر كتير كبير اني كون من اتباع كلمة يسوع الناصري
و كل واحد اداري او مشرف او عضو، حر يعتنق الديانة يللي بتعجبو