[krimbow]

مشكور جدا ع الموضوع

و من خلال مشاركتي رح اطلب منك انو تتوسع بالموضوع اكتر بكتير من هيك

ما بعرف مدى مصداقية مصادرك
متل ما قلت انت انحكا عن هالجمعية الغارقة بالسرية كتير
و تألفت حولها اساطير اكتر
و خصوصا عن طقوس الاجتماع و المصافحة و الاشارات السرية تبعها
و ما بتصور انو اشاراتها بقيت كما هي

تابعت هالموضوع من فترة طويلة جدا
و من 3 سنين بلشت ملاحظة و متابعة مكثفين
و من اكتر من 6 شهور عم ادرسها دراسة اكاديمية .. اعتمدت على الرموز المرسومة او المنقوشة او المنحوتة الخاصة فيها ... لأنو هيك رموز اكيد ما فيها كذب
و اعتمدت كمان على متابعة الشخصيات يللي ممكن يكونوا انتسبوا الها، و دورهم برسم احداث العالم (على حسب زعم بعض الاساطير حول هالجمعية)

ليش كل هالاهتمام ؟؟؟
1. بالاساس انا مهتم بنظرية المؤامرة، و هالجمعية بالذات ورد اسمها بأي بحث حول نظرية المؤامرة
2. شدة تنظيم الجمعية و سريتها ... بيجعلوا الانسان يوقف مبهور
3. اسماء الشخصيات يللي انضموا الها... الماسونية ارتبط اسمها باقوى و اهم الشخصيات تاريخيا على كل المستويات، السياسية، الادبية، الفنية، العلمية، ... الخ
4. ارتباط هالجمعية باهم الاحداث العالمية يللي غيرت وجه التاريخ، متل الثورات و الحروب و الانقلابات و الانتخابات و الاغتيالات و ... الخ

مع انو دراستي لسا ما خلصت ... و حتى يمكن لسا ما بلشت، و ما بتصور انو وصلت لمرحلة النشر الاولي ... مع ذلك حابب شارككم بشوية امور و استنتاجات توصلتلها

مصادر دراستي اعتمدت على:
آ. مجموعة من الكتب يللي درست الموضوع: بذكر منها ...
السر المصون في شريعة الفرمسون، الماسونية تأسيسها و غاياتها، بروتوكولات حكماء صهيون، احجار على رقعة الشطرنج، دخان احمر يعلو واشنطن، الكتاب المقدس (العهد القديم) (دراسة جادة حول نشأة الماسونية)، لعبة الامم
ب. الميثولوجيات: السورية و اليونانية و المصرية و الرومانية
جـ. تاريخ عصر النهضة و اهم الانجازات
د. بعض الكتب الشعرية: و اهمها كوميديا دانتي الالهية، و مآسي شكسبير الكبرى
ه. بعض الروايات و القصص: متل روايات امين معلوف و باولو كويلو و اندريه غارسيا ماركيز، و بابلو نيرودا، دان براون
و. السيرة الذاتية لبعض الشخصيات: متل غاليليو، فيكتور هوغو، كارل ماركس، فوبوناتشي، الامير عبد القادر الجزائري، فارس الخوري، جمال الدين افغاني، خليل سعادة، انطوان سعادة، محمد عبدو، الملك فيصل بن الحسين، الملك حسين بن طلال، حافظ الاسد، فيديل كاسترو، رياض الصلح، و كمال جنبلاط
ز. وثائق غامضة من الدرجة التانية: مع بداية كل ثورة او انقلاب، كان يظهر مجموعة من التقارير و الوثائق -يللي سرعان ما تختفي او تهمش و بشكل غامض هيي و الناس يللي بيلاقوها او بيكتبوها- حول وجود جمعيات هدامة اهدافها بعيدة عن اهداف الثورة او الانقلاب... هيك وثائق كتير مهمة بدراسة الجمعيات السرية
ح. قراءات دورية لبعض مواقع الجرائد الصفراء على الانترنت
ط. تاريخ بعض العائلات: متل آل دي ميديتشي، ريتشموند، العائلة المالكة ببريطانيا

ملاحظات حول مصادر البحث:
1- على الرغم من حجم المصادر الهائل، إلا انو المعلومات حول الجمعية كانت شحيحة جدا
لحتى تكونوا بالصورة، اي دراسة منهجية بالعلوم الانسانية (متل التاريخ و السياسة هي اسمها علوم انسانية، لا يمكن اخضاع المادة المدروسة فيها للتجربة المخبرية) بتتبع المنهج التالي:
جمع المعلومات
توثيقها (يعني التأكد من صحتها)
تصنيفها (يعني ترتيب المعلومات لرئيسية، اساسية، اولية، ثانوية، و داعمة)
تحليلها (إما بالاسلوب الاستنتاجي او الاستقرائي او التنين سوا)
دراستها (اعتمدت على الاسلوب الديكارتي التشكيكي و منطق بول)

بسبب شح المعلومات، و بسبب استحالة توثيقها (لأنو نحنا عم نحكي عن جمعية سرية للغاية)
اضطريت اني اقفز بدراستي عن مراحل التوثيق و التصنيف و انتقل لمراحل التحليل و الدراسة
بعرف انو هالشي رح يؤدي لدراسة مشوهة ... و ما كان بدي انشر شي منها ... بس كترة الخرافات و الاساطير حول الجمعية صار لازم يتسلط عليها الضوء، و اهمية بعض الاستنتاجات يللي اتوصلتلها بتشفعلي اني انشر ما توصلت له، و خصوصا انو النشر عم يصير عبر شبكة مجانية هيي الاخوية، و بالتالي ما رح تكلف القارئ اكتر من وقت القراءة

2- اضطريت اعتمد على بعض المصادر يللي يمكن تظهر انها بعيدة عن الموضوع لأنو اساسا بدراستي معتمد على الرموز و الطلاسم السرية المرتبطة بالجمعية و تقاطع هالرموز مع بعض الاحداث و الشخصيات التاريخية، هيك رموز بتتجلى بشكل واضح بالفن و الادب
الميثولوجيات: الميثولجيا يعني علم دراسة الخرافات و الاساطير، درستها لعدة اسباب
اولا لحتى اقدر ميز بين رموز الجمعية و بين رموز الميثولوجيات
تانيا لأنو الجمعية مرتبطة بكتير اساطير ... كان لازم افصل بين الاساطير الميثولجية و اساطير الجمعية
تالتا احد الاساطير بترجع تأسيس الجمعية "لأحيرام" باني هيكل سليمان فكان ضروري ارجع للاساطير لحتى اتأكد من الموضوع

مخطط الدراسة:
مقدمة
التأسيس
المبادئ
الغايات
الخطط و السياسات
التطبيق على ارض الواقع
الشخصيات المعروفة المنتسبة للجمعية
بعض الرموز و تفاسيرها

لماذا هذه الدراسة؟
اغلب الدراسات و الترجمات العربية حول الجمعية غير امينة و لا تنقل المعلومة بشكل صحيح
و اقل ما يمكن وصفها انو لا تتمتع بالحياد
منلاحظ بالدراسات العربية دايما عامل التأثير الديني، يعني بتلاقي الكاتب او الباحث نازل سب على الجمعية حتى قبل ما نعرف ليش، و فعلا بعض الدراسات كانت عبارة عن مجلدات كاملة من الشتائم و السباب بدون التطرق للجمعية على الاطلاق

مقدمة (متأخرة بس لا بد منها)
#1 الدراسة قاصرة جدا، اولا لشح المعلومات، تانيا لضيق الوقت، تالتا لاعتمادي على الترجمات يللي ممكن انو ما تنقل المعلومة بشكل امين
و بتمنى من صاحب الموضوع، و القراء الكرام انو يعطونا المتوفر عندهم من المعلومات لحتى نقدر نوصل هالدراسة لمستوى البحث الاكاديمي

#2 لاحظتوا (و رح تلاحظوا) انو كلامي عم يكون عن "الجمعية" و ليس عن الماسونيين
السبب بذلك ليس اختصار للمصطلحات، و انما لأنو اكتشفت (عن طريق الفركشة) بمرحلة متأخرة انو الماسونية هيي عبارة عن غطاء لجمعية اخرى، هي الجمعية اسمها الحرفي باللاتيني "Illuminatti" و ترجمتها ممكن تكون المستنيرين او النورانيين او جماعة النور او الطبقة المستنيرة .... يللي هوي، المهم انو ناس مرتبطين بالتنور
رح احكي عنها بالتفصيل بمراحل اخرى
بس اقتضى التنويه لجهلنا بمدى تغلغل الايلوميناتي بالماسون، او يمكن بقدر قول مدى انفصال الايلوميناتي عن الماسون
مشان هيك ... دراستي موجهة للجمعية، و صدقا ما بعرف ازا عم احكي عن الايلوميناتي او عن الماسون
شادي حكا عن انو في عدة مراتب بقلب الماسونية ... ممكن تكون الايلوميناتي هيي احد هي المراتب العليا... و العلم عند صاحب العلم

#3 الباحث عن حقيقة الجمعية رح يصطدم (مهما بلغت درجة ثقافتو و معرفتو) بالتفوق الخارق للجمعية من حيث التنظيم و التنسيق، و خصوصا باسلوب استعمالهم للرموز و الارقام
للتخفيف من حدة الصدمة، بقترح على اي باحث بهالمجال انو يقرا الكوميديا الالهية لدانتي و يحاول يستنتج الرموز و كيفية استعمال الارقام فيها و يقارن بينها و بين اسلوب استعمال الرموز و الترقيم و الاعداد عند الجمعية
مثال:
مراتب الجمعية عددها 33، و هيي بتمثل عمر المسيح على الارض
و كذلك اعتمد دانتي بترتيبو لاشعارو على الرقم 33، بحيث كل سفر (ما عدا سفر الجحيم) بيتألف من 33 نشيد

#4 من خلال دراستي لاحظت طغيان العنصر الذكري على اعضاء الجمعية، او بالاحرى ... انتفاء العنصر الانثوي بشكل كلي.
كان ممكن هيك ملاحظة تخليني اتأكد انو الجمعية عنصرية متاحة للذكور فقط
بس من خلال دراستي لمبادئ و غايات الجمعية صرت متأكد انو ما ممكن انو تكون عنصرية ضد المرأة
مما جعلني ارجح فكرة وجود جمعية سرية خاصة بالنساء، موازية للجمعية الذكورية

يتبع ...