[عاشق من فلسطين]

وليش عم نعملو ..الاخ عاشق قال فكرة: يعم الخير عالجميع....بتصور ماحدا ضد هالفكرة...انتو شوفو كل واحد حسب قناعاتو ..كيف بيعم الخير عليه...لانو اذا ما عم عليه ..ابدا" ابدا" مارح يعم الخير عالجميع....والخير موجود بضمير كل واحد منا....
كل واحد فينا عندو حرية القرار انو يفتح هالباب ويجرب ممكن يصير معوشي او يضل مطنش...ولاتنسوا انو الحرية مسؤولية ..
ولاتواخذونا......(بالاذن من العاشق)

أبو اللول الغالي والله العظيم أنك شخص رائع يعني أنا كتير عجبني ردك وبالنهاية الدين لله والوطن للجميع ومتل ما حكيت أنا سابقا" الانسان المؤمن هوي اللي بيحسس نفسو بالأمن وبحسس غيرو وبالنتيجة أنا ممكن كون ملحد بنظر المتدينين بس لما بيشوفوني شخص محب ومتسامح وانساني يحسوا بالأمان وأنا بالنسبة الي حاسس بالأمان والنتيجة أني شخص مؤمن بغض النظر بشو بؤمن بس أكيد بشيء انساني ..
ولا تواخذنا ...(أذنك معك )

بالنسبة للزميل عاشق من فلسطين:
وضحت أمامي الصورة من الأول و أنا عارف أنو أنت بتوافق بالمبدأ على خلاصة الموضوع, و عارف انك قرأت و رديت على مواضيي السابقة بس كان بدي الزميل L O L O يقراهم.
على فكرة أنا بكل المواضيع يلي كتبتا مش هدفي انو خلي شخص مؤمن يتحول لشخص ملحد بل حتى أنا ضد هالفكرة بالمرا لأنو الانسان متل ما تعوّد و ربوا أهلو حيكون و اذا غيّر معتقدو بي صير في خلل ( متل ما أنا ما بقبل حدا يقنعني غيّر اعتقادي ) بس أنا عم حاول خلي المؤمنين يفكروا شوي بهل مواضيع مش خلص اذا الدين بي قول هيك يعني كل شي غير غلط و هني الصح.
على فكرة بتسدّق انو أنا 95% من زملائي (مسيحيين و مسلمين) من النوع المؤمن و المؤمن جدا",و هم عارفين اني ملحد بس مع هالشي بيعتبروني أفضل من أي زميل تاني اٍلهم مؤمن مثلهم.
زميلي عاشق من فلسطين أنا بقدّر كتير الحكي يللي قلتو انتا و مشكور على كل المداخلات يللي كتبتلي ياها.

بالنسبة للزميل الأستاذ:
شكرا" لأنك أعجبت بالموضوع بس في عندي تعليق زغير, انت قلت انو الله ما دخلو بطريقة مباشرة بالزلزال بل هي الطبيعة يللي تسببت بالزلزال طيب يا أخي ما المشكلة انو المؤمنين لما بتقلن انو الطبيعة هي يللي خلقت هالدني و انو ما في الله, بي قولولك ما الطبيعة الله يللي خلقها, يعني ما استفدنا شي متل ما بي قول المثل ( دق الميّ ميّ ),بالنهاية بيعتبروا انو الله هوي القادر على كل شي و بي قولولك كمان كل شي مخلوق من الله بتقلن طيب مين خلق الله ( تطبيقا" للقاعدة يللي قالوها ) بي قولولك الله غير مخلوق و طبق القاعدة اذا كنت شاطر.

بالنسبة للزميل hashtnasht:
الحقيقة انو حكيك كان بي محلو و قريب كتير على فكرتي,و أنت جاوبت شوي برد جارح متل ما اعتبر الزميل L O L O اني جرحتو بموضوعي بس أرجو بعد كل هالحكي انو يقدموا المؤمنين شوية تنازلات و يتحملوا ردودنا متل ما نحنا منتحمل ليل نهار الحكي عن الايمان و الصلاة و هالكتاب شو بيقول و هيداك لكتاب شو بيقول, و بتمنى انو يتوحد هالعالم بقا على شي معتقد, ما بي نادي لا بالايمان و لا بالاٍلحاد و يكون أساسو السلام و المحبة ولو كان هالشي بدو وقت شوي طويل.

شكرا" للجميع.

يعني هه نوعا" ما صارت وتيرة النقاش أحلى وأنا مرة تانية بعتذر عن ردي القاسي عليك بس أنا والله لمصلحتك لأني أنا كنت هيك علماني ومو شايف حدا وأخد العلمانية من دنبها .. بس اكتشفت أنو لازم أتقبل الجميع وأتعايش مع الجميع (ناقشهم بس بدون تجريح ومساس بالمعتقدات بشكل جارح) ..وبتمنى أنو يكون دينك عقلك وانسانيتك ساعتها تأكد أنو رح تكون مرتاح ... ويمكن أنا شوي أخدت وجه عليك زيادة وحكيت من منطلق أني أفهم منك وأني أخبر منك بس والله حبا" لا كرها" ولا تواخنا وبتمنى كل شي بالمنتدى يصبح أخوات ..
وعلى فكرة أنا ممكن بكره كتير النقاش بهيك مواضيع وطرح هيك مواضيع لأنها بتسبب تجريح كبير لغالبية الأطراف بس كل مرة برجع بنبسط لما بشوف أنو الجميع بعد ما كل واحد حكى على التاني وجرح التاني وعصب وانفعل..بشوف أنهم تداركوا الموضوع واستسمحوا بعضهم البعض يعني هادا بدل على وعي كبير بين شبابنا ...بمعنى أنو أنا برأيي لما بيحصل نقاش بين شخصين آراؤهم متضاربة ممكن يجرحو بعض وينزعجوا من بعض بس أنا واثق اذا كان في وعي رح يحبو بعض بعد المناقشة أكتر..
ولا تواخذونا لأني صاير كتير حكي كتير هاليومين بس يا أخي مو عم يطلع معي شعر هاليومين فقلت لأتفلسف شوي على الشباب..