[عاشق من فلسطين]

أول شي حابب رحب فيك بالمنتدى...مشكور كتير عالمقالة و على اعتبار أنك نقلتها و ما كتبت اي تعقيب عليها فابفهم انك تتبنى فكرة المقالة...حقك الطبيعي و أنا طبعا بحترم هالشي..بس حابب احط هيك كام ملاحظة صغيرة من بعد اذنك يعني:
1- لاحظت بالمقالة انو عم يحكي عن ماركس...وعم بيقول عنو انو "يهودي ملحد"...ما بعرف غباء مني وللا الجملة صعبة الفهم...اذا ملحد..ما نو يهودي..ما هيك؟؟؟
بنفس هالنقطة حابب انبه على شغلة...صار اكتر من مرة بينذكر ماركس و اول شغلة بتطلع عنو هو انو "يهودي"...وين المشكلة في انو عيلتو اصلها يهودية؟؟؟ لازم ما نخلط اليهودية مع الصهيونية...ممكن يكون في يهودي مانو صهيوني...وحتى ممكن يكون معادي للصهيونية (زميلي بالجامعة...يهودي أرجنتيني و بيكره اسرائيل اكتر مني!!!!) و بالمقابل بنشوف صهاينة مانون يهودي ( البيت الأبيض كمثال).
2- لاحظت بالمقالة صيغة كراهية شديدة نحو الشيوعية و الالحاد...و هالشي برأيي ينقص من موضوعيتها لأنو الكاتب حاول يمزج بين تاريخ الشيوعية و فكرها و رأيو الشخصي...فما زبطت معو برأيي.
3-لما عم بتحكي عن الشيوعية...عم بتحط كمثال الاتحاد السوفييتي...أنا كشيوعي ما بؤمن بالاتحاد السوفييتي كمثل للشيوعية اللي بؤمن بيها...بيجوز انهيار الاتحاد السوفييتي ما صار لأنو الشيوعية خطأ.. أنما صار لأنو صار في اخطاء بتنفيذ الشيوعية...أخطاء جسيمة بلا شك.
4- كاتب المقال حكى عن أفلاطون بأنو فكرو "شاذ"........... ما بعرف!!!بس أفلاطون بعد آلاف السنين لسا أفكارو تشغل كتب بمناهج الجامعات....وما بعرف اذا كاتب المقال حدا سمعان فيه ( مع احترامي لألو...طبعا)
5- عن اللي حكاه عن العراق أيام قاسم....ما بعرف شو بقلك...بس "آيات الله" دائما عندهم شوية فرط حساسية...و من حدا مس شي من معتقداتهم بيعملوه كافر و قاتل و مجرم و ابن حرام ووو...وما بيشوفو شو عاملين هنن بالناس...

تقبل تحياتي و أمنياتي بميلاد مجيد و سنة جديدة سعيدة لألك و للجميع

والله يا أخي yass أنك مرعب وكفيت ووفيت ..
وأحلى شي أنو الفكر الشيوعي اللي معظم العالم بيخلق عندون بالفطرة الانسانية بس بتغيرو الظروف ... أحلى شي أنو واحد مدري قرعت جدو من وين يحكي عليها ..
وأنا قصدي بهل الواحد مو أخونا بالمنتدى santaklus أنا قصدي على الكاتب العظيم اللي كاتب هالمقال ..
لأنو اول شي اللي كاتب المقال لا يفقه شيئا" عن معنى الشيوعية ولا يعرف شيئا" عن ماركس وأنا حابب قلك يا اخ santaklus أنو ماركس اللي عم ينحكى عنو بي هالمقال مانو مؤسس الاتحاد السوفيتي ولا مؤسس الأنظمة الشيوعية هوي صاحب الفكرة الشيوعية يعني هوي مفكر عظيم وأنا برأيي بغض النظر عن أنتمائاتنا الفكرية لازم نحترموا لأنو مفكر عظيم ... أنا ما بؤمن بمحمد أنو نبي بس بحترمو على أنو أنسان ذكي ومفكر ... ومتل ما العالم (حتى الملحدة على تعبيرك) بيحترمو النبي محمد والسيد المسيح وبيحترموا المؤمنين فيهم من حق هالملحدين (اذا ما بدك تحترمون) على الأقل تحترم مفكريهم مو مشان هالملحدين مشان الفكر لأنو أنا برأيي اللي ما بيحترم الفكر ما فيه يحترم شي لأنو الفكر الانساني أقدم من الأديان السماوية (أفلاطون مثلا") اللي حكيت عنو أنو شاذ اذا بتمعن بكل الكتب السماوية بتلاقي أنها بتصب فيه وما بتخرج عن المبادئ اللي بيحكي فيها وبتختلف بس أنو مطروحة بطريقة لاهوتية..
الخلاصة أنا موجود وأنت موجود .. ولو كنا مختلفين بالرأي ومحدا فينا فيه يقنع الآخر برأيو بس على الأقل خلينا نحط أيدنا بأيد بعض ونحقق هدف الأديان السماوية كلها وهدف الشيوعية والاشتراكية والأفلاطونية... نحقق خير الانسانية ونتناسى القشور..
ومشان الله لا تواخذنا..