مرحبا هير اي ام
روق معلم ... وحياتك مو مستاهلة
ازا بتسمحلي حبيب بس برواق ...
خيو انت عم تسأل ازا العطل فينا و اللا فيك تمام؟
برأيي الشخصي العطل فيك ...
ما عم استلمك عشرة بلدي و لا من يحزنون، رح خبرك ليش العطل فيك
لأنو نحنا ما عم نكزب ع حالنا، عن نقول شو عم نشوف ... ببساطة عم شوف نص شعبي امي ... و اكتر من نص يللي ما لو امي ما معو غير تاسع
عم شوف وضع المستشفيات تقول عايشين بتشاد ...
عم شوف اسعار البيوت و السيارات تقول رح تشتري البيت بمانهاتن او بالشانزيليزيه
عم شوف المحابيس اكتر من طلاب المدارس
عم افتح الاخبار ع القناة السورية كل ما بدي اضحك من مبدأ "شر البلية ما يضحك"
ممكن اسألك سؤال ... ازا حابب اقرا شي كتاب بهالبلد ... كم مكتبة في ما عدا مكتبة الاسد و المكتبة الظاهرية ؟؟؟
بعاصمة متل دمشق ... يا حزرك كم مسرحية بينعرض ؟؟؟
كم سينما مرتبة في عنا ؟؟؟
طيب اتطلع ع الشام قبل 40 سنة و عد كم مسرحية كام بينعرض و كم سينما محترمة للعائلات كان موجود و بعدين خبرني ... هلأ نحنا اكيد عم نتقدم ... بس يا ريت تخبرني ازا عم نتقدم لقدام و اللا لورا
بلا الثقافة سيدو ... صحيح هيي الغذاء الاعلى للروح حسب ما قال حافظ الاسد ... بس بلاها حدها البلي
شفلي المستشفى الانكليزي .. يللي هلأ صار اسمها الزهراوي ...
كانت اكتر مستشفى محترم بالبلد ... هلأ صايرة الله وكيلك متل المشرحة ... حتى المشرحة انضف شعرة و يا ريت شباب الشام يكزبوني ازا كنت عم احكي شغلة غلط
بلا الصحة السيدو ... اولا عن آخرا الاعمار بايد الله ........ و اميركا، كمان حدها البلي
اتطلع ع المدارس ... شفلي ايمت اخر مرة حدثوا المناهج
اتطلع ع الجامعات
طيب بلا العلم ... معلش رح سايرك و اضحك ع حالي و انسى "اطلبوا العلم و لو في الصين" و هالعلاك هاد، كمان و كمان حدو البلي
و ما بدي حاكيك عن البترول لأنو عن جد يمل و ما بتوقع انو تفاجئني بجواب يخش الدماغ
انو ما خبرتني مجد عفت سماك لما كنت عم تعمل معاملات الاتصالات بالشام و اللا ضل فيك روح ؟؟؟
ما خبرتني ... لو كان عنا نظام تصنيف تعليمي احسن من البكالوريا ... بشرفك كنت رح تسيب فرصة الجامعة تضيع من ايدك ؟؟؟
طيب عال
انا زلمة نقاق
ع مين برأيك لازم حط الحق ؟؟؟ ع اسرائيل ؟؟؟ ليش شو خص تحرير الجولان او فلسطين ببناء المستشفيات ؟؟؟؟
ع اميركا ؟؟؟؟ ليش شو خص اميركا بنظام التعليم ؟؟؟؟
طيب حط الحق ع ابي لأنو خلفني ؟؟؟ من مبدأ "هذا جناه علي ابي و ما جنيت على احد"؟؟؟
والله هوي كنت رح كون ممنون لو انو خطف رجلو ع شيكاغو كم شهر لبين ما كان خلفني
بس اكيد ما فيي حط الحق عليه ... يعني الزلمة الله يعطيه العافية عمل يللي عليه و اكتر
بتعرف شو ... حسب ما بشوف ... بلاقي انو الحق بينحط ع الجهة يللي المفروض تأمن هالاشيا
ع الجهة يللي كتبت بدستور بلادي انو هيي قائد الدولة و المجتمع
طيب برأيك انا و اللا ابو النسيم و اللا غيرنا ... خونة لأنو عم نطالب بحقوقك و حقوقنا ؟؟؟
خيو ابو النسيم ... بس تعرفلك شي طريقة تصير فيها مهجن ... تزكرنا بالخير خيو
و دمتم
عندما تتأجج نار التحششيش .. تنأى الحشائش بالحشيش الحشحشش ..
وحشيشة التحشيش .. عمر أحشش ..
حش الحشائش في حشيش محشش ..
حشاش يا أخا الحشيش ..
حشش على تحشيش محششنا القديم ..
سوريا الله حاميا
jesus i trust in you