[krimbow]

موضوع ممتاز ... بحب المشاكل

ردي رح يكون مطول مشان هيك رح حط النقاط يللي بدي رد عليها و كل واحد يقرا يللي بيناسبو

النقاط هيي:

• الاخوة
• حوار الاديان
• قسم المنبر و السياسة
• التمثيل الحقيقي للمجتمع السوري بقلب اخوية
• المشرفين
• حذف الاعضاء

الاخوة:
متل ما ذكر كاتب الموضوع الاعضاء بالاخوية عددهم 4700 ... يعني من شبه المستحيل انو يكون الكل اخوة مع بعض .... عدا عن انو الاخوية عندها هامش قوي جدا من الحرية الفكرية و التعبيرية سواء دينيا او سياسيا او ... الخ، و بالتالي، و ضمن مجتمع تربية الكره و الحقد يللي نحنا عايشين فيه بيصير موضوع الاخوة شغلة مستحيلة فعلا ... إلا ازا قدر الاعضاء انو يتخلى عن الحقد و الكره المزروع بقلبهم و قدر يتقبل باقي الاعضاء ... غير هيك ... سدءوني صعب انو تبقوا ضمن هيك منتدى

حوار الاديان:
للمرة المليون .. الادارة ما عندها اي هدف لتشويه صورة اي دين .. بالعكس تماما .. هدف الادارة من قسم حوار الاديان هوي التعرف على الاديان .. بس بدون مجاملات، بدون كزب، باختصار بدون تشويه لحقيقة هالاديان
فعلا الادارة غير راضية عن هالقسم حاليا، لذلك عم يتم اتخاذ خطوات هامة جدا جدا على صعيد قسم حوار الاديان و باقي الاقسام

متل مو ملاحظين حوار الاديان محطوط بزاروبة زغيرة كتير كتير يا دوب مبين ... و ما مين ما كان مسموح الو يكتب هنيك و فعلا رح يتم بالايام الجايي منع المسيئين بهالقسم من انو يكتبوا فيه ...

و باعتبار انو مو مبين كتير هالقسم ... فبتمنى من الجميع انو يعطينا حلول و اقتراحات لحل المشاكل يللي فيه بدل من انو ينتقدو و يطالب باغلاقو لأنو اغلاق القسم مو وارد لا هلأ و لا بعدين .. شخصيا استفدت كتير من قسم حوار الاديان و قدرت اتعرف على الدينين المسيحي و الاسلامي السني كتير منيح و بدون تشويهات و عمليات تجميل لهالدينين

في عنا كتير اقتراحات لهالقسم .. جزء قيد الدراسة و جزء قيد التنفيد .. و عامل الوقت هوي الشي الوحيد يللي عم يوقف عقبة بوجهنا

قسم المنبر و السياسة:
بالنسبة للحقد الطائفي، صدقا ما جبناه من بيت ابونا، و لا اخترعناه خصوصي للمنبر و قسم السياسة، هالحقد موجود، و الاخوية بتفتخر بأنو عندها اكبر حيز حرية موجود ع ساحة النت السورية، هالحيز يللي عم يوسع الجميع بدون استثناء.
لما حبينا نحط قاعدة انطلاق لاعراف و احكام الكتابة بالمنبر الحر، لقينا انو انسب شي انو نعتمد على الاعلان العالمي لحقوق الانسان، بالمخصر هالاعلان بيقول: "من حق كل بني آدم انو يعيش، يشتغل، يعتقد، يقول رأيو". و بناءا عليه مراقبي المنبر السابقين و الحاليين و المستقبليين رح يتم تعيينهم و رح يستندوا عليه ... طالما هيك ... ممنوع تماما بالمنبر و برات المنبر السباب و الشتائم
ممنوع تماما بالمنبر التهكم الشخصي .. انا جايي بدي مارس حقي بأني قول رأيي او اكتب فكرتي .. مو من حق اي شخص انو يتهجم عليي و يسبني، بنفس الوقت من حق الجميع انو ينتقد فكرتي او رأيي
على هالاساس مراقبي المنبر عم يتصرفوا ... على هالاساس عم يتم توجيه الانزارات و الكروت الصفرا و الحمرا للمخالفين
عندك طريقة افضل ؟.؟؟؟ يا ريت تساعدنا و تنقذنا فيها

التمثيل الحقيق للمجتمع السوري بالاخوية:
الادارة من اول لحظة لليوم كان قرارها هوي ابعاد الاخوية عن اليوتوبيا
اليوتوبيا ليللي ما بيعرف هيي المدينة الفاضلة يللي حكا عنها افلاطون بكتاب الجمهورية و ابن خلدون بالمقدمة تبعو
ما بدنا ابدا انو تكون الاخوية محل كزبي ما موجود بالواقع ... ما بدنا ابدا نحكي عن امور وهمية ما ممكن تصير بالمستقبل او بالحاضر ... بدنا ياها ممثلة للمجتمع السوري الحقيقي .. المجتمع السوري الحقيقي المشوه متل ما قال هومان، لأنو اصلا ما في مجتمع سوري راقي، و لا في مجتمع راقي باي قومية او جنسية تانية

اما الحلول يللي عم تنطرح بالاخوية من خلال هالمجتمع المشوه، تأكدوا انو في حلول انحطت بالاخوية، لو انو تم اتخاذها من قبل حكومتنا العتيدة كنا انتقلنا بسنين قليلة من دول العالم التالت لدول العالم الاول.
مع ذلك، اعضاء اخوية مو مطالبين بحلول لمشاكل سوريا الاقتصادية و السياسية و الاجتماعية و المطالب فيها هيي الحكومة، اما اعضاء اخوية بيحقلهم انو ينتقدوا هالسياسات و خصوصا انها ما عم تعالج اي مشكلة

المشرفين:
اول شي
الكل لازم يعرف انو عمل المشرفين عمل تطوعي ما عم يقبض المشرفين عليه اي فرنك و لا عم ينعطوا امتيازات دون باقي الاعضاء غير انو يدخلوا ع منتدى خاص فيهم لحل مشاكل الاخوية و نقل و وضع الاقتراحات
تاني شي
بعكس ما قيل انو منعتمد على عدد المشاركات، المشرفين بيتم تعيينهم وفقا لآلية صعبة كتير و بعد دراسات كتيرة .. لهالسبب نحنا عم نعاني من نقص فعلي بالمشرفين
حاليا عم يتم دراسة آلية جديدة و رح يتم تنفيذها بالقريب .. بس نحنا عنا كتير مشاكل عم نحلها وفقا لجدول معين ... ما منقدر نحمل اكتر من بطيخة بايد وحدة ... طولو بالكم علينا
عندك كتير اشخاص متل جيني و زين و زوزو و طارق و صياد..... الخ لهلأ بعدهم اعضاء مع انو عندهم مشاركات بتخوف بالاخوية

اما شغلة خيار و فقوس ..
هي مو صحيحة ابدا .. و بتمنى انك تعطيني اللينك تبع الرد تبع الخليجيين يللي حذفنالك ردك فيه و خلينا رد زين

يكون بعلم الجميع انو اكتر شخصين بعدللهم بالمنبر هنن طارق و ابو النسيم

و بتمنى من الجميع لما يشوفوا مشاركة فيها مسبات انو يبعتوا تقرير مشاركة عاطلة لحتى نقوم باتخاذ اللازم

و بتمنى كمان من الجميع انو يتزكروا انو نحنا بشر ممكن انو نغلط و سلفا بعتذر من اي شخص ازا غلطت بحقو

اما انو المشرف بيقوم بدور قاضي
هي كمان مو صحيحة ... اكتر من مرة اكدت انو المشرف ليس قاضي و انما المشرف بيشتغل بناءا على قواعد معينة ... لما نشوف مسبة او تهكم او تهجم شخصي او مشاركة قليلة الادب ... عندها منتحرك
انت يمكن شفت انزاراتك بس شو عرفك انو ما انزرنا غيرك ؟؟؟؟ تأكد انو اي شخص بيخالف القوانين بيتم انزارو مباشرة

اما بخصوص طلبك انو لازم يكون المشرف مؤهل ...
عفوا بس كيف يعني مؤهل ؟؟؟ يعني شو هيي الشهادة يللي لازم يكون حاملها الشخص لحتى نعينو مشرف ؟؟؟ و شو هيي نوع الدورات يللي لازم يعملها الواحد لحتى يصير مؤهل ؟؟؟

بعدين مواضيع متل على راسي يا غالي و ما بعرف شو ... يعني هي امور شخصية هيك الزلمة ( او الست) بيكتب ... شو ازا الواحد صار مشرف لازم يقطب حاجبيه و يضل عابس و ما يعود يتحاكا؟؟؟؟

اما بخصوص موضوع الفتوش تبع احمد نون ... كتبت اكتر من مرة انو مكانو السقيفة و لو بتراجع ردودي كنت عرفت هالشي و يمكن انا الوحيد يللي معلق ع هالنقطة ...

بس قسم السياسة لسا ما تعينللو مشرف و مع ذلك حقك علينا و تكرم عينك رح انقلو ع السقيفة مع الاعتذار الشديد
و تأكد انو ما كانت الغاية ابدا انو يبقى الموضوع بالسياسة مشان الاستقطاب الجماهيري لأنو متل مو شايف ما عم نلحق نقرا مواضيع بالاخوية فما عنا مشكلة نقص بالاستقطاب


حذف الاعضاء:
مين قال انو حذف الاعضاء هي شغلة مو ورادة ؟؟؟
ابدا ابدا .. الاعضاء المسيئة رح يتم التعامل معها بكل جدية و حزم
منبدا بالتنبيه من خلال رسايل خاصة
بعدها بينحبس و ما بيعود بيقدر يكتب غير بالاقامة الجبرية
ازا استمر باساءتو بيتم تعليق عضويتو فترة زمنية اطول من الاقامة بدون ما يقدر يكتب بالاقامة الجبري
و اخير ممكن انو نشطب اسمو من الداتابيس بدون ما نحس بأي نوع من انواع الاسف عليه

و دمتم