[Hus]

تجربة رهيبة .. رح احكيلك عن تجربتي هون
طبعا الغالبية بمصر اقباط (عقيدة ارثوذوكسية) لكن في كل الطوائف ..
اصحابي هون قال يابا بدون ياخدون على الكنيسة تبعون وانو عيد وما بيصير
قلنا يالله تسالي يعني منروح ..

رحنا كنيسة الاقباط بمصر الجديدة .. دخلت .. واذ الشباب بجهة والبنات بجهة هاي اول طعجة
حضرنا القداس ولا انا ولا اي حدى فهمان شي لانو الصلاة بالقبطي وما حدى حتى من الاقباط بيعرف قبطي ..
رحنا نتناول قام قال لازم تشلح من رجل .. لك له يا حبيب شو هال الحكي قال اي والله .. شلحنا هال البوط ورشقناه بالزاوي ..
وطلعنا على الدرج منشان نتناول .. طبعا بعدها بيضيفوك ميي كاسات مي هيك ما بعرف ليش بس تسالي ..
وطبعا الشباب بيتناولو بطابور والبنات بطابور تاني .. غير هيك احنا مندخل الهيكل منشان نتناول اما البنات فالخوري بيطلع عندهم لبرات الهيك وبيناولهم
اي هذاك يوم وهذا يوم ..

رحنا كنيسة تانية بالصدفة لليسوعية .. وانو محسوبك رايح على الجيزويت من باب انو بركي منرحلنا شي رحلة منرحلنا شي حفلة ..
المهم الصلا كلها بالفرنس !! والتراتيل كمان فرنسي والناس الي جوا كلهم بيعروف وبيحكو فرنس .. وانا الي شو داخل بالعرض ..
انو شو قال شبوبية وطلي وجمهور وسوري بمصر يعني وجاي لاكسح الشباب رحنا دبلكي .. حسيت حالي متل الاطرش بالزفة .. انسحبت على السريع .. حفاظة على حبة الكرامة الفاضلة ..

رحنا كنيسة بعدها ايضا بمكان غريب والكنيسة مخفية جدا .. كان راحو الشباب قبلها باسبوع وخبروني انو تسالي ..
رحنا كان في وعظة + فرقة موسيقية غيتار على درامز على زمامير كلو شغال جوا الكنيسة مع الوعظة ..
وبلش الواعظ بالكلام طبعا كبداية اي واعظ .. لازم يستخدم اسلوب الترهيب ويخوفك والجنة والنار و و و ..
بعد حوالي ساعة وربع من الوعظ من الكلام المكرر الي صارت الناس بتسمعو عن غيب .. قال كلمة تاريخية
قال :
هلق بعد هال المقدمة البسيطة عن الروح القدس فينا انبلش موضوعنا انا صطلت هون !!!
انو يا ابن الحلال .. يا حبيب قلبي بقالك ساعة وربع عم توعظ وكل هال الوعظ طلع مقدمة !!!!!!!
انا عاد ما استحملني عقلي اكتر قعدت شي عشر دقائق .. لبين ما انتفخ قلبي على الاخر .. عاد حملت حالي وطلعت
وهداك يوم وهذا يوم
بعدين طلعت الكنيسة لاتين ..

في المرة القادمة ححكيلكون عن تجرتي مع الاهوت الاسلامي المعاصر وتجربتي في جوامع القاهرة ..