من يومين استوقفني بالجامعة شب اشقراني اميركي طويل و قال انه من كولورادو و هي ولاية اميركية و عايش حاليا بكندا
قلتله اهلا .. لنشوف شو بدو
ملحوظة: عندما تعيش في كندا او اميركا ستتعود على رؤية الكثير من المبشرين المسيحيين خاصة من شهود يهوه و الانجيليين و ايضا من الهندوس
عادة من الباب للطاقة بيجي بيسلم عليك.. او بيعمل حالو عم يقرأ شو مكتوب على كنزتك او طاقيتك (انا كان عم يقرا شو مكتوب على طاقيتي)
المهم
بلش يحكيلي طبعا عن المحبة و الله و السلام العالمي و انو عندون اخوية و شي حلو و بيجتمعوا باسم المسيح
اعظم الانبياء
يعني الزلمة عم يلف و يدور كتير.. و دايما هني هيك... بقى مشان نختصر الطريق.. قلتلو دج هيك.. انت بتأمن انو المسيح هوي الله؟
سكت هيك
قال لاء
قلتلو لكن انت مانك مسيحي شو انت
قال.. يعني انا ما بآمن انو المسيح هوي الله.. بل انو ابن الله و انو اخر و اعظم الانبياء.. و لما نزل على الارض صار انسان متلنا تماما
المهم و بعد حكي كتير
قلي... شو بيكون شعورك اذا بتعرف انو في نبي عايش.. و عنده 12 رسول؟
قلتلو يعني انتوا عم تحاولوا ترجعوا الامجاد الماضية؟؟
قلي لاء ما عم نحاول.. لأنو موجود حاليا في نبي... prophet ... و 12 رسول معه
انا ما قدرت ما ابتسم شوي.. قلتله عن جد؟ شو اسمو؟
و عطاني اسمو! بس نسيت شو كان للأسف
قلي اي شو شعورك؟ will u be interested to know that?
قلتله لا و الله عادي
اندهش هوي
يمكن انطعج شوي بعيد عنكم
المهم بعد حكي طويل عن ليش و ما ليش اكتشف انو انا بالحقيقة ما كتير بآمن بوجود الله من الاساس.. اطلع فيني هيك...
.. انو صرلنا نص ساعة عم نحكي و طلعت ما بتآمن بوجود الله
المهم
عيش كتير بتشوف كتير
اذا بتنزلوا على قلب المدينة رح تشوفوا كتير مبشرين... سود و بيض... شي عم يعزفوا موسيقا و يطبلوا على الطبول... اقترب يوم القيامة... اقترب يوم القيامة... و شي عم يرسموا لوحات ... و شي شباب كنديين لابسين تياب هندوسية و عم يحاولوا يبيعوك كتب... و انا مرة من هوشنتي اشتريت واحد و اتبرعت كمان .. اخدني بالعبطة و الله
بتذكر كمان مرة (من زمان قبل قصة الأخ من كولورادو) رحت ع كنيسة معمدانية عربية بأوتاوا.. و الله الشباب طيبين كتير و ما في احلى منون.. و معظمهم لبنانيين و عراقيين
بقى عم نحكي مرة... قلي "القسيس".. عم يعرفني ع واحد... قلي فلان قبل كلمة الرب من فترة قصيرة كمان... قلتلو بكل فضول.. ليش شو كنت؟... قلي كنت روم ارثوذكس
و انا بهديك الفترة كنت روم ارثوذكس لاخر درجة ... بقى طلعوا الروم مانون مسيحيين و شوية شباب بيقضوها غناء و عزف بيانو و جيتار بكنيسة هني الاصح... و من يومها بطلت روح على الكنيسة المعمدانية
رحت ع كنيسة العرب الارثوذكس
و سمعنا الخوري.... ما تتناولوا عند الكاتوليك... ما تتناولوا عند الكاتوليك
برنامج للأطفال من اصل لبناني فقط
طبعا الخوري لبناني و ما متعصب للأرثوذكس و اللبنانيين إلا شوي
و من يومها بطلت روح ع كنيسة الروم...!
كنيسة الكاتوليك بعيدة شو بدو ياخدني
و الاقباط لاء
و الموارنة؟ احسنلي ما فكر بالموضوع من اساسو.... مع انو الزلمة يلي علمني شوية سرياني كان موراني و حباب كتير و شكله حبني كتير كمان... بس بين كل كلمة و كلمة بيسب العرب و البيزنطيين ! (في وجهة نظر :P )
و من يومها.. و بعد 400 صفحة لفراس السواح... بطلت شغلة الدين!
خييي الواحد بيرتاح ع فكرة
بقى هاي كانت تجربتي مع اللاهوت المسيحي المعاصر
باختصااار[/u]
ذكرى مرور عام على وفاة الأديب العالمي سيبيري ماسكوليه 1932 - 2008