مرحبا اخواتي
رح بلش رد ع الشباب و الصبايا ...
الاريشتيكترر ...
اقتباس:
اذا شي مرة كنت رايح لعند جماعة وكانو جراباتك مفتوقين
والجماعة ربك ودينك بدك تشلح من رجلك بشان ما ادعس عالسجادة .......شو بتعمل
|
يعني شو رح اعمل ما تركتلي شي اعملو غير اني اتشرشح
رح اضطر اشلح و فرجيهم البلاوي الزرقا

و لاقيلي شي كزبة بيضا انو الجرابات بالغسيل اكلتهم الغسالة و ما لحقت اشتري و ما بعرف شو من هالحكي الكزيبي
سويت بيبي ...
اقتباس:
مين اعز 3 اشخاص ع قلبك (بصراحة ها)
|
يعني اكيد اعز من العيلة ما في
و طالما بدك الصراحة فاعز ناس ع قلبي هنن امي و ابي و اخواتي دانة و زينة
و طبعا انا بجوابي رح اظلم كتير ناس ... رفقاتي بالاخوية و رفقات عمري بالحارة و بالجامعة و بالشغل ... هاد غير ناس كتير كتير عزيزين على قلبي
عموما انا بعتبر كل الناس خير و بركة لحين ثبوت العكس ... في ناس بتعتبر الكل ما بيسووا لحين ثبوت العكس
و ما بعترف بالانطباع الاولي ابدا ... و بآمن بالمتل يللي بيقول ... خود صاحبك بعد خناقة
ماهر ...
اقتباس:
بما أنك ساكن بالقصاع قريب علي يا جاري العزيز وهي بوسة ...و كنت أنا ماشي في ليلة من ليالي القصاع المزدحمة و عم أعمل برمي بالقصاع بالسيارة أو ماشياً كيف فيك تعرفني من بين كل هالسيارات وهالناس هههههههههه ؟
|
بعرفك من سيارة البيجو تبعك

بعدين القصاع ما فيها كتير معلمين بالسواقة ... يعني بتبين
هنونة ...
اقتباس:
شو اكتر شغلة بتحب تكون موجودة باميرة احلامك
|
كتير اشيا بس التفاهم شغلة مبدئية ( من مبدأ) ... يعني لازم تكون فهيمة و تفهمني ع الطاير، لأنو انا عندي مرض الغيرة العميا ... فازا ما فهمتني و عرفت كيف تتعامل مع مرضي رح نوصل لطريق مسدود ... متل كل مرة
فارون ...
اقتباس:
اذا كنت تطلع مع جماعة من رفقاتك وبعد فترة حست انو معد بدون ياك بس بدون ما ايقولوا بالمشرمحي ابتنسحب؟؟؟
|
بحاول بالاول اتأكد من الموضوع ... بس ازا تأكدت او زاد احساسي قوة ... اكيد بنسحب ...
لما بكون مع رفقاتي لازم نكون مرتاحين مع بعض ... اما ازا هنن ما عاد بدهم يحاكوني ... معناها ما رح كون مرتاح معهم و لا هنن مرتاحين معي و اشرفلي اني انسحب من اني اتعامل بطريقة غريبة متل انو يحكوا الغاز قدامي و ما يفهموني شو الموضوع ، او اني ادرى انو طلعوا مشاوير من دون ما يخبروني مع انو بكون معهم قبل نص ساعة و هيك احراجات ....
الانسحاب اشرف بكتير بهيك حالات
سعيد ...
اقتباس:
شو الشغلة الوحيدة اللي ما بتقدر تعيش بلاها ؟؟
|
حاليا السيغارة ...بس ممكن اني بطلها و بالتالي الشي الوحيد يللي ما في عيش بلاه هوي الاحترام ... اني كون غير محترم من كل الناس هي شغلة بتدفعني بالتأكيد للانتحار ... ازا ما قدرت غير بنفسي و بالتالي غير نظرة الناس الي
هير اي ام ...
اقتباس:
شو أخر أخبار النفط و الأحتياطي العالمي من البيتنجان شو وضعو هلق ؟
|
بالنسبة للنفظ هبطط اسعارو بالاسبوع الماضي لمعدلات جديدة و استقرت بين 61 و 62.50 نتيجة زيادة المعروض باوبك و ارتفاع المخزون الاحتياطي الاميركي و انخفاض الطلب العالمي ...
اما بالنسبة لاحتياطي البيتنجان ( دوليا عم احكي) ارتفعت اسعارو ببورصة
سوق الهال نتيجة لتموين الناس مكدوس و متوقع ينخفض الاحتياطي تبعو نتيجة المسقعة و المتبل
اقتباس:
سيمون ... و بتشكرك ع الاطراء يا مزوق
وين شربت اطيب فنجان قهوة
|
باللادئية بالسوار
يوميتها كنت حاسس حالي ملك
بعد الفنجان قابلت التجار يللي بتعامل معهم هنيك ... كلهم بتعامل معهم ع التلفون و بس يشوفوني ينجلطوا و يقولولي انو متوقعين حدا كبير بالعمر او ع القليلي اربعيني

و بعد ما خلصت تمنيت ارجع اشرب واحد تاني بس ما كان معي وقت لأنو رجعت بالطيارة
سدءني يا سيمون اطيب فنجان قهوة بتشربو لما تشوف نجاحك بعيون غيرك
ويلي ( ويلي منك ويلي ) ...
اسمي كريم و عمري 27 سنة و ساكن بالشام بحارة اسمها القصاع ( بحبها كتير) و خريج كلية اقتصاد قسم محاسبة و عندي مكتب تجاري بالشام ...
بعتبر نفسي باحث عن الحقيقة ...
(( وحدها الحقيقة تحررنا ))
حلمي اني لاقي الحقيقة ، لأنو لما لاقيها بتحرر و لما بتحرر بوصل للسعادة .. و الحرية هون ما هيي حرية من الاستعباد او الاستغلال او الاستعمار ...هي كلها امور لحظية مرتبطة بالزمن
اقتباس:
3.شو الصفات اللي بتكرهها بالانسان
والصفات اللي بتحبها
|
بكره يللي بيستغبيني ... متل انو يحاكيني شغلة كأني ولد صغير و بيكون منتظر مني اني سدءو
و بحب الواثق من نفسو .. لأنو بقدر اعتمد عليه
ليلى ( بنت حمايي الغوالي)
اقتباس:
1. لمين بتحب تقرا اكتر شي
|
ما في تحديد ... حاليا مهتم بدان براون .. قريتلو روايتين و هنن شيفرة دافينشي و حقيقة الخديعة و حاليا بين ايديي رواية ملائكة و شياطين
بس اجمالا بحب كتير اسلوب امين معلوف و جبران و تشارلز ديكينز و هوغو و همنغواي و مارك توين بالرواية ، و اسلوب نبيل فياض و فراس سواح و جورجي كنعان بالامور الدينية ، و ابراهيم الفقي بكتب الادارة ... و ما في تحديد ...
.
اقتباس:
شو بتحب تقرا اكتر شي يعني قصدي ( سياسة, قصص, ادب تاريخ .....)
|
التاريخ بيستهويني كتير و السياسة كذلك ... و الهم اهمية خاصة ... بس ما بيمنع اني اقرا ادب و خصوصي الروايات العالمية و الكلاسيكية
و مهتم كتير كتير بالكتب يللي بتحكي عن نظريات المؤامرة .. وهي غالبا سياسية و جاسوسية و استخبارية .. و حاليا اكتشفت مجموعة نظريات عن مؤامرة علمية و عم تابع الموضوع باهتمام
اجمالا كل الاديان بتتحدث عن مؤامرة من الشر ضد الخير و بالتالي هالموضوع كتير مهم
.
اقتباس:
شو اطيب اكلة عندك ( وخاصة نهار الجمعة )
|
سلطة النوتيللا من عند رامز
ويلي ايضا و ايضا
1
اقتباس:
.اذا كنت ماشي بالشارع واجا حدا قلك شي كلمة مثلا يعني يا كديش (حاشاك يعني بس مثلا عم نقول) المهم شو بتعمل؟ او شو بتكون ردت فعلك؟
|
من هالناحية اتطمن لساني مبري ع كيفك ... عايش بسوق الصاغة من صغري و لسان الصياغ ما في ازفر منو و عندي حكي بيخلي الدم يغلي بالراس
.
اقتباس:
شو المواضيع اللي بتقراها بالمنتدى
يعني في شي مميز بيجذبك
مثلا اسم الكاتب
عدد الردود
العنوان
من هالحكي يعني
|
بقرا مواضيع المنبر كلها و باعتبار انو فتحنا قسم تاريخ فعم اقرا مواضيعو و كمان مواضيع علم النفس و الفلسفة كتير بيهموني
و من الكتاب يللي بيكتبوا بحب مواضيع و ردود الحكيم و حشت نشت
عدد الردود ما بيهمني بالمرة
اقتباس:
.مين اكتر الاعضاء المقربين الك بالمنتدى
|
كتير ناس ... تقريبا الكل و ما في مجال اني ازكر اسماء لأنو في كتير ناس غايبة ...
اقتباس:
لحظة ندمان عليها وبتتمنى انك ترجع بالوقت لتغير كيف صارت.
|
كتير ...
بس لحظة رجعت من دبي .. كان فيي ابقى عشر تيام زيادة و احضر معرض كتير مهم ، بس رجعت و لو بقيت كان كتير امور اتسهلت و انحلت و كتير امور تأجلت او التغت و بالتالي كنت هلأ كتير مرتاح
و لحظة سافرت ع مصر آخر مرة ... أجلت كتير امور كان لازم حلها و كتير اتضررت نفسيا و ماديا و دراسيا من ورا السفرة
اقتباس:
2. اوصف هالاعضاء و المشرفين:
|
الحكيم:
واثق من نفسو ، واضح، منتقارب بافكارنا كتير و هالشي بيخلينا متفاهمين و انشالله ع طول
سيمون:
كتير كول و حباب و مدرس شاطر و بتمنى اتعرف عليه شخصي
سويت بيبي:
بتجنن ، واثقة من حالا ، زكية كتير ، بتفهمني ع الطاير ، و قوية ، يا لطيف شو قوية
بلو ايز:
اشتقنالا كتير و حبابة و رايقة
ليلى:
رائعة و زكية و قلبها اطيب من العسل ، و فوق كل هاد صبورة
صحيح بتعزبني بس على قلبي احلى من العسل
صياد الطيور :
ما بعرفو كتير بس اكيد مخلص لمبادءو و هي ميزة رائعة و مؤدب كتير و عقلو كبير
سعيد:
رايق و فهيم و متلي بدو العنبات ما بدو الناطور و عايش حياتو
ماهر
بدي اتعرف عليك ، يعني بدي نلتقى بشي محل
طارق
يا لطيف الالطاف نجنا مما نخاف ، شو حشرو هاد بالنص ؟؟؟؟
لا عم امزح
صديق شخصي الي ... بيعجبني انو زكي كتير بس ما دايما بفهمو ، اصلا هوي ما دايما بيفهم حالو
هير اي ام
من الناس يللي كتير سعيد اني اتعرفت عليهم ، و الاهم انو طموح
هنون:
من جديد صرت اكتشف عنها شغلات اكتر و اكتر بس اجمالا بتعجبني روح النكتة يللي عندها
كاكابودا:
نيالو عن جد ... لأنو روح النكتة عندو حاضرة دايما و بحس انو من الناس يللي بيعتمدوا مبدأ طنش تعش تنتعش
سيريا مان :
حباب كتير و قلبو طيب و بيعجبني تصميمو و ارادتو القوية
ويلي :
هلكتني هلكتني رسمي
عموما بتمنالك التوفيق و عم انبهر من معلوماتك و هي شغلة كتير حلوة ... ثابر
شخصيا بتنبألك بمستقبل كبير
و بعد ما خلصت رح حط بالمقلاية .... سويت بيبي
شباب و صبايا ... على نار هادية و قلوها لتستوي مزبوط
و دمتم

عندما تتأجج نار التحششيش .. تنأى الحشائش بالحشيش الحشحشش ..
وحشيشة التحشيش .. عمر أحشش ..
حش الحشائش في حشيش محشش ..
حشاش يا أخا الحشيش ..
حشش على تحشيش محششنا القديم ..
سوريا الله حاميا
jesus i trust in you