للأسف هالنوع او هالصنف من الاشخاص هو اللي بيعطي صورة سلبية كبيرة كتير عن الجماعة اللي هو بينتمي الها وبالنسبة لقصتك فهو بيعطي فكرة عن قديش الناس المسلمين الصايمين بصلتهن محروقة ومعصبين دائما وما بيتحملوا يشوفوا حدا مخالفهن ... مع انه هاد الشي مخالف تماما لآداب الصيام .
في نقطة مهمة ... بالنسبة لهاد الشخص ماله حق باي شكل انه يفرض على الشخص المدخن انه ما يدخن فقط لانه الدنيا صيام والناس صايمين ، خصوصا اذا هو ما بيعرف اذا كان مسلم او لأ ، اذا بده يعترض مشان التدخين بالمكرو موضوع تاني اما اذا كان لانه هو مدخن مثلا وما عم يقدر يدخن لانه صايم ، فهي مصيبة المصائب ، نحن بلد فيها طوائف كتير واديان متعددة لذلك لازم نعمل حساب الاشخاص اللي ما هنن من نفس الملة تبعتنا ، كمان موضوع احترام رمضان والناس الصايمين برمضان من طرف الناس اللي ما هنن صايمين او حتى ما هنن مسلمين ، فهي الشغلة بترجع للشخص نفسه ، انا عندي اصدقاء مسيحيين ، ومدخنين كمان ، برمضان بالذات لما بكون الواحد منهم بده يدخن كان ينسحب ويدخن هالسيكارة ويرجع ، وبصراحة كنا نشوفها لفتة حلوة منه ، مع انه هو ماله مضطر لحتى يعمل هالشي وما بيزعجنا مثلا انه يبقى عم يدخن وهو معنا ولكن هي شغلة اخلاقيات ، بنفس الوقت في كتير ناس بتعمل الشغلة مجاهرة وقصدها انه شو ؟...يعني تفرجيك انه هي عم تاكل وتشرب وانت ما بتقدر لانك صايم ( وطبعا كل الحركة مالها طعمة لانه انت اذا مقتنع باللي عم تعمله ما حدا بيقدر يأثر عليك ) .
هلق المشكلة انه لما واحد بكون بده يوجه نصيحة لشخص تاني مشان تصرف معين (او متل بحالتك هون مشان يحترم الصايمين على حسبته ) وبكون اسلوبه في جفاء وتعدي على التاني اكيد هاد بيعمل ردة فعل قوية وممكن اللي قدامه يصطدم معه ويعمل اللي بده ياه " مجاكرة " ، الرسالة اللي منحب نوصلها انه يا اخي الدعوة الى اسلوبها وبتكون بالكلمة الطيبة والاسلوب الراقي يلي بخلي اللي قدامك يحترمك لطريقة طرحك للموضوع ، هاد طبعا لما يكون ما في تعدي من طرفه ، يعني هو حر باللي بده يعمله .
بس نقطة صغيرة حبيت قولها . حتى المسلمين اللي بكونوا مفطرين برمضان لسبب من الاسباب ، فهنن واجب عليهم انه ما يظهروا لبقية الناس انهن مفطرين ولما بدهن ياكلوا او يشربوا يكونوا لحالهن حفاظا على مشاعر الناس الصايمة .
اما بالنسبة لغير المسلمين فما نحن اللي منجبرهن انه ما ياكلوا او ما يشربوا لانه هنن احرار ، ولكن لما منشوف منهن بادرة لمراعاة شعور الصائمين فهي بتكون لفتة حلوة منهم ومنقدر الهم هالشي هاد وبكون تصرف بنم عن اخلاق عالية .
The Saddest Thing in Life Is a Lost Talented Man
----
كلما رحبت بنا الروض قلنا ... حلب قصدنا وأنت السبيل
----
بالمسدس ... تحل كل المشاكل...