[SABE]

السلام عليكم جميعاً ...
أول شي بحب قول أنا ماني من المهتمين بهالنوع من المناقشات و الحوارات هاي ...
يلي بياخد حتى ولو نظرة سريعة على المواضيع يلي عمتنطرح بهالقسم بيقدر يحصل على معلومات كافية على مستوى المناقشات العالي يلي عمتنطرح هون .. و بحب إشكر الكل على هالشي ...
بس بالنسبة إلي ما عاد قدرت ضل ساكت أكتر من هيك .. يعني والله العظيم عيب و ستين عيب .. عيب على الواحد مننا يفكر بهيك شغلات و يروح ساعات من وقتو العظيم مشان يثبت للتاني إنو إنت كذا و كذا .. و التاني مشان يثبت العكس .. و كلو بخصوص الإعتقادات و الديانات .. يعني بشغلات لا تقبل المجادلة عند قسم كبير كتير من الناس !!!
يا جماعة نحنا سورين .. بعتقد بتعرفوا شو يعني سوريين .. و كمان بتعرفوا وضع سوريا بين باقي الدول خصوصي العربية .و خليني إحكي بصراحة أنا ما لفتلي نظري الوضوع لحتى إجيت لهون ..
خلينا نبسط الأمور على الآخر و نحكي عن صف عادي بمدرسة إبتدائية عادية ...منشوف أولاد من كل الديانات و الطوائف بيحكوا مع بعض .. و بيلعبوا طابي مع بعض ... بيضحكوا مع بعض و بيرجعوا على البيت مع بعض...
في أحلى منها ؟؟
الله الوكيل الواحد لما يشوفون بهالحالي بيضل عندو أمل بالمستقبل .. بيضل في عندو حلم إنو هالطفلين يلي هلأ سوا بالمستقبل بدون يضلون سوا و بدو يكون عندون أهداف و طموحات وحدة !!!
بس المصيبة لما يوصلو للمرحلة الإعدادية .. ما بدي قول الثانوية أو الجامعة ..شوفوا شو بيصير ...
إقرأوا المواضيع و النقاشات هون بتعرفوا شو عميصير ..
بيبلش المجتمع الغلط يأثر عليون, بصير جورج ماعاد يحكي مع محمد .. و أحمد ما عاد يعترف إنو عندو رفيق إسموا ميخائيل ..
ليش ؟؟؟
ممكن إفهم ليش ؟؟؟ أو حدا فكر شي مرة ليش ؟؟؟
ليش الأخ الخليل السابع (( مع إحترامي طبعاً )) عميكتب و ينزل هيك مواضيع للحوار ؟؟؟ ما بعرف إذا فيها شي أسلس من المنطق ...
أخ خليل إنت هدفك بس تشكيك الناس بدينون ؟؟ أخي إسمع . أنا ما بدي حكيك من القرآن و لا من الإنجيل .. أنا و انت منفهم عربي و خليا نحكي من هالمبدأ .. لا أنا شو ديني و لا انت شو دينك ..
عند العرب بيقولوا (( من عاشر القوم أربعين يوماً صار منهم )) يا أخي الكريم كيف و الإسلام و المسيحين العرب صرلون مع بعض أكتر من ألف سنة ؟؟؟ يعني كام أربعين يوم بيطلعو هدول ؟؟
و هلأ و بهالوقت يلي نحنا في بحاجة إنو نكون قوم واحدعمنتناقش بهيك مواضيع عقيمة !!!!
و لكل اشباب و الصبايا يلي ردوا على مواضيع الأخ الخليل السابع .. (( كمان مع الإحترام )) مشكورين على غيرتم على دينكم و الحماس المنقطع النظير للدفاع عنو ..
أنا ما بعتبر هالشي غلط يا عمي معكون حق .. و الله العظيم معكون حق .. بس بس إذا السمكة شافت طعم .. كمان بدا تلحقوا و تاكلو .. ليش لحتا نحنا كمان ناكل الطعم ؟؟ يلي ما بدو يوصلنا بالآخر غير على المصيدة ؟؟؟
هاي الشغلات هي طعم بحد ذلتها .. و نحنا أحلى هدية منقدمها لكلشي ضد العرب إنو ناكل هالطعم ..

إذا الواحد أخد نظرة عامة على المجتمع و على الكتابات يلي هون بيشوف بسهولة (( طبعاً الله يعطيون العافي الشباب )) الشب المسلم عميقرأ بالإنجيل و الشب المسيحي عميقرأ بالقرآن ..
بس إذا دققنا أكتر منكتشف كمان بسهولة إنو الأغلبية عمتقرأ هالشي بهدف (( إعرف عدوك )) ...
ما حدا ضد مبدأ الإطلاع على ديانات الغير .. بس ما بهدف كشف الأخطاء و تكذيب إعتقادات الدين الآخر ...
برجع مرة تاني للسؤال (( ليش )) ؟؟؟؟
ليش الواحد ما بيفكر مين العدو الحقيقي؟؟و أنا قلت (( يفكر )) و ليس (( يعرف )) لأنو الشغلة معروفة وواضحة ..
بدل الواحد ما يروح هالوقت على المقارنات و إثبات كظريات .. ليش ما بيقرأ عن الوضع بفلسطين يلي ما منقدر نشوفوا على التلفزيونات ؟؟؟
عن الوضع بقطاع غزّة ... عن أفكار إسرائيل المستقبلية ... و لوين ناوي توصل ....
عن أفكار أميركا بالعراق ...و كمان لوين ناوي توصل ...
هدول إسمون حروب على الأمة العربية ... و ما إسمون حروب على الأمة الإسلامية ... و كلنا لازم يكون عنا موقف من هالمواضيع .. ما و الله أنا عندي موقف ضد الطائفة الفلانية أو ضد الدين الفلاني ...
و آخر شي بدي قول إو الحياة هي موقف حق و كرامة ... و بس...

لا تأخذوني يمكن حكيت كتير .. بس لأني ما عاد إقدر إسكت علىالشغلات يلي عمبقرأها.. و بتمنا إنو نستفيد شوي من الشغلات يلي قريناها هون .. و نحاول نطبق شوي منها ... و مشكورين ...

سلامات ...