طيب شباب .. انا من النوع يلي ما بحب يلت ويعجن بالسيرة كتير ... حكيت رأيي وحكيت يلي عندي وتناقشت فيه مع كتير عالم
بس كم نقطة حابب وضحهن :
- يلي معتبر انو التبويس والمدري شو بالطريق .. لازم يصير كتير شي عادي بـ سوريا ... فهاد رأيو ... مع العلم انو نحنا بسوريا طول عمرنا شرقيين وانشالله منضلنا هيك ..(وهاد رأيي ) .
وازا عم تول انو الغربيين اخترعوا الاجهزة والكومبيوتر فهاد شي كتير حلو ..ولازم نتعلم منن ... بس مو ضروري نتعلم منون ... انو نبوس بعض بالشارع بداعي الحب ... بتوقع انو لازم يكون في شوية خصوصية بالعلاقة الجنسية او عالقليلة شوية احترام للحياء العام .... مو معناتها ازا واحد ما باس حبيبتو او مرتو بالشارع .. هوي مو من البشر .. متل ما زكر ناصر !
- بالنسبة للمسلسلات .... حكيت بل انو ممكن توصل فكرة التوعية بدون هيك شي ... لأنو اغلب الاوقات بتكون الشغلة مالها طعمة ... يعني بيكفي انو تول وحدة عم بتخون جوزها ... بدون ما تورجينا فعل الخيانة متل ما هوي ..لأنو هالفعل واقع !
- بالنسبة للمواضيع يلي لت انو عم تنطرح بالمسلسلات كتير ... فا انا ماني ضد الموضوع ... انما ضد الكترة ... انو يا عمي ما صفي مواضيع شاغلة بال السوريين غير الخيانة الزوجية ... او العلاقات غير الشرعية (بنظر المجتمع)؟
- بالنسبة لكلمة (ابن زنا ) فا انا ضدها واصلاً ما بفكر فيها كتير .. بس انا قلتها هون لأنو للصراحة ما لقيت كلمة رديفة ... قلك (ابن حرام ) مثلاً !! .. ما بتركب معي والله !
-بالنسبة للملسلات مرة تانية ... انا ما عم ول انو لازم يشوفوها الاطفال وبعرف انو هيي غير مخصصة للاطفال ...بس هالمسلسلات بالنهاية عم تفوت عالبيت .. وعم تنحط وقت الغدا ووت الفطور وبوت السحور والعشا ... يعني يلي بيكون فيها جمعات عائلية ممكن الاهل يكونوا عم يتابعو شي مسلسل من هالمسلسلات فيها ... ازا بدك تحط الحق والمسؤولية عالاهل ...لأنو شافوا ولادهن المسلسل فا مصيبة ...لأنو مو دايماً بتزبط !
- بالنسبة انو ليش هالشي مسمو بالافلام وبالمسلسلات لأ ... سموح بالافلام .. لأنو غالباً المشاهد السخانة يلي بالافلام .. بتنعرض بالسينما ... ! يعني هالمكان عم تروح عليه باختيارك وازا شي فلم ممكن يكون فيه هيك مشاهد فا انت بتتحكم ازا بيروح ابنك او لأ ... اما بالبيت .. فا في صعوبة كبيرة انو تتحكم بالمسلسل يلي طالع وانو تخلي ابنك يتفرج عليه او لأ ! ... بدك تللي في افلام عم تطلع بالتلفزيون ... اي بلك نص المحطات يلي عنا بتشفر هالشي متل الام بي سي او دبي ون ... فا وين بدو يطلع هيك مشاهد ! 
- في نطة حكتها معي (سوزان ) انو من شدة غباء بعض الاهل .. ممكن يتركوا ولادهن عم يتفروا ع مسلسلات سورية ويطلعوا ...على اساس ما في شي متل المصري او الاجنبي ... بس يلي عم بيصير انو في مواضيع مو خرج الصغار ... في المشاهد يلي زكرتها كمان مو خرج اطفال !
-بالنسبة ليلي عم يللي شيل المحطة وت يطلع هيك شي ... بقللو شكراً لنصيتك وانا عم اعمل هاد الشي .. بس انا بالنهاية انسان سوري وبتوقع انو بيحقللي انتقد الفن او الدراما السورية ... وعبر عن رأيي فيها .. مو ؟؟
- نقطة أخيرة : نحنا بسورية ..ناس شرقيين عنا عادات منيحة وعنا عادات سيئة ... بتمنى ثم اتمنى انو تضل العادات المنيحة موجودة .... بمعزل عن العادت السيئة !
هادا رأيي ويلي مقتنع فيه تقريباً (تقريباً لا يعني انو مو رأيي ولكن يعني اني ماني متشبث فيه ) وبس 
الكلُّ سفّاح و ابنُ سفّـاح
.
القومُ أبناء القومِ يا صــاح
.
عندهم الدّينُ زهقُ أرواح
.
والذّبحُ للنّاس نهجُ إصْلاح
|