الأرض
الأرض
بحبك يا ها الأرض
بحبك أنا وسع الأرض0000
وأكتر مافي بين البشر
رضى 000 وزعل
وحب وبغض
أنا بحبك يا هالأرض 0000
------------
بغار عليكي
أكتر من عاشق ضيعجي
أبجديتو خبز التنور وأوف الرعيان
وصبية سمرا ممشوقة
وصلو جدايلها للأرض 0000
بغار عليكي
غيرت جندي عَ بارودي
مسمي طلقاتا ولادو
وهوي وهي بأسم الأرض 0000
وعايشلك عيشة ناطور كروم العنب
بعز الموسم
وكرومو عناقيدا شهوه
وعيونو من خوفو عليكي
ما بيدوقو طعم الغمض
أراضي كتير بها الأرض
فيها حنطة و وجع وفرح
وجبالا وصحرا و وديان
فيها بيوت
شي عم يبقى --- شي بيموت
شي من رمل --- شي صوان
لكن هالأرض اللي بنزرع فيها الإنسان
بيطلع إنسان
بتكون لألنا هالأرض
يا هالأرض
اذكري شو كنتيلي مخدة
أنا وراجع من هدير العب البري
ومن حنان الشمس الحدة
وخدك ، ضمو ، على خدي
ورعشة تمرق ،
متل الما بعرف سميها
بكرا بيسموها بعدي
ويمشي ترابك بعروقي
عالهدى يمشي، يسافر فيي
وعند محطة قلبي يهدي
يغار 00يجن، ويرجع يهدا
لما يلاقي كمشة منو
ربياني بقلبي من مدة
بتذكر يا أرض بلادي
قالولي : بعد الولادة
الداية ( أم ---) الختيارة
حتى يعيشو عَ إيديها ولاد الحارة
تملحهن بتراب الأرض
ولما نوقع ع المساطب
كانو أهل الحارة يرشو
عالجرح ، منتراب الأرض
ولما الوجع، يشد ،ويمرق
عَ سواعد أهلي المشقية
كان الدوا، تراب الأرض
بذكر- لاكن من زمان
لما بو الياس الطحان
سافر لأنو جوعان
لملم حالو وهجر الضيعة
صرولو : خبز التنور
وشروال، وكمشة بخور
وحتى يرجع ،
ربطولو بطرف قنبازو
(هالقد) من تراب الأرض
كنت زغير
ألعب ع مسطبة الضيعة
بالدويخة ،، وبالفينيش ،،وبالمقليعة
أمي تناديلي يا أبني
خود الزوادة لبيك
قلا، ليش وينو بيي
تقلي، بالأرض
وهي مهموكة تا تخلص شغلة
وينك يا أمي ، عالأرض
وتقعد هي وبيي تقعد
هي تنشف عرقو 00 وهوي
يحكيلا عن حب الأرض
أمي تغار ، يقلا : اعقلي
أنت حلوه
لكن، بيني وبينك ،مافي
مافي أحلى من الأرض
وعند المسا
لما يرجعو ع الضيعة
يولد سؤال وسؤال
كيفا يا بو فلان الأرض ؟
وكيفا يا أم فلان الأرض ؟
وأنا زغير كنت محير
الأرض اسما أمي وبيي
ولا هني أسمن أرض
يا هالأرض
يا سفر أهلي وأجدادي
وشهدا بلادي
يا نشيد تعلمتو أنا وصغير
ورح ربي عليه ولادي
يا أم الم بتعرف تزعل
صدرا كبير ،وبالا أطول
مافي طفل وما عمرو عَ صدرك بيت زغير متلو
وحفر على شباكو أسمو
مافي صبية ، وما حنت أيديها
ب ليلة عرسا
وحنت رفقاتا
حتى رفقاتا ما ينحر مو
ما في مهرة ، وما رقصت هي والعنبرة
مافي شجرة ، وما راحت بترابك سفرة
وسفرا 000 وسفرا
ما في سيف وما تجلخ عَ حجارك
مرة 00وألف مرة
ما في جندي بوطني إلا
يا بجيابو !! يا بالخوذة
في شي من ريحة هالأرض
وبعدو حدا عم يسأل: ليش
وطني عم يندر ولادو
شهدا لشبر من الأرض
مرة قاعد أنا وجدي
متكي وعامل كوعو مخدة
وعمرو ، مابين الأرض، وبين الأرض
يحكيلي
أستغرب !!
يزعل،، حتى صدق :
يحلفلي بتراب الأرض
يقلي : وحياة ال بالأرض
وبمعزة ، كل اللي راحو
كرمال محبة هالأرض
ويا خدني الفرح من حالي
لما جدي يضوج قبالي
يحتد يقلي : يا أبني
الأرض الأرض
ما اسمعتن لما بيقولو :
( أنا ماشي بأرض الله )
ولك ياجدي ......
حتى الله عندو أرض !!
هي الحياة كل شيء فيها ممكن..ولا شيء فيها ممكن أن يكون.
..East..or.. west,,home is the best
|