مسلسلات البيئة الشامية إذا صح التعبير هي عبارة عن حقائق بنسبة 10% والباقي إضافات من الكاتب والمخرج هدفها الأول والأخير الربح..
يعني باب الحارة والشام العدية التنين كاتبهن قاووق التنين بتحس إنو في شغلات ما بتدخل بالعقل بالمرة يعني عبارة عن شوية كذب مع بهارات بطريقة يخلو هالعالم تتعلق بالمسلسل وبالتالي زيادة الإعلانات ومصاري أكتر
عم يستغبو العالم عم يألفو روايات وأساطير من هالمسلسلات المنطق غايب عنها بشكل كبير
يعني وين مسلسل أيام شامية وليالي الصالحية ووين الخوالي ووين هلأ باب الحارة قديش في فرق بين هالمسلسلات هي
بس خلص بسام الملا عمل عقد مع المسلسلات من هالنوع وحالف يمين ما يتركها لحتى يطلع كلشي إمكانيات بالخرط والتأليف بهالنوع من المسلسلات
مبارح شفت حلقة من مسلسل إسمو الحصرم الشامي هاد المسلسل حصري لأوربت ولسا ما نعرض منو ولا حلقة على أي قناة تانية حسب ما فهمت...
المسلسل هاد بيحكي عن فترة الأغاوات بالشام والجماعات الي كانت موجودة بهديك الفترة إلي هي الوالي العثماني وجماعتو و العسكر والأغاوات للصراحة في أشياء شفتها بالحلقة الأولى قاري عنها قبل بكتاب بيحكي عن الشام يعني في شيء من الواقعية هالمسلسل
إلي بيحب بعطي الموقع إلي نازل فيه حلقات المسلسل هاد
أنا الدمَشقي لو جرحت جسدي .... لسال منه عناقيد وتفاح
|