كلام على العين و الراس بس بالنهاية مجرد عذر لفشلنا كشعب انو نسعى نحو حريتنا
معقول نحنا ما منستاهل؟ يمكن
انا يلي بعرفو انو اذا الشعب يوما أراد الحياة فلا بد ان يستجيب القدر (صح هالبيت احيانا بينتسب زورا للشاعر أبو القاسم الشابي)
بس نحنا مو عبارة عن شعب واحد.. نحنا عبارة عن قبائل و عائلات و مدن.. مقسمة على بعضها عرقيا و دينيا و طائفيا و لغويا
هيك هوشة من البشر بعمرها ما رح تقدر تنهض كرجل واحد.. نحنا مفرقين كتير للاسف
ممكن نلوم الحكومة لأخطائها.. بس انا برفض بشدة انو نلومها كمان على فشلنا بتحقيق حريتنا
شعوب باقي العالم احسن منا بشو؟ الايرانيين انقلبوا على نظام الشاه و على شوي كانوا رجعوا انقلبوا على النظام الاسلامي
كتير شعوب قدرت تنهض و تغير مصيرها
بس نحنا عنا امراض اجتماعية مستفحلة جدا و تخلف و غباء شديد.. هالشي الحكومة ما إلها علاقة فيه
شلون الفرنسيين الرعاع بيثوروا على نظام ملكي متوحش و متمكن و نحنا متل الخواريف؟ ليش؟ معقول نحنا لهل درجة جبناء و منحب الحياة (على المدى القصير)؟
كيف الايرلنديين قدروا يتحرروا و يحصلوا على دولة من انكلترا؟ انكلترا يا اخوان.. من اقوى دول العالم مخابراتيا
الشي البيخوفني انو لما ترجع لتاريخ سوريا كله.. ما بتلاقي ولا دولة سورية مستقلة. كل عمرنا جزء من دولة تانية او دويلات صغيرة.. و الشعب ما إلو إرادة. كيف ممكن مثلا مجموعة من القبائل العربية تقدر تحتل كل بلاد الشام؟ السريان سمحوا للعرب المسلمين بدخول سوريا و عطوهم مفاتيح دمشق و نصبوهم قادة.. و العرب بعدين عطوا مفاتيح دمشق للمغول.. و الاتراك صاروا خلافة اسلامية ل400 سنة... بقى هل ممكن شي يوم نقبل بفكرة انو نحنا مجرد شعب كسول مادي و خانع؟ و الله الشعب يلي عندو مثل "مين ما بياخد أمي بقلو عمي".. ما بستبعد عنو هيك فكرة
انا شخصيا برفض هالفكرة المتشائمة الكريهة بس ما عندي جواب تاني شافي كافي... و بنفس الوقت برفض اني حط الحق على مجرد كون الحكومة السورية مانعة الاحزاب و حاطة قانون الطوارئ لانو واضح انو في كتير شعوب قدرت تتحرر من ظروف اتعس من هيك بمليون مرة
يعني الحكومة الحالية بكل سيئاتها و عدم كفاءتها .. صارت داخلة بنسيج المجتمع بشكل قوي و متل ما قلت بمشاركة سابقة إلي.. ما عادت جسم غريب فيك تفرق بينو و بين الشعب.. التداخل قوي جدا و يلي بينكر هالشي بيكون عايش بالوهم
اذا بدي اشطح شوي بخيالي و فكر بالحل.. فالحل الوحيد هو عن طريق الثقافة و التعليم و ترك العادات الدينية العرقية البالية.. يعني انو فجأة نفيق شي يوم نلاقي السوري صار سوري فقط.. و مو سوري سني او علوي او كردي او مسيحي.. ما بقى في ابن ضيعة و ابن مدينة و شامي اصلي من جوات السور و شامي تقليد من برات السور.. الكل متساوي و الكل شايف نفس الهدف.. وقتها هه.. في أمل
هالشي بيتطلب صحوة داخلية و مواجهة لنقاط ضعفنا الحقيقية.. بتطلب انو المثقف السوري اول شي يعرف المشكلة الحقيقية و يبطل يحط الحق على الحكومة و "النظام".. هالشبح الشفاف الغير موجود.. بس نعرف المشكلة و نقدر نكتب عنها و نقدر نوعي الشب.. يمكن شي يوم نشم ريحة جمهورية سورية مستقلة و برلمان حقيقي و ديمقراطية
و بالنهاية بحب قول لعنصر المخابرات يلي عم يتابع النص انو منحــــبك و انا مجرد ناقل لرأي صديقي يلي قاعد جنبي و اسمو الثلاثي جاك عدنان حوراني تولد السويداء 1982 حنطي البشرة بني الشعر.. انا مااااااا دخلني
