[محمد ابراهيم]

انت خدعتني
قلتلي مابيهمني المصدر وهلئ همشت المصدر (مع ان من الاول خبرتك انو اميركي )
طيب المشكلة ان المصادر الرسمية السورية بتحدد نسبة المسلمين اجمالا ونسبة المسيحيين اجمالا
مافي مجال تطلع ارقام رسمية بنسبة كل طائفة اسلامية . الا اذا حدا من الشباب الواصل بيعرف الارقام ومتكتم عليها

كاتب النص الأصلي : ayhamm26

قلتلي ما دخلك ما, اي راحت عليك خلص كشفنا واحد عميل عم يوهن نفسية الامة في هزا المنتدى

ورحمة جوز خالتي غرضي الاول والرئيسي هو الانتباه لقوة الاخوان وان احتمال وصولهم للسلطة بظل وجود النظام الحالي هو احتمال قائم ولكنه سياخذ وقت و مراحل .
"وقد يلوح في الافق غدا ما كان بالامس غائبا "
هاد موضوع كبير وبدو موضوع مستقل للحديث عنو
بس القصد ان قد يكون في تغييرات بسيطة رح تصير بالمستقبل القريب في السياسة الداخلية للنظام نتيجة التعاون الذي قد يحدث مع اميركا واوربا .

اول شي , خلينا ما نختلف على الاعداد, لانو من الصعب برايي نحكم اذا كانت الاعداد اللي بالمقال صحيحة او الاعداد اللي انت جبتها بهدا التقرير صحيحة. خلينا نتفق على حقيقة ثابتة انو في بهالبلد أغلبية , بغض النظر 70 بالمية , 75 بالمية ما بيهم.

صدقني مارح تشكل فارق 70 من 75% بس الفكرة اني حسيت ان الكاتب بدو يقول ان للاخوان مافي فرصة ، اسمحو الون طالما مافي الون فرصة ، لاء هننى الون فرصة ونص .
فلذلك تحليل الارقام اللي اوردها كانت مبالغ فيها بضد صالح الاخوان ورقيا "نظرا لانها بالمقال" ولكن على ارض الواقع رح تكون مع الاخوان ، شو اسم هاد اذا ماكان حقنة مخدر ؟

في شغلة مهمة هون, انو نحني عم نفترض انتخابات حرة بعد زوال النظام الحالي, لانو يستحيل تحصل انتخابات ديمقراطية بالواقع الحالي , يعني السيناريو اللي صار بغزة انو الناس رح تنتخب الاخوان ليخلصوا من النظام ما بيمشي هون.
طيب ممكن اسألك من تقصد بالاخوان؟؟ جماعة صدر الدين البيانوني مثلا؟؟ برأيك هدا لو عاد لسوريا حاليا رح يكون الو شعبية؟ معقول يحصد الاغلبية باول انتخابات تصير, شو هو صار نيلسون مانديلا مثلا؟ ليش مين بسوريا بيعرفوا؟؟ اه صحيح تعرفوا علي من صورو مع عبد الحليم خدام.

يا أخي السنة في سوريا مو كتلة واحدة متجانسة, فيهم المتدين جدا و الغير متدين ابدا, و العلماني واليساري , و الصوفي ومن المستحيل حزب واحد يقدر يخلي كل هالعالم تصوتلو, طيب لقلك على شي, الاكراد حسب بعض التقديرات بيطلعو فوق المليون ونص وهدول محسوبين طبعا على الاغلبية ومعروفين انن ما الن علاقة بالاخوان طول عمرن.

بخصوص مين الاخوان ، اترك الاشخاص وركز عالفكر ، ممكن باي لحظة يطلع الاخوان كوادر جديدة (ورح تحمل نفس الفكر ) ويدخلو فيهون انتخابات تشريعية ويحققو اغلبية
بتقول الاكراد مارح ينتخبوهن ومدري مين
طيب ما كل قومية او طائفة على اسوأ الحالات بالنسبة للاخوان رح ترشح منها من يمثلها ورح تتفتت قوة هالقوميات او الطوائف
ومارح تنتخب مرشحي النظام يعني الكردي رح ينتخب كردي وهكذا وتبقى بالنهاية امام قوة وحدة كبيرة هي الاخوان ،
المشكلة بوجهة نظري سياسيا هي الموجودة بمصر سياسيا والموجودة بغالبية الدول العربية ،
مافي احزاب قوية مافي احزاب الها قواعد شعبية ومافي احزاب مؤثرة ،
وتكلفة عدم وجود احزاب قوية باي دولة قد يكون تنامي الحركات الدينية سياسيا وتحقيق سيطرة شعبية في بعض المناطق .

طيب الاخوان هدول لما كان بسوريا انتخابات عن جد بالخمسينات واوائل الستينات , كم نائب قدروا يوصلوا على البرلمان؟؟ بعمرن حصلوا على الاغلبية؟

هاد نهاية العصر الذهبي بالسياسة وانظمة الحكم الديموقراطية ومافيك تقارنو باي عصر لاحق ، بهالعصر كان اللي يرشح خالو على اساس ديني مارح يتميز لان معظم الاشخاص بكافة الطوائف كانت تعمل من اجل الوطن وليس من اجل احدى طوائف الوطن او من اجل مصالحه الشخصية ،
يارجل عمرك شفت رئيس عربي ببترك الحكم لرئيس تاني ومن دولة تانية غير دولتو " فقط لانه شايف هاد بصالح دولتو وشعبها !! " وين رح تلاقي متل هالرجل ، اللي بالاصل ماورث الحكم ولكن تم انتخابه بارادة الشعب "يعني محبوب ومرغوب فيه وبيحظى بثقة الشعب " مافيك تقارن ابدا .