[صياد الطيور]

خليني رد عليك يا كريم ويا أبو النسيم رغم انو كل هافترة كنت عم حاول ما فوت بهالموضوع ...
الطائفة العلوية ... مين هية ؟
كتير من الناس بتجمل كل أهل الساحل بالطائفة العلوية ...رغم انو في بالساحل السوري أكتر من 20 طائفة ما بتشكل العلوية منها ألا أقل من ربع عدد السكان .
والشي الي ما بتعرفوه أنو العلوية من أفقر الشعوب بسوريا ,اذا كان في عدد من الضباط اتسفادو من مراكزهم فهادا مو معناه أنو كل الطائفة علوية أغياء أو حرمية متل ما ذكرتو ..
أنا ما بنكر أنو مافي مسؤولين فاسدين بالطائفة ...بس كمان كل الطوائف التانية ومن دون اشتثناء فيها هالفساد وبنسب أكبر ..
تعدد الطوائف بالساحل السوري سبب الكتير من المشاكل ...واهمها السمعة السئية الي جابوها لهل الطائفة بسبب بعض التصرفات الرعنة من بعض المسؤولين من باقي الطوائف ...وكلو تحت مسمى ( علوية )
طيب ..كل ما واحد حكا بالقاف وقال قرد صار من العلوية ؟؟؟ ما أهل الدير كلهم بيحكو بالقاف !!
وكتير من الشخصيات وحتى ما كانت تحكي بالقاف صارت تحكي حتى تسهل أمورها ... وكلو بسبب جهل المواطن ..وصارت تستغل اللهجة بس حتى تحقق أهافها البغيضة

بيت الأسد يا سيد كريم معروفين بأنهم من الأغنياء قبل ما يوصل حافظ الأسد للحكم ... شيخ الجبل الي عم تحكي عنو من أقذر الشخصيات أنا معك ..( وأنا بعرفو شخصياً )
بس هادا ما بيمحي بقية العائلة ..في منها المنيح وفي العاطل ..وهالشي بأي عائلة كانت ...
مو كل العلوية استفادو من علوية حافظ الأسد ولا حتى ربعهم ... على العكس ..كتير تمنو لو يستلم أي شخص تاني من غير طائفة ويحكم سورية ويعمل شوية مشاريع لألهم ...
حافظ الأسد ما عمل شي للطائفة العلوية بشكل خاص ...على العكس ...كانت أكتر محافظة مهمشة فنياً هية اللاذقية حتى ما يقول أنو عم يزبط مدينتو .. وبقيت المحافظة اكتر من 10 سنين بدون أي عمل عليه القيمة يفيد هالشعب ...
ضيعتنا الي فيها أكتر من مسؤول وأكتر من ضابط رفيع المستوى لهلأ ما فيها مياه الشركة ...منجيب المي بالصهريج ..لأنو مي الشركة بتوصل كل 3 أيام مرة ...
المناصب بسوريا ما كانت حكر على العلوية وخاصة بالوزارات ...
بس الجيش أي كان عماد الجيش هو من الطائفة العلوية ...بس ليش كتير من ضباط الجيش والمخابرات وعناصرها من الطائفة ؟؟؟؟
لأنو هادا أكبر دليل انها طائفة فقيرة ... انت لو معك الأموال والجاه والعز ..شو قي بيخليك تخدم بالجيش ...
جدي كان عندو 5 شباب ... وعندو قطعة أرض عاش من وراها ... كبروا ولادو ..شو بدهن يدرسوا .... مستواهم الدراسي ممتاز وفي منهم أكتر من ممتاز ... بس شو الحل ...مافي مجال يدرسو جامعة على حسابهم لأنو تكاليفها أكبر من أنو يتحملها جدي ..
اتجهوا للجيش والتطويع الي بيوفرعليهم مصاريف الخدمة الألزامية ..بيأمن مستقبلهم بأقل التكاليف الممكنة .. مصروفهم ماشي وهنن عم يدرسو ..بينما جدي مارح يقدر يدرسهم على حسابو ومارح يقدروا يعيشوا على حساب الأرض الصغيرة الي ربيو من وراها ..
فقرروا الإتجاه نحو الجيش والمخابرات ... واحد منهم نفد وقت طلع الأول على المحافظة بالبكالوريا وعطوه منحة أيام الأشتراكية وراح درس بهنغاريا هندسة وما رجع حتى خلص دراستو لأنو بدو يوف مصاريف الروحة والرجعة ..
ووالدي .. وهي أول مرة بدي أحكيها ..لؤاء ومن أفضل وأنضف ضباط الجيش ... ما خلانا ننحرف ونلحق السوق ..
وهي أنا درست الجامعة وتخرجت وعم اشتغل بالسعودية حتى كمل الخمس سنين وادفع البدل .. مع انو لو بيقصد والدي ولا عمي ولا خوالي ...كنت بخدم أروع خدمة ..بس لاهنن بيرضوا ولا أنا ..

آسف على الحديث عن الأمور الخاصة بس الشمولية مو حلوة وحبيت اعطي توضيح عن الفكرة الغلط المأخودة عن الطائفة بسبب بعض الأقليات السلبية ..
ما بحب جدي أكتر من محبتي لحافظ الأسد رغم أنوحافظ الأسد ما عملي شي ...على عكس ابن اخوه هارون ولا شيخ الجبل ولا حيدر الي استفد منهم كتير وفادوني كتير ...بس مافيي ألا أنو ألعن هيك شباب وادعو برحمتك يا حافظ الأسد ..لأنو برأيي كان حكيم وقائد تاريخي ..هادا رأيي وأنا ما عم افلاضوا على حدا ... ولا عم اشتم حدا ...وكل واحد بيحب وبيكره متل ما بدو ..
مع حبي وتحياتي للجميع وآسف مرة تانية على الإطالة ...ولتبقى سوريا حرة للأبد