[The morning]

شوش ...

أهلا أهلا ابو سارة

شو قدمتلك أخوية ؟

أخويه قدمتلي كتير .. ساعدتني كتير بأنـّي نمـّي أفكاري و اعرف شو بدي اكتر من الحياه .. ثقافيا ً ساعدتني أيضا ً ..
قدمتلي صداقات و ناس أغلى عندي من كتير ناس بعرفهم على أرض الواقع ..
أخويه قدمتلي كمان وعي لبعض الأمور المتعلقة بسوريا
بالنتيجه لاقدر اعرف جاوب على هيك سؤال بسأل حالي هل حياتي بدون وجود أخويه كانت رح بتكون ماشيه بالشكل اللي هي حاليا ً ماشيه عليه ؟ و الجواب بيجي لاء كبيرة و بشكل كبير لذلك في فضل كتير لأخويه عشوش ..
و متل ما قال ابو طوني انـّو هوّ تغيـّر من خلال قراءه افكار الآخر و التواصل وهالقصص فأنا أيضا ً بحس انو من عطتني فرصة أكتشف اشيا كتير بالحياة من خلال ناس بعضهم وهمي بالنسبه لي كونه مافي ادنى نوع من التواصل او حتّى مابعرف اسماءهم .. لذلك وقت بيجي شخص و بيقلك المشرفين و الاعضاء و ما اليه .. انا بحس بستفيد من الأعضاء اكتر من ما بستفيد من المشرفين و هالشي حتّى قبل ما فوت بالاداره ..

و من يومين بس كنت بصدد ذكر أنـّو أخويه بالسنه الأخيره قدمتلي خبرة التعامل بنقدر نسميها خبرة زجاجية - مابعرف ليش هيك طلع معي اسمها - .. يعني انـّك تقدر تتعامل مع ناس مناح كتير و ناس سيئين و ناس وسط و ناس صادقه و ناس عارف انت بأثناء حديثك معها انها مش صادقه و ناس آآآه و ناس ( الحقوق محفوظه للوسوف )

بس بالمقابل أخوية أخدت مني ، شي بسيط لا يقدر باللي قدمتلي لكن يبقى وقت و جهد و تسالي ..

و الى اي مدى رح تحسي انو "خلص" و ما تكملي فيها ...

همممممممممممممم ..

يمكن أكتر شي مناسب قوله اليوم هو اني بقول خلص و ما كمـّل وقت بحس بطـّل في هدف او بطل الهدف عم يعمل تأثير .. لكن الأيام ممكن تفاجأنا كتير على الطريق ..


اذا بيوم من الايام كنتي بمقابلة فنية ممكن تذكري أخوية كعامل مؤثر فنيا ؟

هاد اكتر سؤال حبيته بكل مقلاياتي لحد اليوم ..

اكيد ممكن ، أخوية شـجعتني كتير لاطلع كتير على فنانين و اساليب فنية و غيره .. ساعدتني كتير ( فنيا ً ) و بكون فخورة أنـّي اذا بيوم من الايام صرت معروفة فنيـّا ً اني اذكرها ..


كـَ مهندسة عمارة مستقبلية ..

احم احم

شو رايك بفن العمارة السورية بشكل عام و تتخيلي متميزة عن باقي الشرق الاوسط ؟

للصراحه العماره السورية القديمه ( ايام الاتراك و من ثمّ الفرنساوين ) كانت متميزه أكتر بكتير كان الها طابع مميز (( مستورد بعض الشيئ لكنه ذو هويه أكتر من اليوم )) .. العمارة السورية اليوم هي عباره عن تقليد نوعا ً ما للعمارة بالخارج و مافي شي بميزها يعني ما بتقدر تقول انـّو تشوف فكره و تعرف انو هي سوريـّه لأنو مافي هوية محدده الها مجرّد كوبي عن العمارة بالخارج .. و يمكن بهالوقت اللي صار فيه العالم قريه صغيره فصار أصعب تتقيـّد بهويه محددة كلو عم يصير موحد ..

تحبي التصميم يكون ابداع من افكارك بالكامل.. او تحبي التقيد بستايل معين او خطوط عريضة تمشي عليها (متناسبة مع العمارة بالمنطقة)

انو متل ما ذكرت اني كتير بحب اعتمد على حالي .. و بذلك بحب افكاري تكون ابداع كامل من بنات افكاري .. ممكن اطلب دعم استشارة أو اطرح افكاري و شوف كيف يتلقاها الناس لكن ما كتير بحب التقيد او التماشي مع السوق فقط ..

تتمني تصاميمك الحالية او المستقبلية ان تنجز في سوريا ؟

يا ريت ..
حاليا ً مافي تصاميم لسـّا ، في تصاميم مسرحيّة لمسرحيات لكن مافي تصاميم مشاريع بعد .. انما انا بتمنى ثمّ اتمنى ثمّ اتمنى اقدر انجز بسوريا ولو عامود صغير .. و هاد سبب كتير كبير أثر باختياري للعمارة كمهنه ..
انـّو تقدر تترك مش بس لوحه مش بس صوره مش انما بناء او شارع ببلد رح يمر فيه بعدي مئات لا بل الوف من الناس .. يمكن انا لوقتها ما كون عايشه لكن في شي مني رح يضل عايش بهالمكان و بتمنى اقدر اترك شي مني بسوريا ..

تحبي تروحي لحدائق عامة ... او تفضلي الريف بمكان انا و الهواء الطلق وحدي

بين هالخيارين بفضل الريف .. للصراحة أنا مش زايره الريف كتير بعمري لكن بتذكر في برامج اطفال كان اسمه هايدي تفرجت عليه و انا و صغيرة و بتذكر انـّو في غرفه صغيره بتشبه السقيفه فوق فوق الشي بالبيت بتكون و فيها شباك صغير بطل على سهل واااااااسع من الخضار .. و في شب بتلعب هايدي معه كل يوم و هيك بيستهضمو بعض .. فأنا وقت بذكر الريف براسي بذكر هالمشهد هاد و أكيد بفضله عن الحدائق العامة ..
أيضا ً في مسلسل اسمه ضيعه ضايعه .. فهالضيعه اللي مصورين فيها مش بس بفضل زورها لا كمان ما عندي مانع عيش فيها ..

الّا اني بطبيعه الحال بحب السيتي ( المدينه ) العاصمه العجقه وين كل المراكز الثقافيه و الفعاليات و النشاطات تتجمـّع ..


شو اكتر مكان تحبيه ... بحيث تلجئي اذا حسيتي بالتعب

بذكر بمجمع الرمال الذهبيه بطرطوس كان في بآآآآآآخر الشط صخره كبيره الموج بيضرب عليها و لكن ما بغطيها .. كنت كل يوم حب روح اتأمـّل هنيك شي سـاعه .. و كل ما عصـّب او أزعل اطلع عليها .. حاليا ً على ما سمعت انـّو شالوها و قررو يعملو محلها مطعم بعدين تخانقوا الشركاء اللي حاطين ايدهم بالمشروع و العوض عالله ..
حاليا ً اليوم مافي مكان بلجأله كتير دون عن غيره نظرا ً لانو ما عندي وقت كتير انما احيانا ً اذا صار وقت بهرب لزاويه صغيره محتلتها بمكان اسمه caribou coffee هو عبارة عن محل قهوه صغير و فيه موقده نار و دافي كتير .. بناءه بيعجبني ( خشبي ) و من داخله مريح جدّا ً و الاضاءه فيه بتعجبني ( بعض انواع الاضاءه بتعملي وجع راس ) بس قهوته ما كتير طيبه







تحبي الجاز ... اذا اي الكلاسيك او الموديرن ؟

الكلاسيك


جينا ع الزيتون ...

بتعرف يا زيد انا بفكري نعمل انا و انت مضاربة على البطاطا تبع ياسين و نبلّش باعلانات الزيتون و اكتساح العالم ..

ليش شجرة الزيتون بالشرق الاوسط الها وزن اكتر من غير اشجار .. و هل جو شيكاغو بناسب زراعة الزيتون ؟

الزيتون هوّ أهم شجرة زرعت بالتاريخ .. عد مميزاتها :

1. سهله التسلّق
2. صعب حدا يكتشف انك سرقت منها زيتوناية
3. العالم مش رح تسرق زيتون اساسا ً نظرا ً لمرارته و صغر حجمه و الي بده يسرق بكون مستعجل و مش رح يبحبش عالزيتوناية بين الاوراق ..
4. تعمل على مكافحة البطالة حيث انو بمواسم الزيتون دائما ً بيحطو وظائف شاغره لقطف الزيتون
   
5. الها عدّه اشكال و ألوان
6. مذكوره بالقرآن الكريم
   
7. رخيص نسبيا ً و يصلح فطور و غدا و عشا
8. اذا اجا جدّك زياره لعندكم عالبيت مش رح يطلع بأطرميز الزيتون نظرا ً لأنو بدله سنانه ما بتساعده
   
9. أنا بحب الزيتون ..
   

امـّا اذا كان مناخ شيكاغو مناسب لزراعه الزيتون او لاء فالزيتون بدّه برد على ما اذكر و نحنا بشيكاغو بنزين البرد بالكيلو ..

ليش زيت الزيتون يقولو عليه صحي ...

اشاعات

هل ممكن الازمة العالمية تؤثر على وصول زيت الزيتون المتوسطي الى اميركا !

لاء الزيتون عبر التاريخ قدر يتصدى لجميع الا زمات العالمية و من المعروف انو الجيش الاميركي بالحرب العالميه التانيه كان يتغذى على الزيتون

اكيد يـُتبع بالجزء الثاني و ربما الثالث

بانتــــــظار المزيد من زيد


احلى وردة لاحلى شوش


و وردة لأحلى ابو سارة