[The morning]

-شو بتعنيلك شيكاغو؟

شيكاغو هي دمشقي الغريبه

2-شو موقفك من سياسة امريكا الخارجية؟

هممم .. أميركا خارجيا ً مخجله .. يعني بتخيل أكتر واحد اساء لصوره أميركا خارجيا ً هو جورج بوش ( جمهوري ) .. و لكن صوره اميركا قبله ما كانت كتير ظريفه عاليما ً .. اميركا من الحرب العالميه التانيه و لليوم خارجيا ً سياستها مخجله و عنيفة .. و اعتقد خلال حكم بوش الأشخاص اللي كانو خلف السلطه هنن اللي شوهو الصوره العامه لأسوأ ما يمكن .. هلأ على أمل انو اوباما ( ديمقراطي ) يحسن بعض مما كونه سياسي ناجح و يعرف من أين تأكل الكتف ..

قسم الرسم و التصوير شو بيعنيلك؟

اووووووووه شغله كبيرة .. بيتي .. بحس المساحه اللي بقدر وصل من خلالها رساله فنيه بتمنى تكون حلوه .. خصا ً في ظل انو نحنا عنـّا ما زالت الفنون البصريه ( الرسم و التصوير ) عم يعانو من تهميشهم او خليني قول ما آخدين أصداء كبيره بسوريا و بالمجتمعات العربيه عامه ً فبحس انو مسؤوليتي هون بتصير احلى و اكبر .. أنا ما بدي اعمل الناس كلها فنانه بس بدي ورجيهم قديش الفن حلو ..

4-شو سبب اختيارك لاسم "The morning" ؟

صراحه ما بتذكر اخترت غير اسم و كان مستخدم و بعدين اخترت مورنينغ .. أنا اجمالا ً بحب الصبح كتير .. بحسه نقي و نضيف و حنون و حتى البرد اللي فيه دافي ..

5-اول رئيس امريكي من اصل افريقي تم انتخابه هالسنة بامريكا, بالمشرمحي, هالشي يعني شغلة كبيرة؟

هو اوباما شغله كبيره بغض النظر عن كونه اسود و حسب ..

لكون صريحه أكتر فأنا من الناس اللي جدّا ً بيشدها تاريخ السود بأميركا .. الطريقه اللي اجو فيها عاميركا و الطريقه اللي تعذبو فيها و وقت تحررو و ما بعد هي اكتر مرحله بتشدني .. بدايه تحررهم و الاضطهاد الاجتماعي اللي صابهم و عدم السماح لهم بالسكن بمناطق معينه و الجلوس بآخر الباصات و المسارح و ما اليه و احيانا ً ممنوعين من دخول بعض الاماكن اذا فيها بيض .. هاد التاريخ كلـّه بشدني بشكل كبير .. بحس انو ما هي عمليه سهله اللي صارت .. بتعبيلي راسي بحسها بطوله نوعا ً ما ( مش انتخاب اوباما انما تخطي فتره ما بعد تحرير العبيد بكم ميه سنه )) ..

عوده ً لأوباما فأنا هو كشخص كفكر يعني بشدني .. اسلوبه طريقه طرحه للأمور الطريقه السياسي و المحامي الناجح اللي بيعرف يقلّك شو بدك تسمع و يخليك تقول شو بده يسمع .. يقنعك انو كل شي عم يعمله لمصلحتك ..

و ايضا ً هوّ فخر للأميركان المتحررين ( مش المتعصبين الرجعين ) .. انو شخص أسود من أصول مسلمه اسمه باراك حسين اوباما .. يوصل لرئاسه أميركا اللي تعتبر من أقوى دول العالم .. فقديش معناها الشعب الأميركي قطع شوط كبير باهمال بعض من العنصريه و التشدد اللي اشتهر فيها على مدى سنين ( بلد الرجل الأبيض ) ..

أضف الى ذلك أنو اوباما كان بيدعم الشباب و عامه الشعب بالوقت اللي كان ماكين بيدعم الشركات و رجال الأعمال على حساب باقي الشعب ..

انا بنبسط انـّي قدرت احضر لحظه انتخاب اوباما كرئيس للولايات المتحده الأميركيه ..
يوم انتخابه كان عنـّا ( حد جامعتي ) و المسا وقت اعلان النتائج ما كان في حدا ببيته كل الناس بالشوارع و رايحه تحضره لايف و بكي و دموع و فخر و بسط و قصص.. كان يوم تاريخي بكل معنى الكلمه ..

بونوس كويسشن*:

امريكا شو عطتك وشو اخدت منك؟

جاوبت على سؤال بيشبهه سألته سونيا