[The morning]

من فتره عم احكي مع أحدى صديقاتي اللي كانت عتواصل معي خلال مروري بتجربه حب قديمه .. سألتني عنها و هي خجلانه و خيفانه عليّ .. ردت فعلي كانت عاديه جاوبتها بتفاصيل كيف \ ليش \ ايمت خلصت القصـّه و استغربت انـّو بعدنا لهلأ بنحكي و بعدنا بنتواصل في حال صار ضروره (( بدون ما تكون القصّـه مكمله )) فشرحتلها وجهه نظري من القصـّه و طبعا ً هي كانت مصرّه على انها تضلها عم تواسيني و لليوم و هالشي بعصبني عفكره ..

و في وحده جارتنا وقت كنا صغار كانت تجي لعند أهلي وقت كانت عم تجهـّز لعرس بنتها و تحكي عن عريس الغفله و تشرح و تتغزّل فيه و يا سلام يا سلام .. بعد فتره تركو بعض و جارتنا ضلت تجي لعنـّا و تحكي عن عريس الغفله (( سابقا ً )) لكن هالمرّه مسبات و نشر غسيل وسخ و عمل و ساوى و شو شرشوح الجهاز اللي جبلها ياه وطقم الكاسات بميتين ليره و طنجره الضغط بمابعرف قديش ..

أيـضا ً بتذكر أختي الصغير كان عندها رفيقه بالروضه أو الابتدائي و كانو صحبه و أسرار و قصص و يا ويله اللي بيحكي على (( آلاء او ولاء كان اسمها البنوته )) .. لحد ما صار في مشكله عشي برايه أو محايه او مشكله صغيره بيناتهم جهزت على اثر هالمشكله كل وحده منهم جيوشها (( عصابتها )) و نزلو شد الشعر ببعض .. بوقتها رجعت أختي عالبيت و حكتلنا كل أسرار رفيقتها و صار ذكر اسمها بالبيت هوّ اشعال ثوره .. المضحك بالموضوع انـّو بعد فتره رجعو تصالحو و رجعت صارت (( آلاء )) من أعز أصدقاء اختي ..

اللي بدي أوصله من كلّ هالأمثله أنـّو ليش دائما ً الأمور بمنظورنا امـّا بيضا أو سودا ؟ ليش يا معنا يا علينا ؟؟ يا أنا يا أنت .. يا بحبه و بموت فيه و بجن عليه يا ما بدي اسمع اسمه بجبلي العصبي ؟ يا جيد جدّا ً يا سيئ جدّا ً ؟ ليش ما بنقدر نطلع عالصوره كامله في آن معا ً ؟؟
أكيد الشخص \ الشيئ ما بيتغيرو بالسرعه اللي بيتغير حكمنا فيها عليهم .. لذلك هالأمر أكيد مرتبط فينا أكثر من ارتباطه بالآخر .. بنهمل ببعض الأوقات اشياء بندقق عليها في حال اختلفنا مع الأشخاص..

ليش و كيف و ايمت بنغيـّر حكمنا على ألاشخاص \ الاشياء بشكل مفاجأ ؟ و هل هالشي مقبول بالنسبه الك ؟؟ هل بتمارسه ؟؟ صدقا ً ؟

هات خبرونا