اقتباس:
كاتب النص الأصلي : Abu ToNi
خلال التسعينات شو الشي اللي دفع الألمان للأعتداء على الأجانب ؟
كان في صفة مشتركة بين الأجانب ( لون - شكل - دين ) ولا بيكفي انن مانن ألمان حتى يكونوا بدائرة الخطر ؟
كيف انحلت القصة وسيطرت الحكومة على التحركات هي ؟
|
قضية الاعتداء على الاجانب بدأت من بعد الوحدة بين الالمانيتين, وكانت دايما اخدة طابع اعتداءات متفرقة بتزيد بمناطق و بتنقص بمناطق .
الالمان الشرقيين متوزعين على خمس ولايات من اصل 16 ولاية بالمانيا, هدول بفترة الحرب الباردة كان يموتوا حالن بس ليهربوا على المانيا الغربية , وبعد انهيار جدار برلين سنة 1989 صار استفتاء بالمانيا الشرقية حول الانضمام المباشر او التدريجي لالمانيا الغربية وكانت النتيجة الساحقة للانضمام المباشر.
فيك تقول موجة الاعتداءات على الاجانب اللي بدأت بالتسعينات كانت احد انواع الاحتجاج على خيبة الامل اللي صابت الشعب هنيك من الوحدة, هلق بالمانيا الغربية في كمان تطرف قومي وفي نازيين بس المشكلة انو الشعب بالقسم الغربي باغلبية كبيرة بيوقف ضد هالشي تماما , بالقسم الشرقي بتحس انو الشعب اذا ما كان ضد الاعتداء على الاجانب فهو مو فارقة معو كتير.
في كمان قضية البطالة الكبيرة اللي نشأت بالقسم الشرقي , واللي الها اسباب كتيرة , و البطالة هي احد اهم الاسباب اللي بتخلي شباب كتير يسمع لخطاب الحزب النازي الجديد المعادي للاجانب بشكل عام .
الاعتداءت على الاجانب كانت بالبداية موجهة للكل , للسود للبيض لكل واحد مو مبين علي انو الماني , انا اول مدينة عشت فيها كانت اقرب للضيعة سكانها ما بيتجاوزوا ال 15 الف, واحد صديق عاش فيها قبلي بفترة التسعينات حذرني انو اوعك تطلع بعد الساعة 8 بالليل لانو المدينة مليانة نازيين, بس لما وصلت ب 2001 ما شفت هيك شي ولما سالت عرفت انو المدينة هي كان يتجمعوا فيها الشباب العاطل عن العمل من القرى المجاورة و بالليل اي اجنبي يشوفوا يضربوا حتى الموت احيانا
بعدين الوضع كتير تحسن وخفت الظاهرة هي نوعا ما بفعل جهود الدولة والاحزاب الكبيرة , والسبب كان احتجاج الاهالي نفسن , لانو المدينة هي متل كتير من المناطق الشرقية هجروها الشباب بنسبة عالية , وسياحة مافيها وشغل ما في , صارت احد اهم مصادر دخلها هو الجامعة التطبيقية اللي اسسوها فيها واللي كان شي 80 بالمية من طلابها اجانب, وهدول كانوا يجوا يصرفوا مصاريهن هنيك ويحركوا الاقتصاد الراكد شوي , بس وجود النازيين اللي طفشوهن خلى الاهالي يتحركوا وكانت النتيجة تحسن الوضع
هلق بمناطق تانية مازال الوضع سئ, لانو الناس هنيك فعلا بتكره الاجنبي وما عم يتحركوا للاحتجاج على هالشي لانو قرفانين الوضع كلو.
مشان هيك الدولة لوحدها مابتقدر تعمل شي اذا ما الشعب نفسو لفظ المتطرفين من بين صفوفو وطالما الشعب عاطل عن العمل ما رح يتحرك.
شوف مثلا بالقسم الغربي لما الحزب النازي بينظم مظاهرة من 200 شخص يتطلع بنفس اليوم مظاهرة ضدن من 2000 شخص لانو ما حدا بيقبل انو مدينتو تصير مستنقع للتطرف والنازية الجديدة .
بس من كم سنة صارت اغلب الحوادث عم تتركز ضد الاتراك والعرب على اعتبار غالبية الاجانب بالمانيا اتراك ثم بوسنيين والبان ثم عرب , وعلى اعتبار نسبة الاتراك والعرب اللي عم يستقروا بالقسم الشرقي عم تزيد يوميا فصار طبيعي بظل هيك اجواء يصيروا الهدف المفضل للنازيين.