اقتباس:
كاتب النص الأصلي : ..Jimy
|
لك جيمي شو صايرلك حتخليني نتف شعري شكلا البكلوريا مأثرة سلباً فيك 
في شي بالعرف القانوني وتحديداً بالمحاكم الشرعية اسمو القياس والاستنباط وعنا المحاكم الشرعية بدون هيك قوانين مقرفة وبتستنبط على كيفا فكيف اذا بينفتح هيك بواب؟؟
وحياتك ليصيرو ياخدو الطفل من إمو بـ 5000 ليرة لـ الآزن يلي على باب القاضي وليصير الطلاق للمسيحين بـ 200 ليرة والزواج التاني بـ 25 ليرة "يعني بنص حق سينزي على قولتك "... وإذا بتقرا المشروع كاملاً عن جد بتشوف بنود وفقرات مقرفة وما مقبولة كـ تحديث لقانون ولازم هالتحديث يكون للأحسن ويتماشى مع معايير حقوق الإنسان والمواثيق الدولية...
حبيبي الفكرة الأساس إنو هاد القانون إذا إتشرع " وحيتشرع إذا ماكان في ردة فعل عنيفة من منظمات المجتمع المدني" صدقني لتخرب البلد..
اقتباس:
كاتب النص الأصلي : Nay
ليك صديقي متل ما حكيت من قبل هادا اسمو مشروع.. والمشروع لسا مو معروض للمناقشة..
بعتبر انو استباق للامور التحفظ على صياغة النص اللي عادة بيتغير كتير بعد المناقشات.. وبيصير جلسات خاصة لصياغات القوانين عادة مؤلفة من مختصين لغويين وقانونيين..
ولكن الان بعتقد انو في امور بالمشروع بتستحق المناقشة والاعتراض عليها اكتر بكتير من مسألة الزواج التاني عند المسيحيين اللي بعتقد ما هي الا خطأ بالصياغة مو أكتر.. واللي احيانا الناشطين السوريين بيبالغو بالوقوف عندا
|
مرحبا ناي:
شفتيني بشي محل قلت انو هاد قانون مو مشروع قانون؟؟ يعني والله بعرف الفرق بين التنين وحطيت النص الكامل للمشروع وقلت انو هاد مشروع حيخضع لسا لمناقشات
بس لعلمك هالمناقشات عادة مابيكون فيها أي تغييرات جذرية لإشرحلك كيف:
هاد المشروع من إعداد لجنة قانونية وشرعية مكلفة من رئاسة الوزارة خلص بيجي بينطرح على مجلس الوزراء يلي بعمرو ما أدخل تغييرات على أي مشروع قانون محال لإلو من إحدى اللجان على إعتبار الوزراء مانون اختصاصيين بأي مجال وإنما بيعتمدو القوانين المحالة لهم كما هي وبيحيلوها على مجلس الشعب...
بيجي المشروع على مجلس الشعب ليتصوت عليه وبينطرح على المناقة العامة يلي أساساً الأعضاء فيه مابيكون عرفانين على شو عم يصوتوا فبيطلع القرار بالإجماع متل ما صار بقانون جرائم الشرف... وإذا الله رضي علينا وطلعلو شي واحد ناقش المشروع بيكون ماحدا عم يسمعو ومو مصدقين ايمت يطلعو ويروحو على محافظاتون.. فدور المجلس عنا مهمش ان لم نقل غائب...
نقطة أخيرة:
بأحد المواضيع السابقة عن المعتقلين السياسين كان إلك رأي انو جماعات حقوق الانسان بسوريا بيزيدوها وهون كان إلك نفس الرأي وأذا هالمشروع انرفض من المجلس وأعيد لاستكمال الدراسة بيكون بفضل هالحملات والجهد الجبار يلي ساووه هالمنظمات والهيئات يلي مو عاجبك شغلون ويلي عم تتهميهون بالتهويل... وإذا بتحبي بجبلك تقارير كل النظمات الحقوقية والإنسانية بالعالم وبعرضلك ياها "لأنو بعرف إلك مراق بالإحصائيات والتقارير"
مابعرف شو الغرض من هالكلام إذا مع كل التهويل يلي عم تمارسو المنظمات الحقوقية بسوريا "حسب رأيك" ووضع حقوق الإنسان بسوريا هو من الأسوء بالعالم "سوريا وعلى اختلاف التقارير إجت دائماً بأحد المراتب العشرة الأخيرة عالمياً...
مئات معتقلي الرأي والضمير ياناي إلون علينا حق وحقون كبير... مئات الأمهات المظلومين بحسب قوانينا إلون علينا حق كبير... قانون الطوارئ القامع لشعبنا واجبنا محاربته وهالقانون القمعي قد ما حاربناه و"هولنا" حتى ننهيه منكون لسا ماعملنا واجبنا...
إذا أنتي بقضايا الإعتقال التعسفي وسجن الناشطين الوطنيين عم تشوفي الموضوع مبالغة وبالقضايا الحقوقية كما حالنا هنا عم تشوفي الموضوع مبالغة وحاسه إنو الحكي يلي عم ينحكا زيادة فما بعرف شو بدي قلك..
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
|