اقتباس:
كاتب النص الأصلي : باشق مجروح
أيهم انا لما قلت اجانب قصدت بشكل عام بالحياة مو بأخوية . مثلاً يجي واحد خليجي او مصري او اياً يكن يهين الرئيس بكلمة بحس انو الاهانة اصابتني شخصياً و عم بحكي بلسان كتير ناس ممكن تحس بنفس الاحساس .
غير هيك انا لما صوتت للرئيس صوتلو عن قناعة مطلقة.
بعدين ما بعرف ليش مصر على تحليل سلوكنا و كأننا مريضين نفسياً ازا كنا منحب الرئيس  .
سيدي انا شخصياً ما عندي مشكلة مع وجودك كـ معارضة و لا بعتبر نفسي موالاة عمياء انا ببساطة بحب هالشخص و بتفائل فيه و منتظر منو خير للبلد .
بعدين شفتك منفعل لدرجة كبيرة بحكيك كنت رح تبلش تسب كل محبي الرئيس و تعتبرهون ناس قاصرين او قطيع او ما شابه . طبعاً انت حر ما رح طالبك بتغير اسلوبك بس انو رواق خيو ما صار شي .
|
خيو ماني معصب ولا منفعل ولا شي, ولا قلت انو كل اللي بحب بشار الاسد مريض , انا قصدي انو شغلة جدا غريبة لما بتلاقي ناس شايفين بلدن عم يتخرب ويتراجع بكل شي وبقلك انتو ليش عم تعارضو؟؟ في شي؟؟
برجع معك على فكرة تزييف الواقع وتحويل كل الانتكاسات اللي عم نشوفها لانتصارات وهمية
ما عم لاقي لحد هلق شي وعد في بشار الاسد بخطاب القسم تبعو وتحقق,
الاصلاح السياسي في خبر كان وتكميم الافواه رجع متل ايام ابو, بالعكس على ايام ابو كانو يتحججوا بالاخوان ليصادروا اي صوت معارض واليوم لا في اخوان ولا شي.
الفساد اللي عم تقول انو عم يحاربو, هو احد رموزو لانو اكبر ملف فساد في سوريا متل ما بتعرف هو رامي بيك مخلوف وحتى لو حطينا هدا على جنب, حيتان الفساد التانية شفت حدا قرب منن؟؟ مكافحة الفساد في عهدو ما ببتعدى بهرجات اعلامية ما الها اي تاثير على الواقع المرير.
الحرية, بقولولك الشباب انو في مساحة حرية, واكبر مثال هو انو بتقدر تنتقد الوزراء,
الاصلاح الاقتصادي ماشي عال العال, مبارح عم اقرا انو 62 بالمية من الشعب راتبن ما بيتعدى 139 دولار بالشهر, والخير لقدام , بلد من 35 سنة ما دخل ولا حرب و عندو موارد كافية تامن لشعبو على الاقل حياة فوق مستوى الفقر مين وصلوا برايك لهون؟؟
واذا بدك بتنعمل مواضيع ومواضيع عن الوضع السوري بعد 9 سنين من حكم سيادتو
فبرايك مو من الاولى ينسئل على شو عم تحبو؟؟