اقتباس:
كاتب النص الأصلي : Abu ToNi
تنشره وسائلنا الاعتامية ( التاء لم تسقط سهوا على قولة فادي )
|
شكراً غاب على حماية حقوق الملكية الفكرية
الله يستر بكرا ما لاقي شي موضوع نازل بالمنبر لشي حدا اسمو وسائلنا الإعتامية
المهم صديقي افهمني برواق:
أنا وياك منعرف انو ايليفانت أند كاستل أحياناً إلو أراء راديكالية وفيها نوع من التطرف بس رأيو هون أبداً انت ماحاولت تفهمو بالطريقة يلي هو قاصدو فيها لقلك ليش:
الشب ماقال انو مع عقوبات تنفرض على الشعب السوري بهدف تغيير النظام ولاقال انو مع الأميركان يحاصرو سوريا اقتصادياً.. كل شي قالو انو العقوبات هي عم تنفرض على مسؤولين النظام وعلى أرصدتون بالخارج وعلى بعض المندوبيين الأمنيين بالخارج وتنقلاتون وماشاكل..
انت فهمت هالموضوع انو مساس بالسيادة الوطنية وفرض حصار لتجوييع الشعب السوري وقطع السمنة والرز والمحارم "متل التمانينات" عن سوريا وحتى وصلت معك الأفكار انو حملت الحصار"تجاوزاً" الأمريكي مسؤولية ارتفاع الأسعار بالبلد "عن جد هي صدمتني"...
شوف معلم هالحصار صرلو فارضتو أميركا نظرياً من التسعينات وتشددت فيه من الـ 2005 وطلع قرار الحجز على أرصدة المسؤولين الأمنيين وكم واحد من بيت مخلوف بأميركا وبعض أوروبا.. هالشي كيف ممكن يأثر عليك وعليي مابعرف مع العلم اني ضد أي تدخل أميركي ببلدي... بس على اعتبار هالنظام بيخانق وبيصالح على كيفو وبيسكت للأميركان على كيفو وبيستقبلون "أول مبارح" على كيفو معناها يصطفلو بقلب بعض طالما الشعب لاكسبان شي ولا خسران شي...
بحيثيات قرار العقوبات:
كيف الحجز على أموال رامي مخلوف "يلي على قولتون مو موجودة" بأميركا حيأثر عليك؟؟
كيف منع تأشيرات الدخول لأميركا عن كم ضابط مخابرات ممكن يأثر عليك؟؟؟
كيف منع الحوالات المالية من أميركا لعشر أسماء من سوريا وكلون ضباط مخابرات أو من الشباب ممكن يأثر عليك؟؟
يعني هالعقوبات الهزلية صدقني مانها مأثرة شي غير شوية ضغط على هالنظام وعلى فكرة هالشي وفق تصريحات كل مسؤولينا الفهمانين انو هالعقوبات مالها أي أثر على سوريا بلدك وبلدي فغريب انك تكون ملكي أكتر من الملك...
نقطة أخيرة غابي ارتفاع الأسعار والرواتب الحكومية التافهة والبطالة والمحسوبية وكل الفساد بالبلد سببو حكومتنا العتيدة مو العقوبات الأمريكية حتى اذا قريت هيك بجريدة البعث شي يوم
وأحلى خمسمية محروقة لغابي وأيليفانت أند كاستل يلي بتدابح أنا وياه بالعادة
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!