[personita]

كاتب النص الأصلي : sona78

ع كل باعتبارك بيرسونيتا الك تعامل مباشر بهيدا الوضع بدي اعرف منك اذا المهاجرين الشرعيين بيلاقو مبررات قانونية للبقاء بالبلد الهدف ..... ولا اعادة المهاجر تعتبر بديهية الا اذا نفد من الشرطة؟؟؟
وفي حال انو ما انمسك ع اي اساس بيشتغل ؟؟ يعني في حاضنين لهيك مهاجرين وشو ظروف العمل في حال اتوفروا؟؟؟؟
بعرف بالمانيا انو الموضوع ما بياخد عجقة كتير المهاجر غير الشرعي فورا بيتسفر ع بلدو .. وتضاف تكاليف السفر عليه يعني هوي ملزم برد المبلغ يلي انصرف من شان اعادتو للدولة الالمانية ( هيدا سمعتو فقط شفوي من احد الاصدقاء ما فيي قول عنو صحيح مية بالمية )

أنا ممكن أحكي عن القانون هون باسبانيا بس، و من خلال تجربتي الشخصية بس كمان: القانون بيحكي إذا حدا اجا بطريقة غير قانونية لازم يترجع على بلدو، مبدئيا، إلا إذا كان قاصر أو لاجئ أو ما بيحمل جنسية أي بلد. هلا منيجي للتفاصيل: في القانون و في تأويلات القانون (الثغرات).
بالنسبة للقاصرين، في اختبار طبي (بيحدد السن بطريقة تقريبية مع هامش مهم من الخطأ)، و هو اللي بيعتمدوه هون مشان تحديد سن المهاجرين اللي بيحكو انهم قاصرين. و اللي بيحكو أنو سنهم أكبر من 18 (مع انو بيكون مبين أحيانا انهم بيكذبو، لأنو ما بدهم يروحو على مركز القاصرين أو ما بيعرفو أنو القانون ما بيسمح بإرجاع القاصرين) ما بيعملولهم أي اختبار.
بالنسبة لحق اللجوء، صعب جدا جدا أنو ينعطى لحدا،وكذلك بالنسبة لي يا اللي ما بيحملو جنسية أي دولة، الشروط شبه تعجيزية، و الدليل انو هون في كتير فلسطينيين و عراقيين و من دول افريقية وضعها السياسي غير مستقر، بس بيُعاملو قانونيا مثلهم مثل بقية المهاجرين دون الأخذ بعين الاعتبار وضعية الحرب في بلادهم. في أحسن الأحوال ما بيسفروهم على بلدهم، بس بيضل وضعهم غير قانوني.
في شغلة تانية تذكرتا: القانون بيحكي انو أي شخص تولد داخل اسبانيا هو اسباني. هلا إذا مهاجر غير شرعي بيجيه ابن تولد داخل اسبانيا، ما بيعطوه جنسية و لا حتى إقامة و بيضال وضعو غير قانوني متلو متل وضع أي مهاجر، ليش؟ بيحكي لك لأنو القاصر بيتبع أبوه أو أمو، ممكن يصير قانوني في حالة إذا ما أحد الوالدين تعدل وضعو القانوني ويصير عندو إقامة.
بالنسبة ليا اللي بيصلو في قوارب، التعامل معهم بيكون حسب البلد الأصل: في بلدان موقعة اتفاقيات إرجاع مواطنيها مع اسبانيا (مثل المغرب، الجزائر مثلا)، و هدولا بيتم إرجاعهم فورا، بمجرد ما بتنتهي الإجراءات القانونية لتسفيرهم. و في بلدان لا، مثل تبعون افريقيا معظمهم لا، و ما بيقدرو كمان يثبتو من أي بلد بالضبط اجو، لأنهم كلهم بيحكو من مالي أو غامبيا، لأنو بيعرفو مسبقا أنو ما في اتفاقية بينهم و بين اسبانيا. هدولا بما انو ما في صيغة قانونية لإرجاعهم، ما بيتسفرو، بس بيضلو في دوامة، لا وضعهم قانوني و لا ممكن يصير قانوني إلا بعد سنين من العناء و البهدلة، طبعا شغل ما بيشتغلو، إلا أسوأ الأعمال، في ظروف لا إنسانية، و بنص أو ربع الأجر المتعارف عليه، بس مع ذلك معظمهم بيضالو على أمل يوم يقدرو يحققو الحلم اللي اجو مشانو.